Soopu 37

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Mɑ lɑŋlɛ cɛpǝnɑ tɛʋ ŋkʋɣʋ kɑtɑtǝlɑɣɑ kɛ́, hɑlǝnɑ mɑ lɑŋlɛ lɩɩ tǝ lonte tɑɑ.

²Ɩ́ ke ŋkpɑŋŋ nɑ ɩ́ nɩɩ Ɩsɔ nɔɣɔ tɑŋ. Ɩ́ welisi teu nɑ ɩ́ nɩɩ ɩ nɔɣɔ yuŋ.

³Ɩsɔtɔnʋɣʋ tǝnɑ tɑɑ kɛ́ ɩ nɔɣɔ nɩɩkɩ. Ɩlɛnɑ ɩ́ yele nɑ tɛʋ ŋmɛlǝsɩ, nɑ pǝ́ tɑlɑ tɛtʋ tǝnɑsɩ.

⁴Pǝlɛ pǝ wɑɑlɩ, ɩlɛnɑ tɛʋ holi nɑ Ɩsɔ nɔɣɔ nɩɩ. Ɩlɛ ɩ tɑ tɑsɑ tɛʋ ŋmɛlǝsʋɣʋ sǝŋsʋɣʋ kɛ wɑɑtʋ ɩnɩ.

⁵Ɩsǝnɑ Ɩsɔ yɔɣɔtǝɣǝnɑ ɩ nɔɣɔ tɔ, pǝ teu wɛ sɔɣɔntʋ. Tǝmɑ sɔsɔɔnɑ wenɑ tǝ tɑ nyɩ tɔɣɔ ɩ lɑkɩ.

⁶Ɩnɩ ɩ tɔŋnɑ sɩ tɛʋ tɔmpɛɛ kpɑɑkpɑɑcɑʋ*fɑ* ɩ́ nɩɩ tɛtʋ tɔɔ. Ɩlɛnɑ ɩ́ tɔ tɛʋ sɩ kʋlɛ kʋ́ nɩɩ nɑ pǝ́ kpɛŋnɑ tɛʋ sɔsɔɔʋ. tɔmpɛɛ kpɑɑkpɑɑcɑʋ. Pǝ wɛ teitei kɛ́ ɩsɩɩ kpɑɑkpɑɑcɑʋ nɑ pǝ́ hʋlʋmɑ mpʋ. Ɩlɛ tɔmpiisi hotiɣinɑ nɑ pǝ́ kɑɑkɩ ɑtɛɣɛ huwɑ.

⁷Ɩnɩ ɩ sǝŋsǝɣǝnɑ yǝlɑɑ tǝnɑ tǝmɑ. Ɩlɛnɑ pɑ́ cɛkǝnɑ sɩ ɩnɩ ɩ ŋmɑnɑ-wɛ.

⁸Tɑɑlɛ wontu mɑɣɑmɑɣɑ nɑ́ sʋʋkɩ tǝ tǝcɔɔsǝlɛ kɛ́, nɑ tǝ́ sʋʋkɩ tǝ tɑnɑ tɑɑ nɑ tǝ́ ŋmɛlǝɣɩ.

⁹Kɑcuculɑɣɑ nɑ́ lɩɩkǝnɑ ilim ntɔɣɔŋ kɛ́, nɑ wɑtʋ nɑ́ɑ́ lɩɩnɑ pǝ mpǝtǝŋ.

¹⁰Ye Ɩsɔ ɩ́ feesɑ lʋm tɔɔ, pǝ kii kɛ́ ɩsɩɩ tɔmpǝlɛ.

¹¹Ɩ hɑɣɑsǝɣɩ nikɑɣɑ kɛ ŋmʋntʋ tɑɑ kɛ́. Ɩlɛnɑ tɛʋ ŋmɛlǝsǝɣɩ ŋmʋntʋ ntɩ tǝ tɑɑ.

¹²Ɩnɩ ɩ yekinɑ nɑ ɩsɔŋmʋntʋ cɔɔkɩ nɑ tǝ́ lɑkɩ pǝ tǝnɑ mpi ɩ tʋ-tɩ tɔɣɔ tɛtʋ tɔɔ.

