Soopu 28

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Tǝ́ nyǝmɑ́ liɣitee nyǝɣǝtʋ tǝhulle, nɑ timpi pɑ nyɑɑlǝɣɩ wʋlɑ tɔ.

²Tɛtʋ tɛɛ kɛ́ pɑ́ lǝsǝɣɩ nyǝɣǝlʋɣʋ. Ɩlɛnɑ pɑ́ lǝsɩ kʋsɛɛmʋɣʋ kɛ pǝlɛ tɑɑ.

³Nyǝɣǝtʋ hullɑɑ pukinɑ fǝtǝlɑ kɛ́ nɑ pɑ́ pɛɛkɩ timpi timpi kǝlɑ lumɑŋ tɔɣɔ pɛɛ wenɑ ɑ ŋmɛlɑ ɑtɛtǝlɛ tɑɑ tɔ.

⁴Pɑ huliɣi pʋ́ʋ́ɣʋ́ kɛ́ nɑ pɑ́ hɑtǝlǝnɑ yǝlɑɑ tǝcɑɣɑlɛ. Nɔɔhɛɛ kpisiɣi sǝnɑʋ, ɩlɛnɑ pǝ́ susi-wɛɣɛ yem tɑɑ, nɑ pǝ́ fiisiɣi-wɛ.

⁵Tɛtʋ nti tǝ tɔɔ pɑ hɑlǝɣɩ tɔɣɔnɑɣɑ tɔ pǝ cɑɣɑ kɛ́ ɩsɩɩ kɔkɔ pǝsɑ-tǝɣɩ kpɛntǝlɑsɩ kɛ tǝ kite tɛɛ.

⁶Timpi tɛtʋ ntɩ tǝ pɛɛ wɛɛ tɔɣɔ pɑ hikiɣi liɣitee pǝlɛ nte tǝ wɛ pooku tǝlɛ tɔ, nɑ wʋlɑ mʋlʋm.

⁷Cɔ́lɔ́ʋ tɑ nyɩ pʋ́ʋ́ɣʋ́ ŋkʋ kʋ mpɑɑʋ. Pǝyele yepeleku tɑ́ loosi-kʋ́.

⁸Tɑɑlɛ wontuɣu ɑkɑ nɔɣɔlʋ, yɑɑ tɔɣɔlɑɣɑ tɑ tǝŋtɑ-kʋ.

⁹Yʋlʋ pɑɑsi tʋnɑ kʋkpɑmʋɣʋ kɛ niŋ, hɑlǝnɑ ɩ́ kpɛsǝɣɩ pɔɔŋ nɑ ɩ kilɑ tɛɛ, nɑ ɩ́ pǝsǝɣɩ-ɩ kpɛntǝlɑsɩ.

¹⁰Nɑ ɩ́ huliɣi kʋkpɑmʋɣʋ tɑɑ kɛ́ pɔɔŋ, nɑ ɩ́ nɑɑkɩ kʋ tɑɑ kʋpɑmpɑm nɑ ɩ ɩsǝpǝle.

¹¹Nɑ ɩ́ tɔɔkɩ lʋm tǝkpentenɑɑ kɛ́ ɑkɔlɑ, nɑ ɩ́ pukinɑ mpi pǝ ŋmɛlɑɑ tɔɣɔ nyɑɑlǝm tɑɑ.

¹²Ɩlɛ leɣe lǝmɑɣɑsɛɛ nɑ́ wɛɛ? Nyǝm tǝcɑɣɑlɛ kɛ le?

¹³Yʋlʋ nɑ́ tɑ́ nyɩ pǝ teu. Pǝyele pǝ tɩɩ fɛɩ yǝlɑɑ tɛtʋ tɑɑ.

¹⁴Pʋ́ʋ́ɣʋ́ ɑnɑɑm sɩ: Lǝmɑɣɑsɛɛ fɛɩ mɑ tɑɑ. Teŋku sɩ: Lǝmɑɣɑsɛɛ fɛɩ mɑ cɔlɔ.

