Soopu 34

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Ḿpʋ́ɣʋ́ Ɩlihu tɑsɑ yɔɣɔtʋɣʋ sɩ:

²Lǝmɑɣɑsɛɛ nyǝ́mɑ mɛ, ɩ́ nɩɩ mɑ kʋyɔɣɔtʋtʋ, nyǝntɑɑ mɛ ɩ́ ke ŋkpɑŋŋ.

³Pǝ tɑɣɑ pʋlʋ, ŋkpɑŋʋɣʋ nɩɩkǝnɑ tɔmnɑɑ, ɩsɩɩ nsǝmlɛ nɩɩkʋɣʋ tɔɣɔnɑɣɑ leleŋ tɔ.

⁴Tǝ́ lǝsɩ tɑ́ tǝɣɩ mpi pǝ siɣisɑɑ tɔ. Tǝ́ cɛkǝnɑ tɑ́ tɑɑ kɛ́ mpi pǝ wɛ teu tɔ.

⁵Soopu sɩ: Mɑ siɣisɑɑ kɛ́. Amɑ Ɩsɔ pɛŋɩ-m tɑmpɑnɑ.

⁶Pɑɑ nɑ mɑ tɑmpɑnɑ tǝŋʋɣʋ tɔ, pɑ nyǝnǝɣɩ-m pɔpɔtʋ kɛ́. Anɩ mɑ tɑ pǝntɩ. Pǝyele mɑ hiŋ fɛɩ wɑɑʋ.

⁷Yʋlʋ nɔɣɔlʋ ɩ fɛɩ ɩsɩɩ Soopu nɑ ɩ́ nyɔɔkɩ kʋtʋɣʋ kɛ lʋm tǝlɛ.

⁸Nɑ ɩ́ tɔŋ mpɑ pɑɑ tǝŋǝɣɩ siɣisuɣu tɔ pɑ kpekǝle tɑɑ, nɑ ɩ́ nɑ ɑsɑɣɑɑ pɑ́ kɑɑkɩ mpɑɑʋ.

⁹Hɑlǝnɑ ɩ́ tɔŋ sɩ pɑɑ yʋlʋ cɑɑ sɩ ɩ́ wɛɛ Ɩsɔ kɛ́ teu, weɣe ɩ wɑɑkɩ pǝ tɑɑ.

¹⁰Lǝmɑɣɑsɛɛ nyǝ́mɑ mɛ ɩ́ nɩɩ mɑ tɔm Ɩsɔ ɩɩ lɑkɩ kɑwɑlɑɣɑ. Pǝyele Tomɑ tǝnɑ tʋ ɩɩ lɑkɩ mpi pǝ tɑ siɣisi tɔ.

¹¹Mpi yʋlʋ lɑpɑ tɔɣɔ ɩ lɛɛtǝɣɩ-ɩ. Ɩ fɛlǝɣɩ pɑɑ wei kɛ́ ɩsǝnɑ pǝ mʋnɑɑ tɔɣɔ.

¹²Aɑɩ yoo, tɑmpɑnɑ tɔɔ, Ɩsɔ ɩɩ lɑkɩ ɩsɑɣɑtʋ. Tomɑ tǝnɑ tʋ ɩnɩ ɩɩ wɑkǝlǝɣɩ siɣisuɣu.

¹³Ye pɩɩ wɛ mpʋ, ɑwe cɛlǝnɑ-ɩ tɛtʋ sɩ ɩ́ pɑɑsǝnɑ-tɩ? Yɑɑ ɑwe tʋ-ɩ sɩ ɩ́ pɑɑsǝnɑ ɑntulinyɑ tǝnɑ?

¹⁴Ye Ɩsɔ kɑ hʋʋkɑɣɑ ɩ tɩ tɔm tike, ɩ kɑ mʋ ɩ feesiŋ kɛ yǝlɑɑ kiŋ.

¹⁵Tɔfɔ weesuɣu nyǝm tǝnɑ kɑ sǝpɑ tɔm kʋlʋm tɔɔ kɛ́, nɑ yʋlʋ pǝsɩ tɛtʋ.

¹⁶Soopu ye n wɛnɑ lɑɣɑtʋ, ke ŋkpɑŋŋ nɑ ń nɩɩ mɑ tɔm.

¹⁷Wei ɩ kɛ́ siɣisuɣu kolontu tɔ, ɩ kɑ́ pǝsɩ nɑ ɩ́ tɔkɩ tɛtʋ nɑ? Ɩlɛ ɩsǝnɑɣɑ nyɑ́ mɑɣɑsǝɣɩ sɩ ń kʋ Siɣisilu Toŋ tʋ tɔm?

¹⁸Ɩ tike ɩ wɛnnɑ mpɑɑʋ sɩ, ɩ́ yɑɑ ɑwulɑɑ sɔsɑɑ sɩ ɑsɑɣɑɑ nɑ ɑwulumpiyɑ sɩ wɑkǝllɑɑ.

¹⁹Ɩsɔ ɩɩ fɑɣɑsǝɣɩ ɑwulumpiyɑ. Pǝyele ɩɩ pɑɑsǝɣǝnɑ liɣitee nyǝ́mɑ, nɑ pǝ́ kǝlɩ kʋnyɔntʋnɑɑ. Mpi tɔ, pɑ tǝnɑ pɑ kɛ́ ɩ niŋ kʋlɑpǝm kɛ́.

