Soopu 20

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Ḿpʋ́ɣʋ́ Nɑɑmɑ tʋ Sofɑɑ tɔmɑ Soopu sɩ:

²Nyɑ́ tɔm wɑkǝlɑ mɑ lɑŋlɛ, ɩlɛnɑ pɩɩ lɑkɩ-m lɔŋ sɩ mɑ́ cɔ.

³Mɑ nɩɩwɑ ɩsǝnɑ n kɑlǝnɑ-m nɑ ń tʋʋ-m tɔ. Ɩlɛ mɑ nyǝmɑ́ kʋcɔcɔtʋ kɛ mɑ lǝmɑɣɑsɛɛ tɑɑ.

⁴Mɑ nyǝmɑ́ teu sɩ pǝ kpɑɣɑʋ hɑtoo kʋyɑŋku Ɩsɔ sɩɩ yʋlʋ kɛ ɑtɛ tɔ,

⁵ɑsɑɣɑɑ ɑkɑɩtʋ ɩɩ leeliɣi. Pǝyele pɑ ɑŋmɑɑlɑ nɑ́ wɛ tǝnyɔsɩ kɛ́.

⁶Pɑɑ ɩsɑɣɑʋ nyʋɣʋ kɑ́ kʋlɩ ɩsǝnɑ, nɑ kʋ tokiɣinɑ ɩsɔŋmʋntʋ.

⁷Ɩ tɛɛsǝɣǝnɑ kɛ́ ɩsɩɩ ɩ mɑɣɑmɑɣɑ ɩ pʋntʋ. Ɩlɛnɑ mpɑ pɑ nɑɑkɑɣɑ-ɩ tɔ pɑ́ pɔɔsǝɣɩ sɩ: Ɩ tɛmnɑ-we?

⁸Ɩsɑɣɑʋ sɑɑlǝɣɩ yem kɛ́ ɩsɩɩ toosee. Pɑ kɑɑ tɑsɑ-ɩ nɑʋ.

⁹Mpɑ pɑ nɑɑkɑɣɑ-ɩ tɔ, pɑ kɑɑ tɑsɑ-ɩ nɑʋ. Pǝyele ɩ kɑɑ wɛɛ ɩ lonte tɑɑ.

¹⁰Ɩsɑɣɑʋ kɑ́ mǝŋnɑ wɛnɑʋ ŋku ɩ kɑ hikinɑ mʋsʋŋ tɔɣɔ kʋ nyǝ́mɑ. Nɑ kʋnyɔntʋnɑɑ nɑ́ɑ́ wɑtɩ ɩ piyɑ.

¹¹Ɩ kɑ wɛnɑ ɩfepile kɛ́ nɑ ɑlɑɑfǝyɑ. Amɑ ɩ kɑ́ kpɛnnɑ pǝ tǝnɑɣɑ mpʋ nɑ ɩ́ sʋʋnɑ pʋ́ʋ́ɣʋ́.

¹²Ɩsɑɣɑtʋ kɑ wɛ-ɩ leleŋ kɛ́ tǝkʋlʋŋkʋlʋ. Ɩlɛnɑ ɩ́ ŋmɛsɩ-tǝɣɩ ɩ nsǝmlɛ tɛɛ.

¹³Nɑ ɩ́ kisi tǝ lɔʋ nɑ ɩ́ ŋmɛsɩ-tǝɣɩ teu, nɑ tǝ́ wɛ ɩ tɑntɑhɑɑʋ tɑɑ.

¹⁴Amɑ ɩ tɔɣɔnɑɣɑ ŋkɛ kɑ leleŋ kɑ́ pǝsɩ pɑɑsǝlɛ sɔtʋ kɛ ɩ lotu tɑɑ.

¹⁵Ɩ kɑ lipɑ lɛlɑɑ wɛnɑʋ ŋku tɔ, Ɩsɔ kɑ́ cɑɑlɩ-ɩ nɑ ɩ́ tɔ-kʋ nɑ ɩ nɔɣɔ.

¹⁶Mpi ɩ mʋʋkɑɣɑ tɔ pǝ kɛ́ pɑɑsǝlɛ sɔtʋ kɛ́, nɑ ntɩ tɩɩ kʋnɑ-ɩ.

