Johane 11:6-40

⁶Eme hucte biŋe manarâ juweckoa gie bapa jajahec mocwâc juwec.

⁷Iŋuc jurâ motecfâcne ʒiŋuc jazawec: “Warepie Judaia mâreŋko risie ranaŋ.”

⁸Mume motecfâcne jaŋe ʒiŋuc âzâcnembiŋ: “Qaqazu, Judaŋic jaŋe juc bânic moc ira qânâzi hecguzo mumbiŋ, eme ʒi wemocte jaŋerao mocwâc risiezo mukic?”

⁹Mupie Jesuzi ʒiŋuc jazawec: “Gie bapa dameŋ aua 12 fokac i! Moc e ʒoaŋko hata rahame wiac moczi he âkec mi ecneocmu, e tatamacko wiac sâcne honeocmu.

¹⁰Moc e ŋafeo tatamac basahuc hata rahame ine he âkec ecneocmu.”

¹¹Iŋuc murâ dâŋ moc ʒiŋuc ʒuhuckewec: “Âgo‐nâŋec Lazaro guŋ fokac, eme no rarâ wiwickepemu.”

¹²Eme motec jaŋe ʒiŋuc mumbiŋ: “Wofuŋ, guŋ fohuc biaŋkeocmu.”

¹³Jesu e hâmocte dâŋ suŋsuŋne mume jaŋe guŋ jâmbâŋte mukac muhuc mi mana‐hâmombiŋ.

¹⁴Irec Jesuzi muɋaɋackerâ jazawec, “Lazaro hâmojec.

¹⁵No ira mi ra juhape hâmojecte ŋoŋere erâ bunane biaŋkekac, ŋoŋe mamanasiŋ fârihec eniŋte wiac i fuajec. Ʒi ine erao ranaŋ.”

¹⁶Eme Toma, ʒâŋene moc Didimo, eki motec âgofâcne ʒiŋuc jazawec: “Nâŋâc mâmâc rarâ ehec hâmonʒepeneŋ.”

¹⁷Lazaro ʒâŋeruŋko fohame ʒoaŋ gie bapa jahec â jahec ehame Jesu ra fisiwec.

¹⁸Betania hae i Jerusalem hae irec raʒimicne bembeŋko ŋewecte

¹⁹irecnec Judaŋic bocjahazi Mata â Maria ɋajekic hâmowecte soŋgâŋ fâsâc honec‐jofazo rambiŋ.

²⁰Eme Mata e Jesu fisikac mupie manarâ Maria ficko ŋehame ra hatao bâfuawec.

²¹Bâfuarâ ʒiŋuc âzâcnewec: “Wofuŋ, go ʒira jutec muzac ɋanane mi hâmozac.

²²Erâ ʒiŋuczia gore wâc manakopac, wiac irec me irec Anutu numucnetec mana‐gareocmu.”

²³Eme Jesuzi ʒiŋuc âzâcnewec: “Ɋage ɋârerâ fahareocmu.”

²⁴Mume Matazi ʒiŋuc muwec: “Juku dameŋ sâkoo ɋârerâ fahareocmu i manakopac.”

²⁵Eme Jesuzi ʒiŋuc âzâcnewec: “Ɋâɋâre â juju rune no, irec moc e no manasiŋnuocmuzi hâmo‐bipierâ juocmu,

²⁶â moc e ɋâricne juhuc manasiŋnuocmuzi hâhâmo tâmiric juraʒihuc juocmu sanaŋ. Go dâŋ i mana ʒakiekomec?”

²⁷Eme Matazi muwec: “Go Kristo Anuture Ŋokâzi mâreŋko wahaocte mukicne hâcne, i maŋnanezi mana ʒakiekopac.”

²⁸Dâŋ iŋuc murâ qoticne Maria wiracnerâ saŋucko ʒiŋuc âzâcnewec: “Qaqazu warejec gore mukac.”

²⁹Eme Mariazi manarâ izia faharerâ Jesurao rawec.

³⁰Jesu e hae upeo Mata dâŋ âzâcneweckoa domawec.

³¹Eme Maria e biac faharerâ rame Judaŋic soŋgâŋte ficticnao ŋembiŋ jaŋe ʒâŋeruŋko kioocte rakac muhuc bâjâpembiŋ.

³²Eme Maria e hae upeo hurâ Jesu honerâ kikefuŋnao fodaperâ ʒiŋuc âzâcnewec: “Wofuŋ, go ʒira jutec muzac ɋanane mi hâmozac.”

³³Iŋuc murâ kiome Judaŋic bâjâpembiŋ jaŋe e bafickerâ mâmâc kiombiŋ. Kiopie Jesuzi honec‐joparâ mana hâtâwehuc gâgâmârâwec.

³⁴Iŋuc erâ wio‐jarewec, “Wena duckembieŋ?” Eme jaŋe mumbiŋ, “Wofuŋ ware honec.”

³⁵Eme Jesu ʒâŋene ruruame ʒâŋeucne wahawec.

³⁶Eme Judaŋic jaŋe honerâ mumbiŋ, “Honeniŋ, maŋne ere mo iŋucne domawec.”

³⁷Â gâcnezi mumbiŋ, “Tiŋtuŋ moc ʒâŋene bâtâcneweczi ŋic kecʒi sâcne mi bâpiaŋkeme ɋiɋic qazac me?”

³⁸Eme Jesuzi bune mocwâc hâhâtâwehame ʒâŋeruŋko ra fisiwec. Qâŋɋâŋ e qânâ hawecko fowec, motâcne qânâ kâcɋenezi âke bâzickekicne.

³⁹Irec Jesuzi ʒiŋuc muwec: “Qânâ bârârieniŋ.” Mume hâmocnere hahac Mata eki muwec: “Wofuŋ, ʒoaŋ gie bapa jahec â jahec fowecte âsu fikac.”

⁴⁰Mume Jesuzi ʒiŋuc âzâcnewec: “Dâŋ gazape mi manamec, go manasiŋnutec Anutu tâpiri‐ticnere qâreŋ fuame honecmu.”