Soopu 13

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Mpʋɣʋlɛ Soopu tɑsɑɑ sɩ: Mɑ tɛmɑ nti mɑ yɔɣɔtǝɣɩ tɔɣɔ nɩɩʋ nɑ mɑ ŋkpɑŋʋɣʋ, nɑ mɑ́ nɑ-tɩ nɑ mɑ ɩsǝpǝle, nɑ mɑ́ cɛkǝnɑ-tɩ.

²Mɑ mɑɣɑmɑɣɑ mɑ nyǝmɑ́ nti mǝ nyǝmɑ́ mpʋ tɔɣɔ, mǝ tɑ́ tɛɛ-m.

³Amɑ Tomɑ tǝnɑ tʋ Ɩsɔ kɛ́ mɑ yɔɣɔtǝɣǝnɑ nɑ mɑ́ hʋlǝɣɩ-ɩ mɑ kʋnyɔŋ.

⁴Mǝ kɛ́ ɑcɛsɑɑcɛsɑɑ fɛtɑɑ kɛ́, pɔpɔtʋ tike kɛ ɩ́ mɑɣɑsǝɣɩ.

⁵Ye ɩ́ kɑ sumɑ, ɩ́ kɑ nǝɣǝsǝnɑ lǝmɑɣɑsɛɛ nyǝ́mɑ ntɛ́.

⁶Ɩ́ ke ŋkpɑŋŋ nɑ ɩ́ nɩɩ mɑ́ kʋnyɔwiinɑ nɑ mɑ kʋyɔɣɔtʋtʋ.

⁷Kɑloolɑɣɑ nɑ tɔm kʋkɛkɛɛtʋ kɛ ɩ́ kɑ́ sɛɛnɑ Ɩsɔ tɔɔ?

⁸Ɩsɔ tɔɔ kɛ́ mǝ cɑɑkɩ sɩ ɩ́ sɛɛnɑ?

⁹Nɑ ye ɩ feŋɑ-mɛ ɩ kɑ́ sɑ-mɛ? Ɩsɔ tɑ́ kɛ́ yʋlʋ sɩ pɑ puɣusiɣi-ɩ.

¹⁰Ye mukɑɣɑ tɛɛ kɛ́ ɩ́ sɛɛkǝnɑ ɩ tɔɔ, ɩsɩɩ ɩ kɑlǝnɑ-mɛ.

¹¹Ɩ sɔsɔɔntʋ ɩɩ tilisiɣi mǝ pʋntʋ nɑ ɩ tɔm kpɑ-mɛɣɛ sɔɣɔntʋ sɔsɔɔntʋ?

¹²Mǝ kʋyɔɣɔtʋtʋ wɛ kɛ́ ɩsɩɩ tɔlʋmɑ. Nɑ mǝ kʋmɑɣɑsǝtʋ nɑ́ɑ́ wɛɛ ɩsɩɩ cʋɣʋ.

¹³Ɩ́ su, ɩ yele nɑ mɑ yɔɣɔtɩ, ye mɑ tɩɩ tɛmnɑ nti ntǝɣǝlɛ.

¹⁴Mɑ sɔɔlʋ pɩɩwɑɣɑ sɩ ye mpi mpi. Pɑɑ mɑ weesuɣu lɩɩwɑ.

¹⁵Ɩsɔ ɩ́ nɔkɑɑ ɩ kʋ-m, mɑ tɑ tɑŋ pʋlʋ. Amɑ mɑ tɔntɛ teu nyɩɩlʋɣʋ kɛ mɑɑ lǝsɩ.

¹⁶Ye pǝ tɩɩ lɑpɑ mpʋ pǝ wɑɑsɑ-m kɛ́. Mpi tɔ, ɩsɑɣɑʋ ɩɩ kpǝtǝɣǝnɑ Ɩsɔ.

¹⁷Tɔʋ, ɩ́ ke ŋkpɑŋŋ kɛ teu nɑ ɩ́ nɩɩ mɑ kʋyɔɣɔtʋtʋ.

¹⁸Mɑ sɔɔlʋ pɩɩwɑ sɩ mɑ lǝsǝɣɩ mɑ tɩ nyɩɩlʋɣʋ. Mɑ nyǝmɑ́ sɩ mɑ tɔm tenɑ.

¹⁹Ye nɔɣɔlʋ cɑɑ sɩ ɩ hʋʋnɑ-m, ɩlɛ mɑ su nɑ mɑ́ sɩ́.

²⁰Hɑɩ, mɑ Ɩsɔ, yɑɑsinɑɑ nɑɑlɛ tike kɛ mɑ cɑɑ ń lɑ-m, nɑ nyɑ́ kiŋ sǝŋʋɣʋ ɩ́ tɑɑ lɑ-m kɑtɛ.

²¹Kʋsɩ nyɑ́ niŋ kɛ mɑ tɔɔ, nyɑ́ sɔɣɔntʋ ɩ́ tɑɑ lɑ-m kɑtɑtǝlɑɣɑ.

²²Ɩlɛnɑ ń pɔɔsɩ-m nɑ mɑ́ cɔ-ŋ, yɑɑ mɑ́ yɔɣɔtɩ nɑ nyɑɑ cɔ-m.

²³Ɩsɑɣɑtʋnɑɑ ɩsǝnɑɣɑ mɑ lɑpɑ? Hʋlɩ-m mɑ tǝpǝntǝlɛ.

²⁴Pepe tɔɔ kɛ́ nyɑ́ ɩsɛntɑɑ tɑ́ hɛtǝnɑ-m, nɑ ń nyǝnǝɣɩ-m ɩsɩɩ nyɑ́ kolontu?

²⁵Anɩ mɑ wɛ kɛ́ ɩsɩɩ kɑɑwʋlɑɣɑ, yɑɑ nyɩɩliyɑ ŋkɑ heelim kpɑkǝɣɩ tɔ, nɑ ń tɔɣɔnǝɣɩ-m?

²⁶Pǝ tɑɣɑ pʋlʋ, n ŋmɑɑkɩ mɑ tɔm ɩsɑɣɑtʋ nɑ ń fɛlǝɣɩ-m mɑ pǝcɑɑtʋ kʋpǝntǝŋ suwe?

²⁷N tʋ-m nkeɣelee suwe, nɑ ń feŋiɣi mɑ kʋlɑpǝlɛ? Nɑ ń ŋmɑɑkɩ mɑ nɔntɑɑlǝŋ wei mɑ fɛlɑ kɑnyǝŋɑ tɑɑ tɔɣɔ tɑkǝlɑɣɑ tɑɑ.

²⁸Nɑ mɑ tɔnʋɣʋ nɑ́ɑ́ tɑsǝɣɩ ɩsɩɩ tɑɑʋ, yɑɑ ɩsɩɩ ŋkpɑm mʋʋkʋɣʋ wontu kʋsusuutu tɔ.