¹⁷Ɩsɑɣɑʋ kɑɑ tɑsɑ nɑʋ kɛ nɑɑlǝm nɑ tɩɩŋ nim mpi pǝ kpeŋ ɩsɩɩ pusi nɑ lɔɔŋ tɔ.

¹⁸Wɛnɑʋ ŋku ɩ tɑɑtɑɑ nɑ ɩ́ konti hɑŋɑɣɑ nɑ ɩ́ hiki tɔ, ɩ kɑɑ tɔɣɔ-kʋ, ɩ kɑ́ mǝŋnɑ-kʋɣʋ.

¹⁹Mpi tɔ, ɩ muɣulɑ ɑcɑmɑɑ nɑ ɩ́ lɔ-wɛ. Ɩ́ lɛɛkɑ pɑ kutuluŋ, ɩ tɑ ŋmɑ-wɛɣɛ pɑɑ kʋlʋmʋɣʋ.

²⁰Ɩ wɛnɑʋ luluɣu kɑ wɛ sɔɣɔntʋ. Ɩ kɑɑ pǝsɩ nɑ ɩ́ kpɑ pǝ tɑɑ pʋlʋ.

²¹Ɩsɑɣɑʋ liki pǝ tǝnɑɣɑ pʋlʋpʋ ɩɩ fitiɣi. Amɑ ɩ lɑŋhʋlʋmlɛ kɑɑ leelinɑ.

²²Hɑɣɑnɑɣɑ ɑnɑɑm tɑɑ kɛ́ lɑŋwɑkǝllɛ kɑ́ tii ɩ tɔɔ, pǝ tǝnɑ pɩɩ tʋ-ɩ wɑhɑlɑ kɛ́.

²³Wɑɑtʋ wei ɩnɩ ɩ kɑ́ liki mpʋ tɔɣɔ Tɑcɑɑ kɑ́ tisi ɩ tɔɔ kɛ́ ɩ pɑ́ɑ́nɑ́ kɔkɔ, ɩsɩɩ tɛʋ tɔmpɛɛ, nɑ ɑ́ yɑɣɑ-ɩ ɩsɩɩ nyǝmɑ́.

²⁴Ye ɩ fitɑ nyǝɣǝlʋɣʋ mɑɣɑmɑɣɑ yoou wontu, nyǝɣǝlʋɣʋ kʋsɛɛmʋɣʋ tɔɔʋ kɛ pɑɑ tɔnɑ-ɩ nɑ pɑ́ yɑɣɑ-ɩ.

²⁵Ɩ kpɛsɑ kɔkɔ nyǝmlɛ nte tǝ tʋlɑ ɩ tɔnʋɣʋ nɑ ɩ hɔɔlɛ tɔ. Ɩlɛnɑ sǝm tii ɩ tɔɔ kɛ́ kpɑkpɑɑ.

²⁶Sǝkpɛtʋɣʋ kɛ ɩ tɛŋnɑ, nɑ kɔkɔ ŋkɑ nɔɣɔlʋ tɑ lu tɔ kɑ́ nyɑɣɑ ɩ mɑɣɑmɑɣɑ. Ɩlɛnɑ kɑ́ kpɛŋnɑ mpi pǝ kɑɑsɑ ɩ tɛ tɔ.

²⁷Ɩsɔtɔnʋɣʋ ɩ́ kɛɛlɩ yʋlʋ ɩnɩ ɩ ɩsɑɣɑtʋ tɔɔ, nɑ tɛtʋ nɑ́ɑ́ kʋlɩ ɩ tɔɔ.

²⁸Ɩsɔ pɑ́ɑ́nɑ́ kɑ́ kuu ɩ tǝyɑɣɑ wɛnɑʋ tǝnɑɣɑ, ɑ kʋyɑkʋ wule kɛ́ ɩsɩɩ lʋm.

²⁹Ɩsǝnɑ Ɩsɔ sɩɩwɑ ɩsɑɣɑlɑtɑɑ sɩ pɑɑ tɛɛsǝnɑ tɔɣɔlɛ.