Yoobu 39

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹A yɛ̃ sɑɑ yè sɔɔ kpee bɛrɑ yɑ rɑ yen binu mɑ? A kɑ nɛmun mɑrubu yinnɑre?

²A rɑ nin ɡurɑn suru ɡɑri, kpɑ ɑ n yɛ̃ sɑɑ ye nu koo mɑ?

³Nu rɑ yiire nu nin binu mɑ, kpɑ nu yɑri mɑrubun wɑhɑlɑn di.

⁴Nin bii ni, nu rɑ kpɛ̃yɛ nu dɑm ko yɑkɑsɔ, kpɑ nu yɑrinɑ nu nin mɛro deri. Nu ǹ mɑɑ wee mi.

⁵Wɑrɑ u rɑ de ɡbeeku kɛtɛku ɡɑ n tii mɔ, ɡoo u kun ɡu bɔkuɑ. N ǹ nɛ?

⁶Nɑ derɑ ɡɑ wɑ̃ɑ tem mi ɡɑ̃ɑnu ku rɑ kpi, kɑ mɑɑ tem bɔruɡimɔ.

⁷Gen bɑɑye kɑ wuun wɔkinu. Gɑ ǹ mɑɑ yinni ɡoon ɡbɑ̃sukubu nɔɔmɔ.

⁸Gɑ rɑ n bɔsuwɑ ɡuunɔ ɡu kɑ ɡen dim wɑ. Yɑkɑ bekusɑ ɡɑ rɑ n kɑsu.

⁹Gbeeku kɛtɛ yɑ koo wurɑ yu nun sɔmburu kuɑ? Yɑ koo wurɑ yu kpunɑ wunɛn nɑɑ ɡɔ̃ɔwɔ?

¹⁰Kɑɑ ye wɛ̃ɛ doke yu nun sɔmburu kuɑ? Yɑ koo wurɑ yu nun tem kusɑnu kɔsukuɑ wɔwɑ sɔɔ?

¹¹Kɑɑ ye nɑɑnɛ ko yèn sɔ̃ yɑ dɑm bɑkɑm mɔ? Kɑɑ ye wunɛn sɔmburu kpuro nɔmu sɔndiɑ?

¹²Kɑɑ nɑɑnɛ ko yu nun wunɛn dĩɑnu ɡurɑmɑ yu kɑ dɑ doo soo yerɔ?

¹³Tɑɑtɑɑrun kɑsɑ yɑ rɑ n wɑ̃ tɑ̀ n ye dɛrie. Mɛyɑ yen sɑnsu mɑɑ wɑɑbu wɑ̃.

¹⁴Tɑɑtɑɑ te, tɑ rɑ ten sɛ̃ɛnu sikewɑ temɔ. Kpɑ yɑni sɛɛri yi nu swĩɑsiɑ.

¹⁵Tɑ rɑ duɑri mɑ ɡoo ǹ kun mɛ ɡbeeku yɑɑ ɡɑɑ koo kpĩ yu nu tɑɑku yu kɔsuku.

¹⁶Tɑ rɑ n sɛ̃ kɑ ten binu. A ǹ kɑɑ n mɑm tɑmɑɑ ten binɑ. Tɑ rɑ ten wɑhɑlɑ duɑri ye tɑ kuɑ tɑ kɑ nu mɑrɑ.

¹⁷Domi nɑ ǹ tu bwisi kɑ̃, nɑ ǹ mɑɑ tu lɑɑkɑri kɑ̃.

¹⁸Adɑmɑ tɑ̀ n seewɑ tɑ dukɑ mɔ̀, tɑ ǹ mɑɑsɔ kɑ win dumɑ ɡɑrɑ.

¹⁹Wunɑ ɑ dumi dɑm wɛ̃? Wunɑ ɑ yi sɑrubɑsu dokeɑ?

²⁰Wunɑ ɑ rɑ de yi yɔ̃ nɡe twee? Yin wurɑ yɑ rɑ tɔmbu nɑndɑsie,

²¹kpɑ yi n tem bwiyɑmɔ wɔwɑ sɔɔ yi n nuku dobu mɔ̀ yin dɑm sɑɑbu. Yì n tɑbu durɔbu wɑ, yi rɑ bu tɑbu wɔriwɑ kɑ dɑm.

²²Yin bɑɑye kɑ bɛrum. Yi ǹ ɡɑ̃ɑnu nɑsie. Yi ku rɑ mɑɑ biru wure yì n tɑkobi wɑ.

²³Yin yinnibun sɛ̃ɛ bwɑ̃ɑnu kɑ ben yɑɑsi yi rɑ n wɔki kpɑ yi n bɑllimɔ yin wɔllɔ.

²⁴Bɑ̀ n tɑbun kɔbɑ so, yi rɑ n ɡɑ̀ri wɔrɑwɑ, kpɑ yi n tem kɔsukumɔ.

²⁵Mɛyɑ yì n kɔbɑ ye nuɑ, yi rɑ n sɔɔru kpeerewɑ, kpɑ yi n tɑbun woo numiɑmɔ tontonden di, kpɑ yi n yibɛrɛbɑ kɑ ben sinɑmbun nɔɔ dɑmɡisu nɔɔmɔ.

²⁶Wunɑ ɑ rɑ kɑsɑ bwisi kɛ̃ yu kɑ kɔsɔru dɑ sɔ̃ɔ yɛ̃sɑn nɔm dwɑru ɡiɑ?

²⁷Wunɑ ɑ rɑ ɡunɔ bɑkeru sɔ̃ tu kɑ se tu ten sokuru ko ɡuuru wɔllɔ?

²⁸Kpee bɑɑbɑ sɔɔrɑ tɑ rɑ ten wɑ̃ɑ yeru ko, mì ɡɑ̃ɑnu kun kpɛ̃ nu tu mwɑ.

²⁹Sɑɑ min diyɑ tɑ rɑ ten nɔni kɔ̃ tu kɑ yɑɑ sɑ̃kiriɑ.

³⁰Mi ɑ yɑɑ ɡoru wɑ, miyɑ ɑ rɑ mɑɑ tu wɑ. Yɛmɑ ten binu nu rɑ nɔ.