1Ḿpʋ́ɣʋ́ Suhɑ tʋ Pilitɑ tɔmɑ Soopu sɩ:
2Pǝlee kɛ́ n kɑ́ hɛɛsɩ nyɑ́ yɔɣɔtɑɣɑ ŋkɛ? Nyɑ́ kʋyɔɣɔtʋtʋ kɑ́ wɛɛ ɩsɩɩ heelim sɔsɔɔm nɑ?
3Hɑ, n tɛŋ nyɑ́ tɑɑ sɩ Ɩsɔ Tomɑ tǝnɑ tʋ kɛɛkɩ siɣisuɣu yɑɑ tɑmpɑnɑ kɛ?
4Ye nyɑ́ piyɑ wɑkǝlǝnɑ Ɩsɔ, ɩ fɛlǝɣɩ-sǝɣɩ sɩ ɩsɑɣɑtʋ kɛ́.
5Amɑ ye nyɑɑ kɛɛsǝnɑ Ɩsɔ tɔɔ nɑ ń tɛkǝɣɩ Tomɑ tǝnɑ tʋ kɛ niŋ,
6ye n sɛɛsɑ ɩsǝlɛ nɑ ń tǝŋǝɣɩ tɑmpɑnɑ, Ɩsɔ pɑɑsǝɣǝnɑ-ŋ kɛ́ nɑ ɩ́ hɑ-ŋ tǝcɑɣɑlɛ nte tǝ mʋnɑ-ŋ tɔ.
7Hɑlɩ nyɑ́ wɛnɑʋ nɔɔnɔɔ nyǝm kɑ́ kǝlɩ kɑncɑɑlɑɣɑ nyǝm kɛ tɔɔʋ.
8Pɔɔsɩ lɔŋ nyǝ́mɑ, nɑ ń tɔkɩ pɛlɛ pɑ cɑɑnɑɑ lɑɣɑtʋ tɑsʋɣʋ.
9Mpi tɔ, tete tete kɛ pǝ lʋlɑ tɑ́, tǝ tɑ nyɩ pʋlʋ. Tɑ weesuɣu ɩɩ lɑɑ tɛɛʋ kɛ cǝnɛɣɛ ɩsɩɩ ɩsotom.
10Amɑ pɛlɛ pɑɑ tɑsɑ-ŋ lɑɣɑtʋ kɛ timpi timpi pɑ nyǝmɑ́ tɔ.
11Mʋlʋɣʋ*fɑ* ɩɩ sǝŋǝɣɩ timpi lʋm fɛɩ tɔ. Pǝyele sǝsǝncɑŋɑ ɩɩ hɑtǝlǝɣǝnɑ nikɑɣɑ. cǝnɛ.
12Lʋm ɩ́ nyɔɔwɑ kɑ wʋlǝɣɩ kɛ́, nɑ pɑ́ tɑ tɩɩ sɛtǝtɑ-kɛ sɩ, pɑ́ lɑnɑ pʋlʋ.
13Ḿpʋ́ɣʋ́ Ɩsɔ tɔ́ɔ́ sɔɔlɑɑ tɛɛsǝɣǝnɑ, nɑ ɩ kisilɑɑ tɛɛlʋɣʋ nɑ́ɑ́ sɑɑlǝɣɩ yem.
14Pɑ nɑɑni cɛkɩ kɛ́ ɩsɩɩ kponkpontu, nɑ pɑ nyʋɣʋ tǝtʋlɛ nɑ́ɑ́ wɛ ɩsɩɩ ɑcɑɣɑnyɑtʋɣʋ.
15Ye pɑ nyǝkɑ pɑ tɛɛsɩ tɔɔ sɩ leŋliɣi kɛ́. Pɑ nyɔkǝlǝɣǝnɑ-sǝɣɩ teu ɩlɛnɑ sɩ́ yɔkɩ.
16Pɑ wɛɛ kɛ́ ɩsɩɩ tʋɣʋ sǝŋʋɣʋ ilim tɑɑ kɛ́ teu, nɑ cǝlǝm tɔɔ kʋ tɑɑ nɑ kʋ tiikɑsɩ kɛ hɑlǝm tǝnɑ tɔ.
17Kʋ kɑŋ kʋ lilɑ kɛ́ nɑ ɑ́ lɛɣɛtǝnɑ pɛɛ huɣule, nɑ ɑ́ hikiɣi nikɑɣɑ kɛ kʋkpɑmǝŋ hɛkʋ.
18Amɑ ye pɑ kpɛsɑ-kʋɣʋ kʋ lonte tɑɑ, ɩlɛ tǝnɑ nyǝ́mɑ kpɛɛsɩ sɩ mpɛ pɑ tɑɑ nɑɑkɩ-kʋ.
19Yʋlʋ ɩsɩɩ mpʋ tǝnɑɣɑ ntɛ́. Kʋfɑlʋ kɑ́ kʋlǝnɑ ɩ lonte tɑɑ.
20Ɩsɔ ɩɩ lɔɔkɩ tɑmpɑnɑ tǝŋlʋ, pǝyele ɩ kɑɑ sǝnɑ ɩsɑɣɑlɑtʋ.
21Ɩsɔ tɛŋ ɩ́ yele nɑ ń woŋ, nɑ ń kpɑlǝsǝnɑ lɑŋhʋlʋmlɛ.
22Amɑ nyɑ́ kolontunɑɑ kɑ́ tɔɣɔnɑ fɛɛlɛ, nɑ pǝ́ yɔkɩ ɑsɑɣɑɑ tɛɛsɩ.