¹⁵Pɑɑ yɑkɩ-yɛ nɑ wʋlɑ yɑɑ liɣitee.

¹⁶Pǝyele pɑɑ lɑɣɑsǝɣǝnɑ-yɛ nɑ Ofii tɛtʋ wʋlɑ, yɑɑ liɣitee pɛɛ kʋkpɛɛtɛɛ nɑ pooku nyǝnɑ.

¹⁷Pɑ kɑɑ kɛɛsǝnɑ-yɛ nɑ kpɑlǝpɑ yɑɑ wʋlɑ. Pǝyele pɑ kɑɑ pǝsɩ nɑ pɑ́ lɑɣɑsɩ-yɛ nɑ wʋlɑ kʋpɑmpɑŋ hǝyɑɣɑ.

¹⁸Pɑɑ kɛɛsǝɣǝnɑ lǝmɑɣɑsɛɛ kɛ pɔɣɔlɑsɩ, yɑɑ kpɑlǝpɑ nyininyini. A kǝlɑ teu kɛ lɩɩtʋ pee nnɑ ɑ wɛ liɣitee tɔ.

¹⁹Ɩtiyopii liɣitee pǝlɛ nte tǝ wɛ Kɑsɑsɑŋɑ tɔ tǝ tɑ hɑŋnɑ-yɛ. Pǝyele wʋlɑ kʋpɑmpɑŋ mɑɣɑmɑɣɑ ɩɩ kɛɛsǝɣǝnɑ-yɛ.

²⁰Ɩlɛ leɣe lǝmɑɣɑsɛɛ nɑ́ lɩɩkǝnɑ? Yɑɑ nyǝm tǝcɑɣɑlɛ kɛ le?

²¹Lǝmɑɣɑsɛɛ ŋmɛlɑ weesuɣu nyǝm tǝnɑɣɑ, sumɑsɩ ɩɩ loosiɣi-yɛ.

²²Sǝm nɑ pʋ́ʋ́ɣʋ́ sɔsɔɔŋkʋ pɑ tɔŋ sɩ: Tǝ nɩɩ pɑ yɔɣɔtǝɣɩ ɑ tɔm kɛ kʋnɩɩ kɛ́.

²³Ɩsɔ tike nyǝmnɑ ɑ mpɑɑʋ nɑ ɑ tǝcɑɣɑlɛ.

²⁴Mpi tɔ, ɩ nɑɑkɩ kɛ́ nɑ pǝ́ tɑlɑ tɛtʋ tǝnɑɣɑ. Pǝyele ɩ cɛkǝnɑ pǝ tǝnɑ mpi pǝ wɛɛ tɔ.

²⁵Wɑɑtʋ wei ɩ tʋwɑ heelim kɛ toŋ, nɑ ɩ́ pɩɩ teŋku tǝnɑsɩ tɔ.

²⁶Ɩ sɩɩ tɛʋ kɛ kʋ wɑɑtʋnɑɑ nɑ kʋ lonɑ, nɑ ɩ́ hɛɛ mpɑɑʋ kɛ tɛʋ nyǝɣǝsʋɣʋ nɑ kʋ cɑlɑnɑɑ.

²⁷Wɑɑtʋ ɩnǝɣɩ ɩ nɑwɑ lǝmɑɣɑsɛɛ nɑ ɩ́ mɑɣɑsɩ-yɛ, nɑ ɩ́ sɩɩ ɑ kite nɑ ɩ́ sɑ-yɛ.

²⁸Tǝnɑɣɑ ɩ sɩɩwɑ yǝlɑɑ sɩ: Lǝmɑɣɑsɛɛ ntɛ́ Tɑcɑɑ Ɩsɔ nyɑmnɑʋ, nɑ ɩsɑɣɑtʋ yepu ntɛ́ nyǝm.