Zobi 39

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Gilania tugo goi totoso hoke hira sari na qoti pinomodi? Ele dogoria goi totoso sa kote podoi sa kurukuru ta pozae ‘dia’ sari tudia?

²Gilania goi visa sidara meke tiqe hira si arini? Gilania tugo goi sa totoso pu kaqu podopodo rini?

³Gilania tugo goi sa totoso sapu kaqu horodidi si arini meke hira vura ni sari tudia pa kasia popoa?

⁴Toqolo sari tudia, ṉiṉira meke toa va leana; taluarae si arini meke lopu hite pule mae.

⁵Esei va taloai sari na doṉ'ki pinomodi? Esei na rupahi sari ikudi?

⁶Ele ponini Rau sa qega koa rini pude na dia popoa, sa lolomo koa ia na soloti meke loke duduli boka toa ia pude dia kokoana.

⁷Hegere ni rini sari ṉoveoro pa vasileana nomadi; lopu avosi rini sari kukili tadi na tie kopu.

⁸Pa toqere si ene hata nia ginani rini, meke henai mo rini sari vasi elo buma.

⁹Kote malumu tavetavete ponigo sa bulumakao pinomona si agoi? Kote hiva va hola boṉi si asa pa mua vetu hose?

¹⁰Boka tuqe nia iku goi sia meke va tavetavetia pa inuma? Boka geli iliri pepeso sia pa mua inuma?

¹¹Boka kalavarae ia goi sa nana ṉiniraṉira lavata? Boka vala nia goi sa doduruna sa mua tinavete pude tavete ponigo sa?

¹²Boka ronu ia goi si asa pude pakepakete meke paleke ponigo, meke la vekoi koasa vasina tana vari paqaha kiko huiti koari na qaqalotodi?

¹³Sari tatapuruna sa ositiriki, sa kurukuru nomana si qetu meke nebe! Ba lopu boka ta padapada la koasa kurukuru sitoko.

¹⁴Hira ni sa ositiriki pa pepeso sari vovoto, pude sa pepeso kote va maṉini, gua.

¹⁵Lopu balabala ia sa sapu kote boka ta neti poraka sari, koari kaiqa kurukuru pinomo.

¹⁶Kopu va kaleani sa sari tuna, guana lopu tanisa tu, lopu tupiti balabala i sa sapu mate sari ba vea,

¹⁷sina lopu ponia ginilagilana sa Tamasa babe poni vala nana hinia koasa binalabala leadi.

¹⁸Ba pana repahi sa sari tatapuruna meke haqala, si hegere nia sa sa hose meke sa tie koina.

¹⁹Vea, agoi Zobi vala ni sari ṉiniraṉira koari na hose meke poni ni sari na kalu gele pa kizudi?

²⁰Agoi va boka i pude horu gua rina kupokupo meke va mataguti sari na tie koa ri na sitoṉodi?

²¹Nenedi si puza pa pepeso, qetu na ṉiṉiradi; meke qeto taloa dia mo pa vinaripera.

²²Hegere nia rini sa minatagutu, na loketoṉa dia minatagutu; na vedara si lopu govete nia rini.

²³Sa vovoina tupi si hake pa kalidia meke gua tugo sari na hopere.

²⁴Kamoi na malagigiri meke rerege taloa si arini; lopu boka koa noso si arini totoso kabo sa buki.

²⁵Koasa kabona sa buki, si siṉo vagia rini sa hibina sa vinaripera pa seu. Meke avosi rini sari kukili tadi na koimata.

²⁶Vegua agoi va tumatumae ni tapuru sari nae, tia la pa kali matao meke repahi rini tatapurudia?

²⁷Vegua agoi tozi ni sari atata pude tapuru sage, pude taveti pana uluna sage sari dia vori?

²⁸Pa kali toqere koadi, vasina va hola boṉi; koari na popoa pa kali toqere patupatu, vasina sa dia ṉati kokoana.

²⁹Vasina koa meke kote doṉo hata ginani; pa seu tu, ba kote poho vagi rini.

³⁰Sari tuna atata si hoke inevaṉa ni sari ehara, meke vari likohae ni rini sari tomatedi rina tie matedi.”