Soopu 39

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹N nyǝmɑ́ tɑɑlɛ pǝ́ŋ nɑ nɑmǝŋ husi ɩsɔtʋnɑɑ nɑ? Nyɑ́ feŋiɣinɑ ɩ tɔɔ kɛ́ sɑɑ wei lʋlʋɣʋ wʋsɑsɩ tɑpɑ-ɩ tɔ? Yɑɑ n tɩɩ nyǝmɑ́ ɩ lʋlʋɣʋ wɑɑtʋ?

³Ɩ sopiɣi kɛ́ nɑ ɩ́ lʋlǝɣɩ ɩ piyɑ. Ɩlɛnɑ ɩ́ hɛɛsǝɣɩ wʋsɑsɩ.

⁴Nɑ ɩ piyɑ wɛnɑ ɑlɑɑfǝyɑ nɑ sɩ́ pɩɩkɩ nyɩɩtʋ tɑɑ. Kʋyɑkʋ nɑkʋlɩ, ɩlɛnɑ sɩ́ tɛɛ. Sɩɩ tɑsǝɣɩ mǝlʋɣʋ.

⁵Awe hɛtǝnɑ tɑɑlɛ kpɑŋɑɣɑ nɑ ɩ́ yele-kɛ́ sɩ kɑ́ tɛɛ?

⁶Mɑ́ lɑpǝnɑ kɑ tǝcɑɣɑlɛ kɛ wʋlɑɣɑ tɛtʋ nti tǝ wɛ tǝnyɑŋŋ tɔ tǝ tɔɔ.

⁷Sɩ woŋiɣi ɩcɑtɛ tɑɑ kɔkɔtɛ kɛ́. Pǝyele sɩɩ nɩɩkɩ cɛcɛ holɑ.

⁸Pulɑɣɑ tɔɔ kɛ́ sɩ cɑɑkɩ sɩ sɩ́ hiki sɩ tɔɣɔnɑɣɑ, nɑ sɩ́ pɛɛkǝɣɩ nyɩɩtʋ kʋlɛkǝlɛkǝtʋ.

⁹Tɑɑlɛ nɑʋ kɑ́ kɔɔ sɩ ń lɑnɑ-ɩ tǝmlɛ yɑɑ ɩ́ hǝntɩ nyɑ́ tɔlɑ tǝtɔɣɔlɛ kiŋ kɛ ɑhoo nɑ?

¹⁰N kɑ́ tʋ ɩ luɣu tɛɛ kɛ́ ŋmǝnɑɣɑ, yɑɑ ɩ́ hɔ ɑkuɣu nɑ wɑɑlɩ tɔɔ, nɑ ɩ́ hɛɛ kpɛɛsɩ nɑ?

¹¹N kɑ́ lɑpɩ-ɩ nɑɑni kɛ́ ɩ tomiŋ sɔsɔɔŋ tɔɔ, nɑ ń yelinɑ-ɩ nyɑ́ tǝmɑ sɩ ɩ́ pɑɑsǝnɑ?

¹²Yɑɑ nyɑ́ kʋmtʋ kɛ ń kɑ́ yelinɑ-ɩ sɩ ɩ́ kpeenɑ tǝyɑɣɑ, yɑɑ ɩ kuu pee kɛ kɑtɑɣɑ tɑɑ?

¹³Tɑɑtɑɑnɑɑ hɛtǝɣǝnɑ pɑ keŋ nɑ lɑŋhʋlʋmlɛ kɛ́, nɑ ɩ́ nǝɣǝsǝnɑ ɩsɩɩ kʋlɑɑlʋɣʋ nyǝŋ.

¹⁴Wɑɑtʋ wei tɑɑtɑɑ tʋɣɩ ɩ yɑlɑ nɑ ɩ́ tɑkɩ-yɛɣɛ ilim kɔkɔ kɑnyǝŋɑ sɩ ɑ́ tiisi tɔ,

¹⁵ɩ sɔɔkɩ kɛ́ sɩ tɑɑlɛ wontuɣu nɑkʋlɩ kɩɩ fɛlɩ-yɛɣɛ nɔɔhǝlɛ nɑ ɑ́ yɔkɩ.