²⁰Sɔsɑɑ sǝkɩ kɛ́ nɑ pǝ́ sɑɑlǝɣɩ, ɑhoo tɑɑ kɛ́ pɑ sǝkɩ kpɑkpɑɑ. Pǝyele pɑ kpɛsǝɣɩ ŋmɑkǝllʋ kɛ́ tǝhɛɛ.

²¹Ɩsɔ nyǝnǝɣɩ yʋlʋ mpɑɑŋ tǝnɑɣɑ, nɑ ɩ́ nɑɑkɩ ɩ tɔntɛ.

²²Sǝkpɛtʋɣʋ yɑɑ ɑtɛtǝlɛ nɑtǝlɩ tǝ fɛɩ nte tǝ tɑɑ ɑsɑɣɑɑ pǝsǝɣɩ nɑ pɑ́ ŋmɛlɩ tɔ.

²³Ɩsɔ pɑɑ fɛɩnɑ sɩ ɩ́ pɑɑsǝnɑ yʋlʋ nɑ pǝ́ leeli nɑ pǝ́cɔ́ ɩ́ yɑɑ-ɩ hʋʋlɛ.

²⁴Pɑɑ ɩ tɑ feŋ toŋtʋnɑɑ, ɩ wɑkǝlǝɣɩ-wɛɣɛ, nɑ ɩ́ lɛɛtɩ pɑ lonɑ tɑɑ kɛ́ kʋfɑmɑ.

²⁵Mpi tɔ, ɩ nyǝmɑ́ pɑ kʋlɑpǝlɛ kɛ́. Ahoo kɛ ɩ kʋsǝɣɩ-wɛ nɑ ɩ́ tǝlǝkɩ-wɛ.

²⁶Nɑ ɩ́ mɑkɩ-wɛ ɩsɩɩ ɑsɑɣɑɑ, nɑ yǝlɑɑ nɑɑkɩ.

²⁷Pǝ tɑɣɑ pʋlʋ, pɑ kisɑ-ɩ kɛ́, pɑ tɑ pǝsɩ nɑ pɑ́ cɛkǝnɑ ɩ mpɑɑŋ.

²⁸Pɑ lɑpɑ nɑ kʋnyɔntʋnɑɑ nɑ wɑhɑlɑ nyǝ́mɑ wii nɑ Ɩsɔ nɑ́ɑ́ nɩɩ.

²⁹Ye Ɩsɔ hɑwɑ nɔɣɔlʋɣʋ hɛɛsʋɣʋ ɑwe kɑ́ kʋ pʋntʋ tɔm? Ye ɩ tɑkɑ ɩ ɩsɛntɔɔ, ɑwe nɑ-ɩ? Ɩnɩ ɩ feŋiɣinɑ piitimnɑɑ nɑ yǝlɑɑ pɑ tɔɔ.

³⁰Ɩ lɑkɩ ḿpʋ́ɣʋ́ sɩ ɩsɑɣɑʋ ɩ́ tɑɑ tɔɣɔ kɑwulɑɣɑ nɑ ɩ́ pǝsɩ ɩsɩɩ kɑtɔkɑ kɛ yǝlɑɑ.

³¹Ye pʋntʋ heelɑ Ɩsɔ sɩ: Pɩɩ tʋsɑ-m kɛ́, mɑ kɑɑ tɑsɑ ɩsɑɣɑtʋ kɛ lɑpʋ.

³²Mɑ pǝntɑɑ kɛ́, ɩlɛ Ɩsɔ sɛɣɛsɩ-m. Mɑ lɑpɑ mpi pǝ tɑ siɣisi tɔɣɔ, ɩlɛ mɑ kɑɑ lɛlɩ.

³³Ɩsɩɩ Soopu, n kisuɣu nti Ɩsɔ sɩɩwɑ tɔ. Mpʋ tɔ, n mɑɣɑsǝɣɩ sɩ pǝ wɛɛ sɩ Ɩsɔ ɩ́ tʋ pʋntʋ kɛ sɑlǝkɑ? Timpi pǝ wɛɛ sɩ nyɑ́ mɑɣɑsǝɣǝnɑ nɑ ń sɩɩkɩ pǝ tɑɣɑ nɔɣɔlʋ tɔ, hʋlɩ-tʋɣʋ nyɑ́ nyǝm.

³⁴Amɑ yǝlɑɑ mpɑ pɑ wɛnɑ hʋwɛɛ tɔ, nɑ lǝmɑɣɑsɛɛ nyǝ́mɑ tǝnɑ, mpɑ pɑ nɩɩkɩ mɑ tɔm tɔ pɑɑ heeli-m sɩ:

³⁵Soopu yɔɣɔtǝɣɩ kɛ́, ɩ tɑ nyɩ pʋlʋ, yɑɑ ɩ fɛɩnɑ lǝmɑɣɑsɛɛ.

³⁶Soopu mɑɣɑsʋɣʋ ɩ́ tɑɑ sɩɩ tǝnɑɣɑ. Mpi tɔ, ɩ tɔm kʋcɔcɔtʋ wɛ kɛ́ ɩsɩɩ yǝlɑɑ mpɑ pɑ tɑ siɣisi tɔ.

³⁷Pǝ tɑɣɑ pʋlʋ, ɩ kʋlǝɣɩ Ɩsɔ tɔɔ, nɑ pǝ́ sɔɔsǝɣɩ ɩ ɩsɑɣɑtʋ tɔɔ. Hɑlɩ ɩ kɑ́ tɛɛsǝnɑ sikɑ tʋɣʋ kɛ́ tɑ́ tɑɑ.