Hiobe 39

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Kâte noniŋ jaŋe mo dameŋko motec rocjopaeŋgopieŋ i go moc manakomec me? Me kâte bulimakao jaŋe motec rocjopahapie moc honec‐jopaekic?

²Jaŋe mosa wezimuc kiwec‐jopa juku motec rocjopaeŋgopieŋ, go irec dameŋ moc manakomec me?

³Jaŋe waha fohuc motec rocjoparâ izia mocwâc âke mâteŋ‐jopaekac.

⁴Eme motec jaŋe neŋgoc mamac jaŋehec kâteo juhuc soka sanaŋ erâ behec‐jopa wiseeŋgopieŋ.

⁵“Mozi kâte doŋgi rambaŋko râec‐jopawec, me mozi firuec‐jopame kosa rac warec eeŋgopieŋ?

⁶Noni hâcne mâreŋ burocnezi fic hae‐jeŋic eocte ira râec‐jopapo, erâ wâc nonizia mana‐jarepe hâwec wâneŋko jueŋgopieŋ.

⁷Jaŋe hae fânâŋ sâko‐jeŋichec dic bajareeŋgopieŋ, ehame ŋic ŋoŋere gie baniŋte moczi moc sâcne bâmâteŋ‐jopaocmu.

⁸Tiki mâreŋzi nânâ opâ bâfua‐jareekac, jaŋe ira hâcne juhuc sopâc kecɋaŋ biaŋne bâfuaniŋte babasa gie baeŋgopieŋ.

⁹“Â kâte bulimakao momori jaŋe gore gie sâcne baniŋmu, me ŋafeo gore sapaoa sâcne domaniŋmu me?

¹⁰Go bulimakao iŋucne jaŋe kioŋ râe‐jaretec mâreŋ bâbâfâuc sâqe sâcne fâreniŋmu, me giegao râec‐jopatec mâreŋ bambanʒaŋ sarac i wâc sâcne fâreniŋmu me?

¹¹‘Jaŋe tâpiri sâko‐jeŋichec,’ go iŋuc muhuctecne gie ŋemâcne mujaretec sâcne bagareniŋmu me?

¹²Jaŋe qa roro dameŋko nânâ wiacge sâcne baware‐gareniŋmu, me jacgoŋ bâbâmârâŋ tomaonec hândâŋne ro nusec sâcne egareniŋmu me?

¹³“Qera e fafakec‐ticne fâro jaha fucfuc qaekac, erâ ine sifu qeʒo iŋucne furuc furuc qahuc sawao mi raekac.

¹⁴E hândâŋ‐ticne mâreŋ nuruŋko râeekac, â sohoŋ hehetaniŋ hândâŋ‐ticne e ine taicko ŋehuc hoticnezi hâroŋkeha juku âteʒuekac.

¹⁵Qera e, ŋic me qowi wiac jaŋe fisirâ âtenʒaŋneniŋmu, iŋuc mi muhuc sohoŋ hehetaniŋ‐ticne kosa râeekac hâcne.

¹⁶Eme juku âteʒume hone jauŋ mi ecneekac, ehuc hândâŋ râeocte ʒâic manaekac irec mocwâc mi manasuekac.

¹⁷Noni hâcne qera maŋmutuc bâfuapore iŋuc eekac, no maŋɋârâŋ moc mi bâfuacnepo.

¹⁸Gagasac‐ticne ine hâhâwicne jâmbâŋ, irec ŋic â qâto wise‐nâreekac.

¹⁹“O Hiobe, becâsic tâpiri‐jeŋic i goki moc râe‐jaremeŋ, me upe gere‐jeŋic i goki bâfua‐jaremeŋ me?

²⁰Goki mujaretec hâpic gisic jaŋe iŋucne tara he tara he raeŋgopieŋ, me masu fura qapie ŋic ŋoŋe hâwic‐ŋopaekac me?

²¹Jaŋe tâpiri‐jeŋicte manapie feha mejeŋiczi mâreŋ fârâeŋgopieŋ.

²²Jaŋe boc mi hâwic‐jopaekac, â ʒikare erâ wâc mi wiseeŋgopieŋ.

²³Rufâc‐jeŋic jaŋe ʒikare wiac bajueŋgopieŋ izi fânâŋkehuc ʒoaŋko bâricneekac.

²⁴Becâsic jaŋe tâpiri wânʒâŋ‐jeŋichecte gagasac jaha raeŋgopieŋ, ʒikare qeŋ dâŋeme mocwâc niniŋkerâ sâcne mi domaniŋmu.

²⁵Qeŋ dâŋeme sâc masu fura qaeŋgopieŋ, erâ taicko rahuc ʒikare âsu fâreeŋgopieŋ, ehuc momori micne jaŋe dâŋ mutâcne‐jarepie manaeŋgopieŋ.

²⁶“Goki piʒu piʒu jaŋe furuc furuc qaqare fuŋne qazu‐jaremeŋte fafakec‐jeŋic mâreŋ juwicpe qaratieeŋgopieŋ me?

²⁷Me tucwipe sâko jaŋe sareŋ‐jeŋic hozi‐jeŋicko baniŋte gore dâŋte woŋec moc jueŋgopieŋ me?

²⁸Aricne, jaŋe jâc ʒoricnao fic hae baeŋgopieŋ, ehame jâcbotâŋ susukune izi fic hae sanaŋ‐jeŋic eekac hâcne.

²⁹Eme irecnec fahare sâohuc nânâ qowi bâfuaniŋte wosaŋeŋ gie baeŋgopieŋ.

³⁰Ehuc wiac âsu gârecnezi fârec‐jopame nâniŋte tumaŋneeŋgopieŋ, â motecfâc‐jeŋic jaŋe ine qowi socnehec nâeŋgopieŋ.”