¹⁶Ɩ tɔkǝɣɩ ɩ piiŋ kɛ́ nɑ toŋ, ɩsɩɩ pǝ tɑɣɑ ɩnɩ ɩ tǝnnɑ. Ɩ fɛɩ sɔɣɔntʋ sɩ ɩ wɑhɑlɑ kɑ́ lɑ yem.

¹⁷Mpi tɔ, mɑ tɑ tʋ-ɩ lǝmɑɣɑsɛɛ yɑɑ lɑɣɑtʋ kɛ sɑɑ wei mɑ ŋmɑ-ɩ tɔ.

¹⁸Amɑ wɑɑtʋ wei ɩ kʋlǝɣɩ sewɑ tɔ, ɩ pɑɑ fɛɩnɑ kpɑɣɑnʋ nɑ ɩ cɑɣɑlʋ.

¹⁹Nyɑ́ tʋnɑ kpɑɣɑnʋ kɛ tomiŋ nɑ? Yɑɑ nyɑ́ tʋnɑ ɩ luɣu tɛɛ kpɛɛm?

²⁰Nyɑ́ yekinɑ nɑ ɩ́ ŋmɑɑkɩ ɩsɩɩ lɑkǝlɛ nɑ ɩ́ wiikinɑ ɑpɑlʋtʋ nɑ sɔɣɔntʋ kpɑɑkɩ kolontu nɑ?

²¹Ɩ hɑlǝɣɩ ɑcʋwɑ kɛ tɛtɛkǝlɛ tɑɑ, nɑ ɩ lɑŋlɛ hɛɛnɑ ɩ toŋ. Ɩlɛnɑ ɩ́ ŋmɑɑ kolontu nɔɣɔ tɔɔ kɛ́ yoou tɑɑ.

²²Ɩ fɛɩ sɔɣɔntʋ, pǝ́cɔ́ ɩɩ nyɑŋnɑ pʋlʋ, ɩɩ tuliɣi tɑpǝŋ kɛ kolontu lɑɣɑtɛ kiŋ.

²³Ɩ tɔɔ cɑɣɑlʋ ŋmɑntɑɑɣɑ, nɑ ɩ lɑɣɑtɛ pǝ mʋɣɩ kɔkɔ, nɑ ɩ kɔɔkɑ nɑ́ɑ́ cɛɣɛtǝɣɩ ɩ tɔɔ.

²⁴Tutuɣu wiiki nɑ pǝ́ nyɑɣɑlɩ-ɩ teu nɑ ɩ́ kpisi ɩ tǝɣɩ kpɑʋ, ɩlɛnɑ ɩ́ tʋ cɑsǝlɛ.

²⁵Tutuɣu wiiki, ɩlɛnɑ ɩ́ yɑɣɑ ɑpɑlʋkɑkiisɑɣɑ tǝwɑpɑpɑ. Too pooluŋ tɑɑ kɛ́ ɩ nɩɩkɩ yoou tɑŋ nɑ yoolɑɑ sɔsɑɑ holɑ nɑ pɑ kɑkiisɑsɩ.

²⁶Nyɑ́ lɑɣɑtʋ kɛ ŋmɑkǝlɛ kʋlǝɣǝnɑ nɑ tǝ́ hɛtǝɣɩ tǝ keŋ nɑ ilim mpǝtǝŋ tɔɔ?

²⁷Nyɑ́ hɑɑnɑ cɔlɔʋ sɔsɔ kɛ nɔɣɔ sɩ ɩ́ kʋlǝɣɩ, yɑɑ ɩ́ tʋɣɩ ɩ tɑntɛ kɛ pulɑɣɑ tɑɑ?

²⁸Kʋkpɑmǝŋ tɑɑ kɛ́ ɩ cɑkɩ nɑ ɩ́ sʋʋkɩ kʋkpɑmʋɣʋ kʋkʋlʋɣʋ nyʋɣʋ tɑɑ, timpi nɔɣɔlʋ ɩɩ tɑkɩ tɔ.

²⁹Hɑtoo nyʋɣʋ tɑɑ tǝnɑɣɑ ɩ wɛɛkɩ, nɑ ɩ́ loosiɣi ɩ tɔɣɔnɑɣɑ nɑ ɩ́ cɛŋǝɣɩ-kɛ.

³⁰Ɩ piiŋ nyɔɔkɩ cɑlǝm kɛ́ nɑ timpi wontu kʋsǝpʋtʋ wɛɛ tɔɣɔ ɩ cɑkɩ.