Yohana 11:6-40

⁶Paupata nhwalo gwenio Lazalo ntamwe, Yesu ngajendekea kutama paali upo kwa machoba mabele.

⁷Kuboka penia ngabalengela akinapunji baakwe, “Tujende kabele kukilambo cha Kuyudea!”

⁸Akinapunji ngabalengela, “Aboli! Kingobu kichokotu kipetite kuboka pa Akayahudi pabapala kunkoma na maganga, namwe mpala kujenda kabele kwenioko?”

⁹Yesu ngajanga, “Bo, kingobu cha mui komi ni ibeleje? Bai mundu anda atyangite mui kuotoje ukobala magambu alola ndaa padunia.

¹⁰Nambu mundu anda ajendite kilo apakobala kumagambu lumuli lubije nkati jaakwe.”

¹¹Yesu pajomola kulongela malobe genia, ngabalengela, “Ng'anjagwito Lazalo abi lugono, nambu ne manyenda kunyimuya.”

¹²Akinapunji baakwe ngannengela, “Angwana, anda abi lugono, bai malama.”

¹³Angweto bapemelela Yesu alengita kugoche lugono, bamanyije alenga kiu cha Lazalo.

¹⁴Bai Yesu ngabalengela kipola, “Lazalo awile!

¹⁵Nambu mbi na laa kumamagambu giinu, nakibaje na mangweto kwenio, na mpate kuamini. Aja, tujende kachakwe.”

¹⁶Tomasi ojwakemigwa Mabela ngabalengela akinapunji akajakwe, “Tujende na twe tukawee tuboa!”

¹⁷Yesu pajenda kwenio ankolela Lazalo abi mulikabuli machoba ncheche.

¹⁸Kukijiji cha ku Betania kukiba papipi na kilambo cha Kuyelusalemu, kulipa kwakwe kubi kilomita itatu.

¹⁹Akayahudi ajingi bakiba baike kwa Malita na Maliamu kakokalekea kukiu cha nkaka mundu.

²⁰Bai Malita pajoa Yesu atendakuika, ngajenda kumpokela, nambu Maliamu ngaika kachakwe.

²¹Malita ngannengela Yesu, “Angwana, makabi upamba, Nhwacha gwito kabi ajomwikeje!

²²Nambu maanyi mpaka ngoe chachoa cha mpa kunnenge Nnoongo, mampa.”

²³Yesu ngannengela, “Nhwacha gwinu mayoka.”

²⁴Malita ngajanga, “Manyi mayoka mangobu ga kuyoka, lichoba lya kupela.”

²⁵Yesu ngannengela, “Nenga nga kuyoka na bwomi. Ojwaamini nenga ata akajomwike malama.

²⁶Na kila ojwalama na kuamini nenga aweje ngu. Bo, kuamini genago?”

²⁷Malita ngannengela, “Elo Angwana! Nenga amini mwenga nga Kilisto, Mwana jwa Nnoongo, jwajo ojwaika padunia.”

²⁸Bada ja kulenga genago, Malita ngajenda kunkema Maliamu nnombo mundu, ngannengela pantemela, “Mmoli abi pamba, ankema.”

²⁹Jwombe apajoa gena kingobucho ngajinuka, nukunnyendelela Yesu.

³⁰Yesu akiba anajingije pikijiji, ila akiba tango paali upapa apampokila Malita.

³¹Bai Akayahudi babakiba pamwe kachakwe Maliamu babakiba kumpe pole pabamona ajinwike nukupita panja chokwe, ngabankengama. Bakita akiba kujenda kamakabuli kulombola.

³²Bai Maliamu apaika paali pena apabi Yesu nukummona ngakilikitila, nukunnengela, “Angwana makabi upamba, akaka bango kabi bawije!”

³³Yesu apammona akaguta na Akayahudi babaika pamwe, nangweto uyo baguta, ngabe na chimbaa, na laaje kumwojo gwakwe.

³⁴Kibokachapenia ngabankonya, “Mammekiti ko?” Ngabannyanga, “Angwana, nhwike nnole.”

³⁵Yesu ngaguta.

³⁶Akayahudi ngabalenga, “Nnolange apampaile!”

³⁷Nambu kati jabe ngabalenga, “Bo, jonjo nganhwekwi mio jwangalola jola, kuotoje kuntenda Lazalo akaweje?”

³⁸Bai Yesu akiba na laaje kabele kumwojo, ngaika kamakabuli likabuli lyene lyakiba nduka, liekiligwe kwa libwe!

³⁹Yesu ngalenga, “Mmoyange libwe lyene!” Malita, nnombo mundu jwajo ojwawile, ngannengela, “Angwana, tayali atumbu kununga, atamite mulikabuli machoba ncheche!”

⁴⁰Yesu ngannengela, “Bo, nanengije anda nhwamini mamikibona kibumo cha Nnoongo?”