Soopu 9

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Ḿpʋ́ɣʋ́ Soopu cɔwɑ sɩ:

²Pɔpɔtʋ fɛɩ leleŋ, mɑ nyǝmɑ́ teu sɩ ḿpʋ́ɣʋ́ pǝ wɛɛ. Ɩsǝnɑɣɑ yʋlʋ kɑ́ lɑ nɑ ɩ́ wɛɛ Ɩsɔ kɛ́ teu?

³Ye n cɑɑkɩ-ɩ nɑ yoou, ɩ pɔɔsɩ-ŋ tɔmnɑɑ iyɑɣɑ. Amɑ n kɑɑ cɔ pɑɑ kʋlʋmʋɣʋ.

⁴Ɩ kɛ́ toŋ tɑɑ toŋ tʋ kɛ́, nɑ lǝmɑɣɑsɛɛ tǝnɑ tʋ. Nɔɣɔlʋ kɑɑ kpɑɑsɩ ɩ tǝɣɩ ɩ tɔɔ, nɑ pʋntʋ lɩɩ tǝsoolii.

⁵Ɩ́ lɑɣɑsǝɣɩ pɔ́ɔ́ŋ́ kɛ lonɑ kɛ́, pɔ́ɔ́ŋ́ ɩɩ nyǝŋ. Nɑ ɩ́ pǝsǝɣɩ-ɩ kpɛntǝlɑsɩ nɑ pɑ́ɑ́nɑ́.

⁶Ɩ ciɣitiɣi tɛtʋ kɛ hɑtoo tǝ kite tɛɛ, nɑ tǝ ɑkelenɑɑ seliɣi.

⁷Ye ɩ yɔɣɔtǝnɑ ilim pɩɩ lɩɩkɩ. Ɩ tɑɑlǝɣɩ ɩsɔtʋlʋŋɑsɩ tɔɔ kɛ́.

⁸Ɩ tike ɩ hɛtǝɣǝnɑ ɩsɔtɔnʋɣʋ nɑ ɩ́ tɔŋ teŋku holɑ tɔɔ.

⁹Nɑ ɩ́ lɑ ɩsɔtʋlʋŋɑsɩ nsi tǝ yɑɑkɩ sɩ, ɩsɔtʋ ɩ́ sɩ nɑ mɑ́ tɔɣɔ tǝyɑɣɑ tɔ, nɑ hɑɣɑ nɑ kpɑcɑ nɑ yʋlʋ. Nɑ kɑntuɣu nɑ kʋ piyɑ nɑ lɛnsɩ tɔtɔ*fɑ*. nsi Lǝkpɑ nyǝ́mɑ nyǝmɑ́ tɔ.

¹⁰Ɩ kʋlɑpǝm kɛ sɔsɔɔm kɛ́ pǝ fɛɩ cɛkǝnɑʋ, pǝ́cɔ́ ɩ piti tǝmɑ fɛɩ kɑlʋɣʋ.

¹¹Pɑɑ ɩ tɛɛnɑ mɑ cɔlɔ mɑ kɑɑ nɑ-ɩ, pǝ́cɔ́ mɑ kɑɑ nyɩ ɩ tɛɛʋ.

¹²Ye ɩnɩ ɩ kpɑɣɑnɑ ɑweɣelɛ lɛɛkǝlʋ? Yɑɑ ɑwe kɑ́ tɔnɑ sɩ: Kɑɩ?

¹³Ye Ɩsɔ mʋ pɑ́ɑ́nɑ́ ɑ hɛɛsǝlʋ fɛɩ. Pǝ kpɛŋnɑ teŋku tɑɑ tɔɣɔlʋɣʋ sɔsɔɔʋ Lɑhɑpɩ*fɑ* nɑ kʋ wɑɑlɩ nyǝ́mɑ tǝnɑɣɑ, nɑ pɑ́ hǝntǝɣɩ-ɩ ɑtɛ.

¹⁴Nɑ tɔm ntiɣi mɑɑ cɔ-ɩ yɑɑsi ɩnɛ ɩ tɑɑ?

¹⁵Pɑɑ mɑɑ tɩɩ wɛnɑ tɑmpɑnɑ, mɑɑ cɔɔkɩ. Pɛɛlɛɛ kɛ pǝ wɛɛ sɩ mɑ́ sǝlǝmɩ mɑ hʋʋnlʋ.

¹⁶Pɑɑ mɑ yɑɑ-ɩ kɛ́ nɑ ɩ́ cɔ-m, mɑ tɑ sɑ sɩ ɩ nɩɩwɑ mɑ nɔɣɔ.

¹⁷Ɩ heelim sɔsɔɔm pɛtɑ-m ɑtɛ, nɑ ɩ́ fetili-m hiŋ hiŋ kɛ yem.

¹⁸Ɩ wɑkǝlǝɣɩ mɑ lɑŋlɛ kɛ́. Ɩɩ yeki-m sɩ mɑ́ feesi.