¹³Tɛʋ ŋkʋɣʋ Ɩsɔ hɔŋnɑ ɩ tɛtʋ ŋkpɑŋʋɣʋ. Kʋlʋmʋɣʋ ŋkʋɣʋ ɩ lɑkǝnɑ-tǝɣɩ kʋpɑntʋ.

¹⁴Soopu, ke ŋkpɑŋʋɣʋ kɛ tɔm tǝnɛ tǝ tɑɑ nɑ ń welisi nɑ ń cɛkǝnɑ Ɩsɔ tǝmɑ sɔsɔɔnɑ.

¹⁵N nyǝmɑ́ ɩsǝnɑ Ɩsɔ lɑkɩ ɩ tǝmɑ ɑnɩ, nɑ ɩsǝnɑ ɩ tisiɣi cɑlɑnɑɑ nɑ ɩsɔŋmʋntʋ tɑɑ tɔ?

¹⁶N cɛkǝnɑ ɩsǝnɑ ɩsɔŋmʋntʋ sǝŋɑ teitei tɔ? Pǝ kɛ́ Ɩsɔ wei ɩ kɛ́ nyǝntʋ mɑɣɑmɑɣɑ tɔ ɩ tǝmlɛ kɛ́.

¹⁷Ɩsǝnɑɣɑ pǝ lɑpɑ nɑ ye ilim mpǝtǝŋ heelim kʋhɑŋǝm mɑkɩ tɛtʋ tɔɔ, n nɩɩkɩ hɑŋɑɣɑ kɛ nyɑ́ wontu tɑɑ?

¹⁸N pǝsǝɣɩ nɑ ń lɑ ɩsɔŋmʋntʋ kɛ ɩsɔtɑɑ nɑ tǝ́ wɛɛ toŋ ɩsɩɩ nyǝɣǝlʋɣʋ tiŋ?

¹⁹Soopu hʋlɩ-tʋɣʋ nti tɩɩ heeli Ɩsɔ tɔ. Ɩlɛ tɩɩ tɑsǝɣɩ nɑtǝlǝɣɩ yɔɣɔtʋɣʋ kɛ tɑ́ kɑɑnyǝmtʋ tɔɔ.

²⁰Mɑɑ pǝsǝɣɩ nɑ mɑ kɛ́ɛ́sǝ́nɑ́ Ɩsɔ tɔɔ kɛ́ sɑɑ wei mɑ yɔɣɔtǝɣǝnɑ-ɩ tɔ. Pǝ fɛɩ sɩ mɑ́ heeli-ɩ nɑ pǝ́cɔ́ ɩ́ cɛkǝnɑ.

²¹Ye pǝ kɛɛsɑɑ nɑ ŋmʋntʋ tɑkɩ nyɑɑlǝm tɔɔ, pɩɩ tɑsǝɣɩ nɑʋ. Pǝ wɑɑlɩ, ɩlɛnɑ heelim mɑ́, nɑ pǝ́ kɛɛlɩ pǝ tɔɔ.

²²Ilim ntɔɣɔŋ tɔɔ kɛ́ nyɑɑlǝm lɩɩkǝnɑ nɑ pǝ́ wɛ ɩsɩɩ wʋlɑ. Ɩsɔ teu mpi pǝ cɔɔnɑ-ɩ tɔ, pǝ wɛ sɔɣɔntʋ.

²³Tɩɩ pǝsǝɣɩ nɑ tǝ́ kpǝtǝnɑ Tomɑ tǝnɑ tʋ sɔsɔ, nɑ tɑmpɑnɑ tǝŋlʋ ɩnɩ, ɩ kɛ́ siɣisuɣu tʋ́ kɛ́. Ɩɩ muɣuliɣi nɔɣɔlʋ.

²⁴Pǝ tɔɔ kɛ́ pǝ wɛɛ sɩ, yǝlɑɑ ɩ́ nyɑnɑ-ɩ. Amɑ ɩ pɑɑ fɛɩnɑ mpɑ pɑ yɑɑ pɑ tǝɣɩ lǝmɑɣɑsɛɛ nyǝ́mɑ tɔ.