ISƆBU 39

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹A yɛ̃́ sitɑ̃bɔɔ́ pɛí dìì mɔ̀nnɑ̀ɑ̀? Siyɔ́ɔ́ ɔ̃ nkuɔ̀nnɛ̀ kupɛitɛ́yonku kɑ̀ɑ yɛ̃́ɑ̀?

²Sì ɔ̃ɔ̃ púó kɛ́mmɔkɛ bɛtɑ̃̀ɑ̃̀bɛ̀ bɛ̀dɛ? A yɛ̃́ si pɛitɛ́ mɔ̀nnɑ̀ɑ̀?

³Sì ɔ̃ nkṹṹ dìì mɔ̀nnì kɛ bo pɛitɛ́ si bí, kɛ́om̀pɛ̀nɛ̀ kupɛitɛ́yonku.

⁴Siì bí ɔ̃ɔ̃ kótɛ́ kɛ́kpenkɛ kɛ́ítɛ́ mucèmmu, kɛ dɛ́tɛ́ kɛ tɛ̃́nkɛ bɑ́ɑ́ wɛ̃tɛní diyiè mɑrì bìtì si yɔbɛ̀ borɛ̀.

⁵We mpìtɛ́ dikpɑ́ɑ̀ kó musɑ̃mmɑrímú kɛ fĩ́ĩnko? We ǹtɔ̃̀tɛ disɑ̃mmɑrínnɑnni kó kuhɔ̃ũ?

⁶Míì dì duɔ́ ndikpɑ́ɑ̀ tɛdɔntɛ̀ kɛ̀ dì bo mbo, di kó diɑ̃rì tu mɛtĩ̀ɛ̃̀ nkó kɛtenkɛ̀.

⁷Di kpɛti í bonɛ̀ dihɛì kó kutoweku, ocɛ̃nti í kpɑɑ́ kɛ bo di pɛ́i.

⁸Dì firì yɛtɑ̃rɛ̀ ĩ́nkɛ̀ nkɛ kɛ wɑɑ̀ mmudiì, dì dɔ́ dɛ̀ tu timusũ̀ũ̀tì.

⁹Fɛhɑ̃ɑ̃tìnɑ̀ɑ̀fɛ̀ bo yie nkɑ̀ɑ fɛ̀ pĩ̀ńnɛ̀ mutɔ̃mmɑ́ɑ̀? Fɛ̀ bo yie nkɛ́wentɛ́ dinɑɑdieɑ̀?

¹⁰A bo pítínnɛ́ fɛhɑ̃ɑ̃tìnɑ̀ɑ̀fɛ̀ kuhɔ̃ũ kɛ̀ dɔ̀ fɛ̀ɛ duɑɑ̀? Fɛ̀ bo ndɛri dikɑ̃ɑ̃̀ kɛ dɑ tũ nkɛ duɔ̀ ipɛ̃nɑɑ̀?

¹¹A bo yĩ́ fɛ wɛ̃rímú dɛu kɛ́ n fɛ̀ tɑ̃́ɑ̃̀? A bo yie nkɛ́ fɛ̀ duɔ́ nhɑ tɔ̃mmɑ́ɑ̀?

¹²A bo ntɑ̃́ kɛ dò nfɛ̀ bo kɔtɛ kɛ́wɛ̃tɛnɑ́ɑ̀? A bo fɛ̀ toú ntidiitì kɛ dɔ̀ fɛ̀ɛ ti kpɛ̃nnɑ́ɑ̀?

¹³Fɛcònfɛ̀ fɛ̀tì pĩntimù í yóù, kɛ̀ fɛ fɛ̀tì mɔ̀kɛ ticìtì yɔɔ̀ntì mɛsɑ̀ɑ̀.

¹⁴Fɛ̀ nɛ́ ɔ̃ nkɛ̀ fɛ̀ dɔú nfɛ yiè mmubirímú miɛkɛ fɛ̀ pɛ̃ɛ̃tɛ́mu, kɛ̀ yɛ̀ nduɔ́ dɛndɛ mubirímú tonnìmù miɛkɛ.

¹⁵Fɛ̀ ketɛ́ kɛ bɑ́ nyɛ̃́ kɛ dò nhonìtì bo nɑ kɛ́ yɛ̀ nɑ̀, yoo kuwɑnwɑnkù mɑkùu yɛ̀ pɔ̀mmu.

¹⁶Fɛ̀ ɔ̃ɔ̃ í ndɑkɛ fɛ bí kpɛ́í, dɛ̀ ketɛ́ kɛ bɑ́ ndò nfɛɛ̀ ì te. Fɛ̀ ɔ̃ɔ̃ í nyĩɛ̃̀kù fɛ̀ bo ɔumɛ̀ dɛtetìrɛ̀.

