Soopu 7

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Yʋlʋ wɛɛʋ kɛ ɑtɛ cǝnɛ wɛɛ kɛ́ ɩsɩɩ yoolu. Ɩlɛnɑ ɩ kʋyɛɛŋ nɑ́ɑ́ wɛ ɩsɩɩ wei ɩ lɑkɩ tǝmlɛ nɑ pɑ́ fɛlǝɣɩ-ɩ tɔ.

²Ɩ wɛ teitei kɛ́ ɩsɩɩ yom pɛɛkʋɣʋ ɩsotom sɩ ɩ́ hɛɛsɩ, yɑɑ tǝmlɛ tʋ kʋnyɔntʋ tɑŋʋɣʋ ɩ kʋfɛlʋɣʋ tɔ.

³Mpʋ ɩnɩ tɔtɔɣɔ mɑ kpɑncoou ntɛ́ wʋsɑsɩ ɩsɔtʋnɑɑ. Ahoo wɑhɑlɑ nyǝnɑ kɛ pǝ cɛlɑ-m mɑ pɑɑ tete.

⁴Ye mɑ hǝntɑɑ, mɑ pɔɔsǝɣɩ mɑ tǝɣɩ sɩ, pǝlee kɛ́ mɑɑ kʋlɩ? Ye pǝ tɑ fe lɔŋ ɩlɛ hʋwɛɛ kpɑɩ nyǝnɑ cɔɔsǝɣɩ-m kɛ́, hɑlǝnɑ pǝ́ nyɑɑlɩ.

⁵Hiŋ tɔlɑsɩ nɑ sonsompee wɑɑsɑ mɑ tǝnɑ. Mɑ tɔnʋɣʋ yɑ́ pɔɣɔlɛɛ nɑ lʋm kpeŋ.

⁶Mɑ weesuɣu ɩɩ lɑɑ tɛm, ɩsɩɩ sɑɣɑtɑ lʋʋlʋ kpoŋkpoloku. Ye kʋ kpoŋkpontuɣu ɩ́ tɛmɑ kʋ tǝnɑɣɑ ntɛ́.

⁷Hɑɩ, Ɩsɔ tɑɑ sɔɔ sɩ mɑ weesuɣu kɛ́ heelim. Mɑ ɩsɛ kɑɑ nɑ kʋpɑntʋ tɔtɔ.

⁸Ɩsɔ wei ɩ feŋiɣi mɑ tɔɔ tɔ, pǝ kɑɑsɑ pǝcɔ ɩ kɑɑ tɑsɑ-m nɑʋ. Mɑɑ sɑɑlɩ yem nɑ ɩ́ pɛɛkɩ-m nɑ ɩ́ wɩɩ.

⁹Ɩsɩɩ ɩsɔŋmʋntʋɣʋ yɑɑkʋɣʋ nɑ kʋ sɑɑlɩ yem tɔ. Ḿpʋ́ɣʋ́ yʋlʋ tiiki ɑtɛtǝlɛ tɑɑ, ɩɩ tɑsǝɣɩ kpɑʋ.

¹⁰Pǝ́cɔ́ ɩɩ mǝlǝɣɩ ɩ tǝyɑɣɑ tɑɑ. Ɩlɛ kɛlɛ kɑɑ tɑsǝɣɩ-ɩ nyǝm.

¹¹Pǝ tɔɔ kɛ́ mɑ kɑɑ su. Mɑ lɑɑkɑlɩ pǝsɑɑ kɛ́. Pǝ wɛɛ sɩ mɑ́ yɔɣɔtɩ. Mɑ lɑŋlɛ kǝlɑ wɑkǝlʋɣʋ, mɑɑ hʋlɩ-tɛɣɛ.

¹²Mɑɣɑ teŋku, yɑɑ ɩ tɑɑ tʋm sɔsɔ, nɑ Ɩsɔ ń feŋiɣi mɑ tɔɔ kɛ́ mpʋ?

¹³Ye mɑ tɔmɑ sɩ mɑ kɑto kɑ́ hɛɛsɩ mɑ lɑŋlɛ, nɑ mɑ kʋhǝntʋɣʋ nɑ́ɑ́ kʋ́ mɑ pɑ́ɑ́nɑ́.

¹⁴Ɩlɛ n nyɑɑsɩ-m nɑ toosee ɑsɑɣɛɛ. N hʋlɑ-m yɑɑsinɑɑ, nɑ sɔɣɔntʋ sɔsɔɔntʋ kpɑ-m.

¹⁵Hɑɩ, ye n kɑ lǝlɑ mɑ luɣu tɛɛ, pɩɩ kǝlɑ-m teu. Sǝm lɑpɑ-m sɑnɑ, nɑ tɑɑsɩ tɛm kɑtɑtǝlɑɣɑ pǝnɛ.

¹⁶Pǝ nɩɩ-m, mɑ kɑɑ tɩɩ wɛɛ tɑm. Mɑ weesuɣu tɑ kɛ pʋlʋ, yele-m tǝhɛɛ.

¹⁷Yʋlʋ kɛ́ we nɑ ń tʋɣʋnɑ-ɩ mpʋ pǝ tɑkɑ? Nɑ ń keŋnɑ-ɩ mpʋ suwe?

¹⁸N cɔɔkɩ ɩ tɔɔ kɛ́ pɑɑ tɑnɑŋ ŋku. Nɑ ń mɑɣɑsǝɣɩ-ɩ pɑɑ wɑɑtʋ wei?

¹⁹Pǝlee kɛ́ n kɑ́ kʋsɩ nyɑ́ ɩsǝlɛ kɛ mɑ tɔɔ? Nɑ mɑ tɩɩ lipu ntɑɣɑmǝtɛ mɑɣɑmɑɣɑ?

²⁰Yǝlɑɑ tɔɔ cɔɔlʋ, ye mɑ pǝntɑɑ weɣe mɑ wɑkǝlǝnɑ-ŋ? Pepe tɔɔ kɛ́ n siɣisinɑ mɑ tɔɔ kɛ́ nyɑ́ nyǝmɑ́? Nɑ mɑ́ pǝsɩ-ŋ ɩsɩɩ sǝɣǝlɑ?

²¹Pepe tɔɔ kɛ́ n kɑɑ yele mɑ ɩsɑɣɑtʋ tɔm? Nɑ ń tɛɛ mɑ kʋpǝntʋɣʋ tɔɔ? Pǝ tɑɣɑ pʋlʋ, mɑɑ hǝntɩ nɔɔnɔɔ kɛ́ tɛtʋ tɑɑ. N kɑ́ pɛɛkɩ-m n kɑɑ nɑ-m.