Soopu 10

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Soopu sɩ: Weesuɣu lɩɩ-m sɔŋ kɛ́. Mɑɑ wii mɑ tɩ tɔm. Mɑ lɑŋlɛ kǝlɑ wɑkǝlʋɣʋ, mɑ kɑɑ tɑsɑ sum.

²Ɩsɔ, mɑɑ heeli-ŋ sɩ, tɑɑ kʋ mɑ tɔm. Amɑ heeli-m mpi pǝ tɔɔ n yookinɑ-m tɔ.

³Pǝ wɛ-ŋ teu sɩ ń ŋmɑkǝlɩ mɑ́ wei n ŋmɑwɑ tɔ, nɑ ń yele nɑ pǝ́ lɑnɑ ɑsɑɣɑɑ nɑ?

⁴Anɩ n nɑɑkɩ nɑ pǝ́ kǝlɩ yǝlɑɑ, nɑ ń mɑɣɑsǝɣɩ nɑ pǝ́ kǝlǝɣɩ-wɛ.

⁵Ɩsɔ nyɑ́ weesuɣu topilɑ ɩsɩɩ yʋlʋ nyǝŋkʋ kɛ? Yɑɑ nyɑ́ pɩɩsɩ tɛɛkɩ ɩsɩɩ yʋlʋ pǝyɑɣɑ nyǝnsɩ?

⁶Pepe tɔɔ kɛ́ n pɛɛkǝɣɩ mɑ tɑsǝkǝlɛ nɑ ń feŋiɣi sɩ ń kuli mɑ ɩsɑɣɑtʋ tɔɔ?

⁷Anɩ n nyǝmɑ́ sɩ mɑ tɑ wɑkǝlɩ, pǝ́cɔ́ nɔɣɔlʋ kɑɑ yɑ-m nyɑ́ niŋ tɑɑ.

⁸Nyɑ́ niŋ ŋmɑnɑ mɑ tǝnɑ, nɑ ń cɑɑ sɩ n wɑkǝlǝɣɩ-m.

⁹Ɩsɔ tɔɔsɩ sɩ, nyɑ́ ŋmɑnɑ-m, ɩsɩɩ cʋɣʋ. Ɩlɛ n kɑ́ tɑɣɑnɩ-m yɔkʋɣʋ nɑ mɑ́ pǝsɩ mʋsʋɣʋ nɑ?

¹⁰Nyɑ́ ŋmɑɣɑnɑ-m mɑ too tɑɑ, ɩsɩɩ nɑɑlǝm kiikuɣu fulɑɣɑ tɑɑ tɔ.

¹¹Nyɑ́ lɑpǝnɑ-m mʋwɑ nɑ holɑ, nɑ ń wɑɑsɩ pǝ tɔɔ kɛ́ nɑntʋ, nɑ ń suu-m tɔnʋɣʋ.

¹²Ɩlɛnɑ ń lɑ-m pɛɛlɛɛ, nɑ ń hɑ-m weesuɣu nɑ ń feŋiɣi kʋ tɔɔ.

¹³Amɑ mɑ nyǝmɑ́ nyɑ́ lǝmɑɣɑsɛɛ wenɑ n kɑ ŋmɛsɑ nyɑ́ lotu tɑɑ tɔ.

¹⁴N feŋiɣi kɛ́ sɩ, ye n nɑwɑ mɑ wɑkǝlɑɑ ɩlɛ n kisi-m suulu hʋ́lʋ́ɣʋ́.

¹⁵Ye mɑ wɑkǝlǝnɑ-ŋ mɑ lepɑɣɑ, pɑɑ mɑ tɔm tewɑ, nyʋɣʋ kɑmɑ ḿpʋ́ɣʋ́. Nɑ wɑhɑlɑ nɩɩ-m nɑ fɛɛlɛ kʋɣʋ-m.

¹⁶Ye mɑ kʋsɑ nyʋɣʋ ɩlɛ n tʋ mɑ wɑɑlɩ, ɩsɩɩ tɔɣɔlɑɣɑ, nɑ ń kʋlǝɣɩ mɑ tɔɔ nɑ piti tǝmɑ.

¹⁷Nɑ ń kɔŋnɑ-m ɑseetɑ nyǝ́mɑ mpɑ pɑɑ cɑɑkɩ-m tɔ, nɑ nyɑ́ pɑ́ɑ́nɑ́ sɔɔsǝɣɩ mɑ tɔɔ. Nɑ ń kpɛtǝlǝɣɩ-m nɑ wɑhɑlɑnɑɑ.

¹⁸Pepe tɔɔ kɛ́ Ɩsɔ lǝsɑ-m mɑ too lotu tɑɑ? Ɩsǝntɔ mɑɑ sǝpɑ nɔɣɔlʋ tɑ nɑ-m.

¹⁹Pɑɑ tɛɛnɑ pǝlɑɑʋ tɑɑ kɛ́ kpɑkpɑɑ, nɑ pǝ́ wɛɛ ɩsɩɩ pɑ tɑ lʋlɩ-m.

²⁰Mɑ weesuɣu kʋyɛɛŋ kɑɑsɑ-m pǝ́cɔ́ tike ntɔ. Ɩlɛ Ɩsɔ, yele-m mpʋ nɑ mɑ́ yɔɔlǝnɑ wɛɛ pǝ́cɔ́ wei ɩ kɑɑsɑ-m tɔ.

²¹Ɩlɛnɑ pǝ́cɔ́ mɑ́ polo ɑtɛtǝlɛ tɑɑ. Mɑ kɑɑ tɑsɑ mǝlʋɣʋ kɛ cǝnɛ. Tɛtʋ ntɩ tǝ tɑɑ kɛ́ sǝkpɛtʋɣʋ ɑnɑɑm wɛɛ.

²²Sǝkpɛtʋɣʋ tɛtʋ wɛɛ kɛ́ ɩsɩɩ ɑhoo. Ɩsotom sɔsɔɔm kɛ́, pʋlʋ tɑ tǝŋ. Ɩlɛnɑ nyɑɑlǝm nɑ́ɑ́ wɛɛ ɩsɩɩ pǝ yukuɣu tɔ.