John 11:6-40

⁶Mina resi Lazarus bi gauka varegamo mina neidesi amegamo sanari meda remanu besa ameyo.

⁷Resi ini usi dina vene rofu niyo, “Judea rofu dairi nenadi.”

⁸Ma niyadi, “Oteimana amiye, Jew vene yaku ruika fore dudu ya ugika reyadi; ma ya mironari dairisi negika reisa ba?”

⁹Ma nikabai reyo, “Meda nemoko 12 bi meda yokoi di ari vabara ba ide? Kaere ariu dibo redo amiye bi abouna de rego, adina mina kono tora noibanu di vabara vedo dada.

¹⁰Idu amiye yokoi bi urusari dibo rego vonisi, bi abougo, adina inasa vabara koina.”

¹¹Mina niyo usi ka niyo, “Uni dubuini Lazarus bi raudai resi varedo, idu na yaku mironari bosi moi edadigida.”

¹²Mina dada nikabai reyadi, “Varika amiye, varedo vonisi, buni nigo.”

¹³Idu bi Lazarus muyeyo dada nigamo, adina ina vene yaku mokeyadi bi neota varedo mina niyo.

¹⁴Mina dada ni mona resi niyo, “Lazarus bi muyeyo,

¹⁵ma ya vene dada na bi ada reida na bi mironari de, mina ye mokena vari gira aeyaganedi. Ye ina rofu nenadi.”

¹⁶Ye Thomas (Kakafasina vo nidedi) ini usi dina raraga vene rofu niyo, “Una ka inasa bosi muyenadi!”

¹⁷Iesu okisi neideyo Lazarus bi sena guri aeyadi meda 4 niyo.

¹⁸Bethany bi Jerusalem atafu; ini maike bi kilometre regode kana.

¹⁹Jew vene tau bi Martha ma Mary ini tobaini muyena uka moi amuta regika okiyadi.

²⁰Ye Martha yaku Iesu baeyo neidesi yakusi baku regika neyo, idu Mary bi yavari ameyo.

²¹Ye Martha niyo, “Varika amiye, ya minari ameyagadu vonisi, nai tobaini bi muyena de reyagadu!

²²Idu gua na na diba beika Sei rofu usa nigiya bi ya mago.”

²³Ma niyo, “Yi tobaini bi dudusa dadi rae rego.”

²⁴Ye nikabai reyo, “Na na diba mina ari bae koina nigo dadi rae rena medari bi dudusa dadi rae rego.”

²⁵Ma niyo, “Na bi dadi rae rena ma vegu ameibobina. Kaere amiye na rofu mokena vari gira aego, bi muyego, idu vegu amebigo;

²⁶ma amiye tau gade amegasa na rofu mokena vari gira aegedi, bi toga de muyegedi. Mina rofu mokena vari gira aesa ba ide?”

²⁷Ma niyo, “Yo, Varika amiye; ya bi Keriso, Sei di mida, kaere bi konori dego, mina rofu mokena vari gira aeda.”

²⁸Martha makai niyo, usi dairi nesi ini rasini Mary raka nisi sui dudu niyo, “Oteimana amiye bi mini; ma ya nikaitegasa nido.”

²⁹Ma mina neideyori, evade maka dadisi ina rofu neyo.

³⁰(Iesu bi rautu dui rena kode, idu Martha ya baku reyo sanari toga amegamo.)

³¹Jew vene kaere yava ideri Mary di uka moi amuta regamadi, bi gokai evade maka dadisi yaku neyo, mina vegasa bi usi neyadi, adina mokeyadi bi guri sanari isaka nigi nedo.

³²Ye Mary yaku Iesu ameyo sanari nesi vegasa ini yuka adinari raudai resi niyo, “Varika amiye, ya minari ameyagadu vonisi, nai tobaini bi de muyeyagadu!”

³³Ye isaka isaka niyo ma Jew vene kaere inasa deyadi ka isaka nigamadi, mina vegasa bi ini uka ideri vima yaku maruo resi esika resi

³⁴nikaiteyo, “Goinari aeyadi?” Ma nikabai reyadi, “Varika amiye, baesi ve.”

³⁵Ye isaka niyo.

³⁶Ma Jew vene yaku niyadi, “Va vefa gokai ina uka maro!”

³⁷Idu bedakai yaku niyadi, “Ina yaku ne taufa amiye di ne moi areyo, idu mina amiye di muyena ka kebi rigi anua reyaidu ba?”

³⁸Ye Iesu dudusa ini uka ideri vima maruo resi guri sanari bae okiyo. Mina bi avana; ini ida vena bi fore dudu biri riyadi.

³⁹Kamini niyo, “Mina fore moi etagae rifa.” Ma Martha, muyena amiye di tobaini, yaku niyo, “Idu Varika amiye, mina kana medari bi sau no iniye, ini muyena bi meda 4 koina niyo dada!”

⁴⁰Ma niyo, “Na sena ya niyaka mokena vari gira aeyagadu vonisi, bi Sei di vabara veyaidu.”