Soopu 5

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Ɩlifɑsɩ sɩ: Soopu mɑ kɑpukɑ nɑ ń nɑ́ sɩ nɔɣɔlʋ kɑ́ cɔ-ŋ? Ɩsɔtɑɑ tillɑɑ nɑŋŋ nyǝ́mɑ tɑɑ ɑwe tɔɔ kɛ́ n kɑ́ kɛɛsǝnɑ?

²Lǝmɑɣɑsɛɛ fɛɩ tʋ pɑ́ɑ́nɑ́ kʋɣɩ-ɩ kɛ́. Ɩlɛnɑ ɩsǝsɛɛmlɛ nɑ́ɑ́ kʋ́ kʋmɛlɛŋ.

³Mɑ nɑwɑ pǝ lɑkǝnɑ kʋmɛlɛŋ. Ḿpʋ́ɣʋ́ mɑ koolɑ kʋ tǝyɑɣɑ kɛ mpusi kɛ́ kpɑkpɑɑ sɩ:

⁴Nɔɣɔlʋ ɩ́ tɑɑ wɑɑsɩ kʋ piyɑ. Sɩ tɔm ɩ́ sɩ tǝnɑŋnɑŋ kɛ tǝhʋʋlɛ.

⁵Nyɔɣɔtʋnɑɑ ɩ́ tɔɣɔ kʋmɛlɛŋ kʋmtʋ. Pɑɑ nɑ sɔwɑ kɑlɑɑ wɛɛ tɔ, pɑ́ lɛɛkɩ-tɩ. Lɑŋlɑɑ ɩ́ kuu kʋ wɛnɑʋ.

⁶Kʋtɑkɛɛsǝm ɩɩ lɩɩkǝnɑ ɑtɛ. Pǝyele pǝ tɑɣɑ tɛtʋ tɛɛ kɛ́ wɑhɑlɑ nyɔɔkǝnɑ.

⁷Amɑ pǝ tʋ́ yʋlʋ kɛ́ sɩ ɩ́ tɔɣɔ wɑhɑlɑ, ɩsɩɩ mɑmɑcǝɣǝlɑsɩ kʋlʋɣʋʋ ɩsɔtɑɑ tɔ.

⁸Ye mɑɣɑ Soopu, Ɩsɔ kɛ́ mɑɑ tʋwɑ kpʋlʋɣʋ, nɑ mɑ́ pɛtɩ-ɩ mɑ tɔm.

⁹Ɩ kʋlɑpǝm tɔɔwɑɣɑ, yʋlʋ kɑɑ pǝsɩ pǝ cɛkǝnɑʋ, yɑɑ ɩ́ nyɩ pǝ nyʋɣʋ.

¹⁰Ɩsɔ yekinɑ nɑ tɛʋ nɩɩkɩ tɛtʋ tɔɔ, nɑ tɑwɑ nyɔɔkɩ.

¹¹Ɩ kʋsǝɣɩ mpɑ pǝ pɑsɑɑ tɔɣɔ, nɑ ɩ́ hɛɛsǝɣɩ lǝyɑɣɑ nyǝ́mɑ lɑŋɑ.

¹²Ɩ wɑkǝlǝɣɩ mpi ɑcilɑɣɑtʋ nyǝ́mɑ sɩɩkɩ sɩ pɑ lɑkɩ tɔ. Ɩ sǝŋsǝɣɩ pɑ kʋlɑpǝm kɛ pɑ niŋ tɑɑ.

¹³Ɩ kpɑɑkɩ nyǝntɑɑ nɑ pɑ ɑcilɑɣɑtʋ. Pɑ kpelikpekɑ lɑɣɑtʋ tɑsʋɣʋ ɩɩ wɑɑsǝɣɩ pʋlʋ.

¹⁴Ilim nɑ pǝ ɩsǝlɛ kɛ pɑ tutiɣi ɩsɩɩ sǝkpɛtʋɣʋ wɛɛ, nɑ pɑ́ hɑkǝɣɩ ɩsɩɩ ɑhoo yuwɑ.

