Soopu 15

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Ḿpʋ́ɣʋ́ Temɑŋ tʋ Ɩlifɑsɩ cɔwɑ Soopu sɩ:

²Yʋlʋ lǝmɑɣɑsɛɛ tʋ ɩsɩɩ nyɑ́ tɑkɑ, kɑɑ yɔɣɔtǝɣɩ tɔm kpɑɩ nyǝntʋ, yɑɑ ɩ́ hɔŋ ɩ tǝɣɩ yem kɛ́ mpʋ.

³Nyɑ́ kɑlʋɣʋ wɛ kpɛtɛ kɛ́, pǝ tɑɑ fɛɩ kɑwɑɑɣɑ.

⁴Ɩsɔ nyɑmnɑʋ mɑɣɑmɑɣɑ nɑ ɩ sɛɛʋ kite kɛ n wɑkǝlǝɣɩ yoo!

⁵Nyɑ́ ɩsɑɣɑtʋ tɔm kɛ nyɑ́ nɔɣɔ yɔɣɔtǝɣɩ. Pǝyele ɑcilɑɣɑtʋ nyǝ́mɑ kʋyɔɣɔtʋtʋ kɛ n kpɑɣɑɑ.

⁶Nyɑ́ nɔɣɔ hʋlǝɣǝnɑ nyɑ́ ɩsɑɣɑtʋ. Nyɑ́ ntompee kʋɣʋnɑ nyɑ́ tɔm pǝ tɑɣɑ mɑ́.

⁷Nyɑɣɑ pǝ tɑɑlǝnɑ lʋlʋɣʋ nɑ? Yɑɑ n lɑɑlɑ pulɑsɩ kɛ ilim nɑʋ?

⁸N nɩɩwɑ Ɩsɔ lɑɣɑtʋ tɑsʋɣʋ, nɑ ń hii lɑɣɑtʋ kɛ nyɑ́ tike nɑ?

⁹N tɑ tɛɛ-tʋɣʋ nyǝm, pǝ́cɔ́ n tɑ cɛkǝnɑ pʋlʋ nɑ pǝ́ wɛ-tʋɣʋ sǝkpɛtʋɣʋ.

¹⁰Tɑ tɑɑ cǝnɛ wɛ nyʋŋhʋlʋmǝŋ nyǝ́mɑ, nɑ ɑkpɑtǝlɑɑ mpɑ pɑ tɛɛ nyɑ́ cɑɑ kɛ sɔsɔɔntʋ tɔ.

¹¹N nyǝnǝɣɩ yem kɛ́ Ɩsɔ lɑŋhɛɛsǝlɛ tɔm nti ɩ tɛlǝsǝɣɩ-ŋ tǝpɑmm nɑ tɑ́ nɔɔsɩ tɔɣɔ?

¹²Pepe tɔɔ kɛ́ nyɑ́ pɑ́ɑ́nɑ́ huuki mpʋ, nɑ ń cɩɩlǝɣɩ-tʋɣʋ ɩsɛ?

¹³Ɩsɔ kɛ́ n mʋnɑ pɑ́ɑ́nɑ́, nɑ ń yɔɣɔtǝɣɩ tɔmnɑɑ mpɛ?

¹⁴Yʋlʋ ɩɩ pǝsǝɣɩ nɑ ɩ́ wɛɛ tǝnɑŋŋ yɑɑ ɩ́ siɣisɑ teu kɛ Ɩsɔ.

¹⁵Pɑɑ ɩsɔtɑɑ tillɑɑ mɑɣɑmɑɣɑ Ɩsɔ fɛɩnɑ-wɛɣɛ nɑɑni. Pǝyele ɩsɔtɔnʋɣʋ fɛɩ tǝnɑŋŋ.

¹⁶Kɑcɑŋfɑnɑ yʋlʋ ɩsɑɣɑʋ nɑ ɑcɑɑlʋɣʋ ŋku kʋ mɑlǝnɑ ɩsɑɣɑtʋ ɩsɩɩ lʋm nyɔɔʋ tɔ?

¹⁷Tɔʋ, Soopu ke ŋkpɑŋŋ nɑ mɑ́ sɛɣɛsɩ-ŋ nɑ mɑ́ kɛɛsɩ-ŋ nti mɑ nɑwɑ tɔ.

¹⁸Nti lǝmɑɣɑsɛɛ nyǝ́mɑ nɩɩwɑ pɑ cɑɑnɑɑ kiŋ nɑ pɑ́ hʋ́lɩ́ tɔ.

¹⁹Pɑ tike kɛ Ɩsɔ kɑ hɑwɑ tɛtʋ, kpɑɩ tʋ nɔɣɔlʋ ɩ tɑ siti pɑ hɛkʋ.