¹⁷Mí nKuyie n yí fɛ̀ pɑ̃ mɛciì, n yí fɛ̀ duɔ́ mɛyɛ̀mmɛ̀.

¹⁸Kɛ̀ fɛ̀ mɛ nyìtɛ́ kɛ cokɛ́, fɛ̀ bɑ́ mbɔti o sɑ̃ndèètì nɛ̀ o sɑ̃ntɛ̀ bɛ kpɛti.

¹⁹Fɔ̃́ɔ̃̀ duɔ́ ntɛsɑ̃ntɛ̀ muwɛ̃rímú kɛ dɑ̀tínnɛ́ tɛ fɔ̃̀níí dibùɑ̀?

²⁰Fɔ̃́ɔ̃̀ te kɛ̀ tɛ̀ ɔ̃ɔ̃ puu dicɑ́dɔ́nnì kɔ̃mɑɑ̀? Fɔ̃́ɔ̃̀ te kɛ̀ tɛ dɑbònnì yìɛ̀ kɛ duò tikɔ̃m̀bùɔ̀tɑ̀ɑ̀?

²¹Tɛ̀ ɔ̃ɔ̃ potɛ́ yɛtɑ̀rɛ̀ kubiriku kɛ̀ diwɛ̀ì ntɛ̀ bomu tɛ wɛ̃rímú kpɛ́í, kɛ̀ tɛ̀ nwetóo tɛ dootitɔbɛ̀ kó ditĩ̀nnì.

²²Tɛ̀ í yɛ̃́ bɛ̀ tu dɛ̀ kufɔ̃wɑɑ́, tɛ bùɔ̀tì í duò, tɛ̀ ɔ̃ɔ̃ í nyɑ̀ kukpɑ̀rìseú kɛ́botirɛ.

²³Kɛ̀ didoò kuɔ̀ ntɛ ĩ́nkɛ̀, kɛ̀ mɛkpɑ̃mbii nkó kupíɛ́ tu níɛ́ɛ́.

²⁴Kɛ̀ tɛ̀ pùtìnɛ̀ muwɛ̃rímú kɛ fĩmmú mɛcɑ̃ɑ̃, kɛ̀ ditɑ̃tɛheù kuɔ́ ntɛ̀ bɑ́ɑ́ nɑ kɛ́cómmú.

²⁵Kɛ̀ ditɑ̃tɛheù kuɔ́ ntɛ̀ dɔ̀: Toò! Kɛ́nkpɑɑ́ kɛ díɛtirì kɛ́keè mudoò kó kunɔ́ú, nɛ̀ bɛhɑ̃ɑ̃pɔ̀nkperíbɛ̀ pɛ́ikomɛ̀ nɛ̀ mudoò kó kutoweku.

²⁶Fɔ̃́ɔ̃̀ kó mɛciì nhɔ̃ nte kɛ̀ fɛtúúfɛ̀ɛ pĩntɛ fɛ fɛ̀tì kɛ́cuó nkubɑkù cɑ̃̀nku bíɛ́kɛ̀ kɛ bo yɛ̀ tifɛ̀tì pɑ̀ntɑ̀ɑ̀?

²⁷Fɔ̃́ɔ̃̀ ɔ̃ɔ̃ duɔ́ ndinùù kɛ̀ fɛ̀ɛ ɛitɑ̀ɑ̀? Fɔ̃́ɔ̃̀ ɔ̃ nte kɛ̀ fɛ̀ɛ dekɛ yɛtɑ̃rɛ̀ yómmɛ̀ kɛ ceé nfɛ yĩ́ɛ̃́ntɑ̀ɑ̀?

²⁸Fɛ̀ ɑ̃ yɛpèrɛ̀ ĩ́nkɛ̀ nkɛ, fɛ̀ wentí yɛpèrɛ̀ yómmɛ̀ mmɛ, yɛpèrɛ̀ yómmɛ̀ mɛɛ̀ tu fɛ kó tɛcɛ̃kpetɛ̀.

²⁹Fɛ̀ ɔ̃ nkɛ mboní kɛ́pɑɑtɛ́ fɛ diì, fɛ̀ ɔ̃ mboní dɛdɛ́tirɛ̀ ndɛ kɛ́yɑ̀ fɛ̀ bo di mù.

³⁰Fɛtúúfɛ̀ bí yɔ̃̀ mmɛyĩ̀ĩ̀ mmɛ, dɛcírɛ̀ borɛ̀ fɛ̀ ɔ̃ ndɛ́ mbo.