Jop 39

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Jop, odao. Nago koneaniwe? Te bulu dulude bidibo meme kibugo wai ame nabo sogo nago koneai dawe? Tama me nago te hasa dia dabego wai ame nabo nago subo dawe?

²Tama nisu naga polua te meme kibu dali, te dia hasa dali sigo wai augwa idago haligade bidibo, te nago koneaniwe? Tama nago koneani bogo, nisu te hasa ida dabego bogoli si sugunama, wai saibawe?

⁴Tama te wai dabe augwa ida dabe dali buside me kala silide bidaibao. Tama augwali genuai elama, bomo ebo dao. Tama augwali genuai polo ela sabo si da, teda augwa ida taga peyu, mu tama pabo dao. Tama augwali ma asobo menio,” wali.

⁵“Dego mu te bulu donki dabe bono pįsįgina palobaso, busiba subigila pomainu yai dawe?

⁶Eno augwalibolo wa pai bulu, me doloba pai bulu, tama tamu elalubo bulu mawai dao. Tama augwa bulude bidibo ąǫ yaibao.

⁷Te bulu donki dabe augwaligo koneani. Augwali hanude bidibaso da, teda bidi dabego augwali bono gebelama, tama augwaligo sę emainu hąe weyu yaibao. Tama tibaso, augwaligo te hanude wabo po dabe me kilikili wabo odogobeo. Te tudi ola mawaibao.

⁸Tama augwali te bulu dude biliyu, augwa tuabo nai te nosai dabe, ni yabe dabe tama gege biliyu, bilaibao,” wali.

⁹“Jop, nage de dawe? Te bulu kau kibu omaigo nago sę yaibawe? Tama hulide nago kau kibugo beba piagasaibawe?

¹⁰Nago aga haliga gebelama, tama agai nago gi tǫ elebo masin kegasa bilimainu yaibawe? Tega?

¹¹Nago koneani, agai bomo genuai mu elalubo. Tama tibaso, nago homugo agai nage tau selama, nago genuai sę yaiba eyuwe?

¹²Tama nago homugo agai nago wit nai giba pelama, tama te wit nai inayali sela aselama, te wit nai yabe dali, bo dali sela sąyao po waibawe?

¹³Te tǫli tiwai genuai ba dabe dwagi yai homu ebo sogo da, te augwa bogo memenege ebo dao. Tiali goli, augwaligo te bobobage dogoni bago ebo gilama, augwali augwa wai dabe dali dwagi yai sę ilibo menio.

¹⁴Te tǫli tiwai genuai ba dabe augwa ge tǫde mubo dao, tama tagalobo dao. Tama tǫ posologo te ge posolo ilimainu ebo dao.

¹⁵Augwaligo augwa ge godolo me ebo menio. Tiyu, bidigo me, bulu hasago me te ge dabe agawaibao homu egobeo.

¹⁶Te tǫli tiwai ba dabe augwa wai ma gasa bago wai tonobo ąǫ ebo dao. Tama augwaligo augwalide dwagi yai kolesaga me ebo menio. Augwa gǫų dolobaso, augwa ge odolali saganai dao homu me ebo menio. Augwa ge subigila sąsągano bilibo sę sabilibo dao.

¹⁷Augwaligo tama tibo da. Magi baso meni. Eno augwali dwagi yai kolesaga me mawai menio.

¹⁸Tiali goli, te tǫli tiwai ba dabe hodaluama, pabo si da, augwali bomonama mu udabo dao. Tama augwaligo bogo memenege genuai mu ebo dao. Tama udada peyu, augwaligo kibu hosde dualasa pabo bidi dabe geanobo dao,” wali.

¹⁹“Jop, nago magi sę ebo usugowe? Nago te hos dabe bomo mabo dawe? Tama nago agai bobobage pedu nisi muai dawe?

²⁰Naga homugo te hos digibulu samanobo te mano yali gilama emainu naga digi nigilai dawe? Tega? Te hos dabego ga wabo bomonama mu wabo dao. Tama augwaligo ga wabogo we bidi dabe wi ilibo dao.

²¹Te hos dabe augwaligo genuai bomo elalubode augwali pemene elama, augwali sasamano peyu, te augwa nogo sągą pidibu waibao. Tama augwali hwį yainogo bomonama mu udabo dao.

²²Te hos dabe augwali magi naide me wi elama, noma sabo menio. Te wąbi hwįbo genuai u badi me augwali wi me soabo menio, te wąbi hwįbode.

²³Augwaligo te ami bidi augwali tigide dulalumainu ebo dao. Tama augwali udabo sogo da, te hwįbo bidi dabego ene beledi kidagalo wabo dao. Tama te ami bidigo sesemone ene poa pali da, te giligade ula ebo dao.

²⁴Te hos dabego bu wabo odobo si da, augwali dua me bidibo menio. Mu meni. Augwaligo haliga tigi hodaluama, tama hwįgi pabo homu naga ebo dao. Tama augwali bomonama mu udabo dao.

²⁵Tama augwaligo bu wabo odobo si da, augwaligo ga wabo dao. Augwali te wąbi hwįbo digibulu elalubadi digi, augwaligo denami bolo odobo dao, te wąbi hwįbo denami. Tama augwaligo te ami ofisago i hae, te aga ami bidibolo wabo pode moni wąbi hwįmainu hae wabo po odobo dao,” wali.

²⁶“Jop, eno homugo nago te ba kemodagego ebo kolesagaba homu kolesaga muani bogo, tama augwali te dolo nogo badu poloba bola pabo dawe?

²⁷Teda nago digi te po wabode te ba bunutogobo dabe augwaligo be te bulu duba sę igi pabo dawe? Tega?

²⁸Augwali te bulu duba bidigi pelama, tama augwaligo be te masigi dabe yai madi, me bulu dwai madi augwaligo be sę igi pabo dao. Te tobage bulu da, augwaligo dwagi yai dualalubo bulu tiwai dao.

²⁹Augwali augwa bede dulaluyu, te hasa dabe gedu gegebo dao. Tama hasa digibulu bidibo me tagala, augwaligo subo dao.

³⁰Te bunutogobo gamigo gǫųgo te bulu hasago kaneme tubo godolo mu ebo dao. Tama wąbi hwįnama, bidi me isai tigi pulu tede munalubaso da, te kemodage sibi teba sisinagasabo dao,” God Genuai Bidigo te po Jopbolo wali.