¹⁹Ye toŋ kɛ mɑ tɛɛlǝɣɩ, Ɩsɔ kɛlɛ toŋ tʋ. Yɑɑ mɑ cɑɑ mɑ hʋ́lɩ́ mɑ tɑmpɑnɑ, ɑwe kɑ́ tɩɩ hɑ-m-yɛ?

²⁰Pɑɑ mɑɑ wɛɛnɑ tɑmpɑnɑ, mɑ nɔɣɔ kɑ́ kʋnɑ mɑ tɔm. Yɑɑ mɑ tewɑ teu, ŋkɛ kɑɑ kʋnɑ-tɩ.

²¹Ɩlɛ mɑ tɩɩ tewɑ teu nɑ? Mɑ mɑɣɑmɑɣɑ mɑ tɑ nyɩ. Mɑ weesuɣu lɩɩ-m sɔŋ kɛ́.

²²Pǝ tǝnɑ pǝ wɛ-m teitei kɛ́. Pǝ tɑɣɑ pʋlʋ, Ɩsɔ kʋɣɩ yʋlʋpɑŋ nɑ ɩsɑɣɑʋ kɛ́.

²³Wɑhɑlɑ ɩ́ kɔmɑ kpɑkpɑɑ, nɑ ɩ́ kʋ́ telɑɑ, Ɩsɔ nɑ́ woŋiɣi pɑ lɑŋwɑkǝllɛ tǝnɑɣɑ.

²⁴Ɩsɔ tʋnɑ tɛtʋ kɛ ɩsɑɣɑʋ niŋ tɑɑ. Ɩlɛnɑ ɩ́ tɑkɩ hʋʋlɑɑ ɩsɛntɔɔ. Ye pǝ tɑɣɑ ɩnɩ ɑwe kɑ́ lɑnɑ mpʋ?

²⁵Mɑ pɩɩsɩ tɛɛkɩ lɛʋlɛʋ kɛ́ ɩsɩɩ selu. Sɩ mʋkɑ yem kɛ́, mɑ tɑ nɩɩ leleŋ.

²⁶Sɩ tɛɛwɑɣɑ tǝlɩɩɩ, ɩsɩɩ sǝsǝncɑɑsɩ kpɩɩlʋɣʋ, yɑɑ ɩsɩɩ hɛkǝlɛ tiluɣuu ɩ tɔɣɔnɑɣɑ wɑɑlɩ tɔ.

²⁷Ye mɑ tʋ́ mɑ tɑɑ sɩ mɑɑ sɔɔ mɑ tɑɑ pɑ́ɑ́nɑ́ tɔɔ, nɑ mɑ́ yele lɑŋwɑkǝllɛ nɑ mɑ ɩsɛntɑɑ hɛtɩ,

²⁸ɩlɛ mɑ lɑŋlɛ cɛkǝnɑ mɑ wɑhɑlɑ tǝnɑɣɑ. Mɑ nyǝmɑ́ teu sɩ, Ɩsɔ kɑɑ hɑ-m tɑmpɑnɑ.

²⁹Mɑ tɔm kɑ́ sǝnɑ. Ɩlɛ pepe tɔɔ kɛ́ mɑɑ nɔkɩ nɑ mɑ́ cɑɑlɩ mɑ tɩ?

³⁰Pɑɑ mɑɑ sɔnɑ kpɑlǝkpɑm, nɑ mɑ́ kilisinɑ tɛʋ lʋm.

³¹Ɩ tɑɣɑnǝɣɩ-m ɑfǝlɑ tɑɑ kɛ́ pɛtʋɣʋ kɛ́, nɑ mɑ wontu mɑɣɑmɑɣɑ pǝsɩ-m kʋsɔɣɔtʋ pʋlʋpʋ.

³²Ɩsɔ tɑ́ kɛ́ yʋlʋ ɩsɩɩ mɑ́ sɩ ɩ kɑ́ cɔ-m, yɑɑ mɑ́ yɑɑ-ɩ nɔnɔɣɔ.

³³Nɔɣɔlʋ fɛɩ sɩ ɩ kɑ́ sʋʋ mɑ́ nɑ-ɩ tɑ́ hɛkʋ tɑɑ, nɑ ɩ́ loli-tʋ.

³⁴Ɩsɔ sɩɩ kpɑ́tʋ́ɣʋ́ ŋku n mɑkǝnɑ-m tɔ, nɑ nyɑ́ sɔɣɔntʋ hɛɛsɩ-m cɔɔsʋɣʋ.

³⁵Ɩlɛ mɑɑ yɔɣɔtǝnɑ-ŋ mɑ kɑɑ nyɑ́. Amɑ pǝ tɑɣɑ mpʋɣʋlɔ. Mɑɑ pǝsǝɣɩ pʋlʋ.