1Ń zↄ̃ nɛ́'igↄrↄ dↄ̃ yá? N gãsi è gↄrↄ kũ àtɛn nɛ́ i yá?
2Ndì ń nↄ̀ mↄ dↄdↄ yá? Ndì ń nɛ́'igↄrↄ dↄ̃ yá?
3Òdi kútɛ ò nɛ́ imɛ, akũ ń nɛ́'iwãwã dì kpátɛ.
4Ń nɛ́nↄ dì gbãna kũ sɛ̃̀n òdi pɛ́tɛ, òdi gɛ̃ zɛ́la òdi su ń danↄa doro.
5Dí mɛ́ à tò zaakisɛ̃ntɛ gↄ̃̀ a zĩdanɛɛ? Dí mɛ́ à a pòro à a gbàrɛɛ?
6Ma sɛ̃̀ntɛ dìtɛnɛ a bɛ ũmɛ, ma zĩtɛ wiside kɛ̀nɛ a kúki ũ.
7Àdi pã kpá wɛ̃tɛ kĩnii, àdi a kpàkɛrii zuka maro.
8Àdigↄ̃ kure sĩ̀sĩnↄa àgↄ̃ sɛ̃̀ wɛtɛ, àdigↄ̃ kpátɛ kɛ pↄ́ ísinↄi pínki.
9Zùsɛ̃ntɛ ni we à zĩ kɛnnɛ yá? Ani we à i n zùnↄ karan yá?
10Ĩni bà dↄa de à bú wínnɛ yá? Ĩni gbãngo danɛ de à kpase kɛ̃nnɛ yá?
11Ĩni náani dↄa a gbãna zↄ̃kↄ̃ yãii? Ĩni n zĩ tónɛ yá?
12Ĩni a náani kɛ à n pↄ́wɛ sɛ́sɛ à suonnɛ pↄ́wɛgbɛ̃kia yá?
13Sↄ̃bã dì a dɛ̀mbɛrɛnↄ poro kũ pↄnnao, ama ani sí lɛkↄ̃a kũ tokũ dɛ̀mbɛrɛoro.
14Àdi nɛ́gbĩni da zĩtɛ, àdi tó bùsu'atɛ̃ nɛ́gbĩnii pìnↄ wã à pipi.
15À sã̀sãn kũ oni su ò gɛ̀sɛ pɛ́tɛa à wíwi, kesↄ̃ nↄ̀bↄsɛ̃ntɛnↄ ni táa oa.
16Àdigↄ̃ pãsĩ kũ a nɛ́nↄ, ĩnigↄ̃ dↄ̃ se a zĩda nɛ́nↄnlo, zĩ pã kɛnaa dì kɛnɛ yãke ũro.
17Zaakũ mádi a gba ↄ̃ndↄ̃ro, mádi a baka da fayadenↄ tɛ́ro.
18Ama tó à fùtɛ à bò kũ bàao, àdi gɛ̃ sↄ̃la à a dìri yáa dↄ.
19Mↄkↄ̃n mɛ́ ndì tó sↄ̃ gↄ̃ gbãna vĩ yá? Mↄkↄ̃n mɛ́ n sɛ̀rɛkã pɛ̀pɛ a wakaaa yá?
20Mↄkↄ̃n mɛ́ ndì tó àgↄ̃ vĩvĩ lán kwa bà yá? A pↄ́ bona a yĩn kĩni gbãna dì tó vĩna ń kũ.
21Àdi a gbá gátɛgatɛ guvutɛn, àdi pↄnna kɛ a gbãna yãi, akũ àdi gɛ́ da zĩ̀karinↄlɛ.
22Àdi pↄ́ kũ òdi vĩna kɛnɛ yáa dↄ, swɛ̃̀ɛ dì kɛ̃aguro, àdi boru kpɛ fɛ̃nɛdanɛro.
23Kàa dìgↄ̃ kĩni kɛ gbàtan a musu, sári lɛ̀kɛtɛ kũ sári gésedeo dì pí.
24Tó ò zĩ̀ kuru pɛ̀, àdigↄ̃ a zĩda daki dↄ̃ro, àdigↄ̃ zĩtɛ lɛ́lɛ àdigↄ̃ vĩvĩ àdigↄ̃ kɛ kɛ̀rɛkɛrɛ.
25Tó ò kuru yĩsãm pà, àdi pↄ́ bo a yĩn à pi, ɛ̃hɛ̃! Àdigↄ̃ zĩ̀ ĩa sɛ́sɛ zaa zã̀zã kũ gbɛ̃ zↄ̃kↄ̃nↄ wiki gbãnao kũ kùwikikɛnaao.
26N ↄ̃ndↄ̃ mɛ́ à tò boro dì yàa kɛ, à a dɛ̀mbɛrɛ poro à gɛ́ gɛ̀nↄmidↄki kpa yá?
27Mↄkↄ̃n mɛ́ n dìtɛ vãunɛ àgↄ̃ vura zã̀zã à a sà da zaa musu yá?
28Àdigↄ̃ kú gbɛ̀ɛ musu, gwen àdi in, àdi di gbɛ̀ mìsↄ̃ntɛa a aafialeki ũ.
29Zaa gwen àdigↄ̃ kpátɛ kɛ pↄ́blei, àdi wɛ́ pá pↄ́nↄa zaa zã̀.
30Arun a nɛ́nↄ pↄ́ble ũ, gu kũ pↄ́ gɛ̀ kún, gwen àdigↄ̃ kún.