²⁰Ɩsɑɣɑʋ wɛ ɩsǝnyǝŋlɛ tɑɑ kɛ́ ɩ weesuɣu pɩɩsɩ tǝnɑɣɑ, hɑlǝnɑ ɩ sǝm. Pǝyele pɑ kɑlɑ ŋmɑkǝllʋ pɩɩsɩ tǝnɑɣɑ.

²¹Sɔɣɔntʋ tɔm kɛ pɑ nɩɩkɩ. Pɑ tɩ cɑɣɑnɑʋ wɑɑtʋ tɑɑ kɛ́ wɑkǝllʋ kɑ́ tii pɑ tɔɔ.

²²Ɩ nɑɑkɩ lɑɣɑtɛ cɛŋǝɣɩ-ɩ, ɩlɛ ɩɩ tɛɛlǝɣɩ sɩ ɩ kɑ́ fiti sǝkpɛtʋɣʋ.

²³Ɩ pɛɛkǝɣɩ tɔɣɔnɑɣɑ, nɑ ɩ́ nyǝmɑ́ sɩ sǝkpɛtʋɣʋ kʋyɑkʋ tɑŋɑ-ɩ.

²⁴Lɑŋwɑkǝllɛ nɑ nǝɣǝsɛɛ pǝ tʋɣɩ-ɩ sɔɣɔntʋ sɔsɔɔntʋ kɛ́. Pǝ tiiki ɩ tɔɔ kɛ́ ɩsɩɩ wulɑʋ sɔɔlʋ pɩɩkʋɣʋ sɩ ɩ tɛɛkɩ yoou tɔ.

²⁵Pǝ tɑɣɑ pʋlʋ, ɩ kʋsɑ niŋ sɩ ɩ mɑkɩ Ɩsɔ. Ɩ cɑɑkɩ sɩ ɩ kʋlǝɣɩ Tomɑ tǝnɑ tʋ tɔɔ.

²⁶Hɑlɩ ɩ hikɑ ɑpɑlʋtʋ sɩ ɩ́ kʋlɩ Ɩsɔ tɔɔ, nɑ ɩ́ kentɑ ɩ tǝɣɩ ɩ kpɑlʋɣʋ kpɩɩsǝŋ nyǝŋkʋ.

²⁷Ɩ kiiwɑɣɑ nɑ ɩ́ wɛnɑ ɑlɑɑfǝyɑ.

²⁸Acɑlɛɛ kʋyɔkɛɛ nɑ tɛɛsɩ nsi sɩ tɑɑ yǝlɑɑ lɩɩwɑ nɑ sɩ́ cɑɑ yɔkʋɣʋ tɔ, sɩ tɑɑ kɛ́ ɩ kɑ́ cɑɣɑ.

²⁹Ɩ kɑɑ tɑsɑ wɛnɑʋ hikuɣu nɑ pǝ́ leeli, pǝ́cɔ́ pǝ kɑɑ tɑsɑ-ɩ lɑpǝnɑʋ kɛ tɛtʋ tɔɔ.

³⁰Ɩ kɑɑ fiti sǝkpɛtʋɣʋ. Ɩ wɛ kɛ́ ɩsɩɩ kɔkɔ nyɑkʋɣʋ tʋɣʋ piliŋɑsɩ tɔ, Ɩsɔ kɑ́ woso-ɩ ɩ heelim nɑ pǝ́ kpiisi-ɩ.

³¹Ye kpɛtɛ kɛ ɩ tʋ nɑɑni, ɩ tʋsɑ ɩ tǝɣɩ. Mpi tɔ, kpɛtɛ ntɛɣɛlɛ ɩ kɑsǝyɑɣɑ.

³²Hɑlɩ pɩɩ lɑ mpʋ nɑ pǝ́cɔ́ pǝ́ tɑlɑ ɩ sǝm. Teitei ɩsɩɩ piliŋɑ lɑŋʋɣʋ cǝlǝm nɑ kɑ́ sɩ́ tɔ.

³³Ɩ kɑ́ wɛɛ kɛ́ ɩsɩɩ tʋɣʋ ŋku pɑ yɑɑ sɩ, lɛsɛŋ tɔ, kʋ ɑkɑɑ tɔɔkʋɣʋ nɑ ɑ́ tɑ pɩɩtɑ tɔ. Yɑɑ ɩsɩɩ ŋku pɑ yɑɑ sɩ, Olifi tɔ kʋ hɛtʋ luluɣu tɔ.

³⁴Ɩsɑɣɑʋ tǝyɑɣɑ kɑ́ pǝsɩ kɑɑlʋlɑɣɑ, ɩlɛnɑ kɔkɔ nɑ́ɑ́ nyɑɣɑ muɣullu tǝcɑɣɑlɛ.

³⁵Ɩsɑɣɑtʋ kɛ ɩ hɑkɩ nɑ ɩ́ lʋlɩ kʋlʋmtʋ ntɩ. Ɩ lotu tɑɑ kɛ́ mpi pɩɩ tʋsɩ-ɩ tɔ pǝ pɩɩkɩ.