Job 39

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Netuenan nu ve ke keenu ed-anak is leew he menge kambing? Nekevantey ke ve te ked-anak te menge selazeng?

²Ebilangen nu ve is menge vulan te keǥingayan dan taman te ked-anak dan? Netuenan nu ve ke keenu sikandan ed-anak?

³Edleku zan is ebeliliten taman te ebpekaanak dan.

⁴Emun edekelè en is anak dan diyà te sibsivayan, edhipanew heini ne kenè en edlikù.

⁵Hentei is nengelintau wey mekeuyayà is leew he asnu?

⁶Iyan a mibeǥey kandin te sibsivayan he egkeubpaan din; ibpeubpè ku ziyà te tanà he mibey-anan en.

⁷Ebpekeziyù heini te meǥurub he inged ne kenà egkesuat he ebuǥawen.

⁸Edriǥuriǥu heini ziyà te menge vuntud is ebpen-ahà te egketabtab din.

⁹“Igkepeterebahu nu ve is baka he simadun? Kenè be heini ed-awà diyà te tudil nu emun mezukilem?

¹⁰Egkehiketan nu ve heini ne igkeeradu nu ziyà te vevesukè nu?

¹¹Ebpekesarig ke ve te zesen din para egketerebahu zin is meveǥat he terebahu nu?

¹²Ebpekesarig ke ve kayi he edtiǥumen din wey edhekuten din is neraǥun pehendiyà te gunasà?

¹³“Utew mekempet he ed-ahaan is pakpak te ustrits emun edseripakpak, piru kenà heini ebperepeng te kekempet te pakpak te tulabung.

¹⁴Ed-ewaan te ustrits is impis din diyà te tanà su para meinit heini.

¹⁵Kenè din igkeipeng is kegkeǥieki etawa kegketekutaki zuen te leew he menge langgam.

¹⁶Mesipala sikandin te menge pispis din he henduen be te kenà kandin. Kenà sikandin egkeipeng he kela ke mehimu he wazà pulus te midheǥuan din.

¹⁷Su wazè ku sikandin beǥayi te ketau wey kedsavut.

¹⁸Piru emun lumbà te kebpelelaǥuy ne và din dà ed-engiti is kudà wey is ed-untud kayi.

¹⁹“Job, iyan ke ve mibeǥey te kudà te zesen? Iyan ke ve mibeǥey te keburey ziyà te lieg din?

²⁰Iyan ke ve nengelintau wey mekelingketew he iring te terapan ne wey zaan mekeherìhì te igkahandek te menge etew?

²¹Meviserviser heini he egkahiskahis te tanà, he ebpaahà te zesen din. Ne ebpelelaǥuy pehendiyà te edtebekan.

²²Wazè din igkahandek ne kenè din ebpeleǥuyan is tebek.

²³Edleletingkik wey edsinew is menge ǥumaan te ed-untud kandin.

²⁴Ebpengelivegbeg is eliyavuk tenged te keǥaan te kebpelelaǥuy zin. Ne kenè en egkesanggen emun ibpezaǥing is budyung.

²⁵Edherìhì emun egkezineg din is daǥing te vudyung. Minsan meziyù pa heini egketuusan din is tebek, ne egkezineg din is kulehian te edtetebek wey is mandar te menge peremandar.

²⁶“Iyan ke ve nenurù te dapay te kedlayang wey kedhendiyà te zivavà?

²⁷Iyan ke ve midsuǥù te kulaǥu te kedlayang wey kebaal te salag diyà te metikang he lugar?

²⁸Diyà ed-ubpà te zempilas is kulaǥu; is metikang he menge vatu ne iyan elesè din.

²⁹Dutun sikandin ebpememantew te egkehimu he edewiyen din, ne egkeehè din haazà minsan diyè dà sikandin te meziyù.

³⁰Emun duen egkeehè din he minatey ebeyaan din heini, ne edsupsupen te menge pispis din is lengesa kayi te minatey.”