¹⁵Amɑ Ɩsɔ nɑ́ lǝsǝɣɩ ɩcɑm kɛ sǝm tɑɑ, nɑ ɩ́ wɑɑsǝɣɩ-ɩ toŋ tʋ niŋ tɑɑ.

¹⁶Ɩ tʋɣɩ kʋnyɔntʋ tɑɑ kɛ́ tɛɛlʋɣʋ, nɑ ɩ́ tǝkǝɣɩ ɩsɑɣɑlɑtɑɑ tǝnɑ nɔɔsɩ.

¹⁷Wei ɩ ŋkpɑŋʋɣʋ Ɩsɔ hɔŋ tɔ, ɩ nɩɩ leleŋ kɛ́. Ɩlɛ tɑɑ kisi Toŋ tǝnɑ tʋ sɛɣɛsʋɣʋ.

¹⁸Ɩsɔ lɑkǝnɑ yʋlʋ tɔɔ kɛ́ hiŋ nɑ ɩ́ tʋ-ɩ kɔɔlɛ. Ɩnɩ ɩ kʋɣʋnɑ nɑ ɩ́ wɑɑsǝnɑ ɩ niŋ.

¹⁹Pɑɑ wɑɑtʋ wei kɛ́ ɩ yɑkɩ-ŋ wɑhɑlɑnɑɑ nɑ ɑsolɑ tɑɑ, nɑ ɩsɑɣɑtʋ nɑtǝlɩ tǝ kɑɑ mɑɣɑnɑ-ŋ.

²⁰Ɩ kɑ́ wɑɑsɩ-ŋ nyɔɣɔsɩ wɑɑtʋ. Nɑ ɩ́ yɑ-ŋ sǝm nɔɣɔ tɑɑ kɛ́ yoou tɑɑ.

²¹Pɑɑ pɑ cɑɣɑ nyɑ́ ɑcɑɣɑ pɩɩ kenti nyɑ́ tɔɔ kɛ́. N kɑɑ nyɑnɑ pʋlʋɣʋ wɑhɑlɑ wɑɑtʋ.

²²Nyɔɣɔsɩ nɑ wɑhɑlɑ pǝ tɔm kɑ́ lɑ-ŋ woŋɑ. Pǝyele n kɑɑ nyɑnɑ tɑɑlɛ wontu.

²³Pɩɩ kenti nyɑ́ tɑwɑ kɛ wɑkǝllɑɑ. Pɑɑ pɛɛ kʋlɔlɔɣɔnɑ, yɑɑ tɑɑlɛ wontu.

²⁴Alɑɑfǝyɑ kɑ́ wɛɛnɑ nyɑ́ tǝyɑɣɑ tǝnɑ tɑɑ, nɑ kpǝntɛ nɑtǝlɩ tǝ kɑɑ lɑŋ nyɑ́ kɑlɑkǝŋ tɑɑ.

²⁵Nyɑ́ piyɑ nɑ nyɑ́ lʋlʋɣʋ nyǝ́mɑ kɑ́ huki, ɩsɩɩ tɑwɑ tɑɑ nyɩɩtʋ.

²⁶N kɑ́ kpɑtǝlɩ teu kɛ tǝkuŋkuŋku nɑ pǝ́cɔ́ ń sʋʋ pʋ́ʋ́ɣʋ́. Teitei ɩsɩɩ tɔɣɔnɑɣɑ pɩɩkʋɣʋ nɑ pǝ́cɔ́ pɑ́ kʋ́ tɔ.

²⁷Tǝ pɛɛkɑɑ nɑ tǝ́ nɑ́ mpi tɔɣɔlɛ. Nyɑɣɑ pǝ wɛɛ sɩ ń nɩɩ-tɩ nɑ ń cɛkǝnɑ-tɩ.