Job 39

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Ku kom etu ke pacl nani lemnak fineol uh ac isusla? Kom nu liye ke deer lemnak uh isus uh?

²Kom etu lah eltal ac pitutu malem ekasr elos fah isusla? Ac kom etu pacl in isus lalos uh?

³Kom etu ke pacl elos ac kuruweni Ac oswela natu natulos uh nu faclu?

⁴Natu natulos uh ac kapak ac arulana fokokoi inima uh; Elos ac som ac tia sifil foloko.

⁵“Su ikasla donkey lemnak uh? Su fuhlela eltal in forfor sukosok?

⁶Nga sang acn mwesis uh tuh in acn in muta lalos, Ac lela elos in muta yen wangin mwet muta we, ac wangin mah ku in kapak we.

⁷Elos muta yen loes liki oraru lun siti uh, Ac wangin mwet ku in akmunayalosla ac sap elos in orekma.

⁸Fineol uh pa acn mahsrik ma elos mongo we, Ac suk ma folfolsra elos in kang.

⁹“Ya soko cow lemnak ac ku in orekma lom? Ku el ac lungse motul in lohm sin kosro nutum uh?

¹⁰Ku kom ku in kapriya soko ke sucl ac oru elan pikin ima lom uh? Ku oru elan amakin mwe kulkul inima lom uh?

¹¹Kom ku in lulalfongi ke fokoko lun manol, Ac finsrak mu elan oru orekma toasr lom uh?

¹²Ya kom lulalfongi elan usani fokin ima ma kom kosrani uh Ac orani wheat uh nu ke acn in kulkul wheat lom uh?

¹³“Posohksok lulap lun ostrich finne pisrpisr ke pikpik uh, Tuh ostrich uh tia ku in sohk oana stork uh.

¹⁴Ostrich uh filiya atro natulos ah fin fohk uh, Fusrfusr lun fohk uh in mau ku in fisrik atro uh.

¹⁵El tia nunku lah nia se ku in longya, Ku kosro lemnak ac fukulya.

¹⁶El oru oana in tia ma natul pa atro uh. El tia nunku lah ac wangin sripen kemkatu lal uh.

¹⁷Nga pa tuh oru elan lalfon, Ac tia sang etauk nu sel uh.

¹⁸Tusruktu el fin mukuiyak elan kasrusr El ac isrun na soko horse ac mwet ma kasrusr fac uh.

¹⁹“Job, ku kom pa oru horse uh in fokoko, Ac sang unac fin kwawalos in srosro uh?

²⁰Ku kom pa oru elos in sro oana locust uh, Ac aksangengye mwet uh ke mongin fwaclos uh?

²¹Elos ac rarala ac kihling infohk infahlfal uh; Elos ac yuyang nu ke mweun ke kuiyalos nufon.

²²Elos tia etu sangeng, Ac wangin cutlass ku in oru elos in foloki.

²³Kufwen mweun ma mwet kasrusr faclos uh us Ac erarrar ac saromrom ke kalmen faht uh.

²⁴Elos ac rarak ke tufal uh, ac sroak kasrusr nu meet. Pacl mwe ukuk uh kasla, elos tia ku in oakwuki.

²⁵Pacl nukewa mwe ukuk uh ac kas uh elos ac ngorla; Elos ku in ngokak mweun uh meet liki elos apkuranyang nu kac, Ac elos lohng pusren sapsap lun mwet kol lun mwet mweun uh.

²⁶“Ya won hawk uh lutlut sohksok sum Ke el ac asroelik posohksok lal nu eir uh?

²⁷Ku eagle uh soano sapsap lom Tuh elan orala ahng lal uh yen fulat fineol uh?

²⁸El ac orala acn in muta lal uh fin eot ma oan yen fulat oemeet fineol uh, Ac oru acn tohktok fineol uh in nien wikla ku lal.

²⁹El ac muta we ac ngetnget liye acn loes ac acn apkuran, In konauk ma elan uniya ac kang.

³⁰Eagle uh ac toeni raunela monin ma misa, Ac eagle fusr uh ac nim srah kac uh.”