Yohana 11:6-40

⁶Vyoyahuliche kota Lasalo mtamwa, kekala bahala hoyawele mazuwa gayage meli.

⁷Hamba nakawalonjela walanguswa wa heye, “Tucheni tuhiluche Yudeya.”

⁸Walanguswa nawamwidichila, “Mlangusa, kusemwa mhela udo hela Wayahudi vyowali wogana kukusubula na maganga, kahi kwangugana uhiluche kuko?”

⁹Yesu nakawalonjela, “Zuwa limwe lina saa kumi na meli, si ndo vyoili? Lelo heye yojenda kuzelu hochikwang'wala hebu, kwavila kanguwona uzelu.

¹⁰Ila wone munhu yojenda nechilo, kochikwang'hbwala, kwa vila kahela lumuli mgati mwa heye.”

¹¹Yesu nakalonga ago na konjezela, “Mganwa wa hetwe Lasalo kawasa, heni ndoluta ndikamwinule.”

¹²Walanguswa nawedichila, “Mkulu, wone yawasile kowa mkomu.”

¹³Yesu nayali yolonga mbuli ya kubagama kwa Lasalo, ila walanguswa hewo nawavizela kota Lasalo kawasa hela.

¹⁴Hamba Yesu nakawatubulila kalonga, “Lasalo kabagama.

¹⁵Ndangusangalala kwavila nasali ako ila mkunde. Lelo tucheni koyali.”

¹⁶Tomasi nayali yochemigwa mnyambili kawalonjela walanguswa wayage kalonga, “Tucheni na hetwe tukabagame hamawe na heye.”

¹⁷Yesu vyoyafichile, nakafika wamtilile Lasalo katali mazuwa gane nagakola.

¹⁸Betaniya kwali kutali kwa kota maili zidatu hino kulawa Yelusalemu.

¹⁹Wayahudi wenji nawoya kuwahembuliza Malita na Maliya kwa kufiligwa na lumbulyawo Lasalo.

²⁰Malita vyoyahuliche kota Yesu kanguya, nakaluta kumbochela, ila heye Maliya nakapona hakaye.

²¹Malita nakamlonjela Yesu, “Mkulu, na uwe baha, lumbulyangu hali bagama!

²²Ila ndivizela kota na sambi, Nguluwi kokupa choneche choumlanda!”

²³Yesu nakamlonjela Malita, “Lumbulyake heye kozilipuka kahi.”

²⁴Malita nakedichila, “Ndivizela kota kozilipuka kuli zuwa lya kuduma.”

²⁵Yesu nakamlonjela, “Heni nda uzilipulo na ukomu. Munhu yoneche yalingung'hunda, kowa mkomu Ila wone yabagame.

²⁶Na munhu yoneche yalingikala na kung'hunda hobagama hebu! Lelo kwangukunda aga?”

²⁷Malita nakedichila, “Ena Mkulu! Ndangukunda kota hegwe uli Kilistu Mlohozi, Mwana wa Nguluwi yalinguya muisi.”

²⁸Malita vyoyalonjile ago, nakahiluka mng'handa na kumchema lumbulye Maliya hafungo yaliyeka. Nakamlonjela, “Mlangusa koya, kangukuchema hegwe.”

²⁹Maliya vyoyahuliche ago, nakenuka na kubilimila kunze kumbochela Yesu.

³⁰Yesu nayali yang'hali kwinjila hali chijiji chila, nayali yang'hali hahala honhu Malita hoyamting'hanize.

³¹Wayahudi nawekale hamwe na Maliya womhoza vyowamuwene yokwinuka yolawa kunze, nawo nawenuka na kulawa kunze. Nawejesa kota kanguluta ko wamtilile Lasalo yakalile kahi.

³²Maliya vyoyafichile koyali Yesu na vyoyamuwene, nakafugama mmagulu ga Yesu, nakamlonjela, “Mkulu, na uwe baha, lumbulyangu nahambe yabagame!”

³³Yesu vyowamuwene Maliya yolila, na awala Wayahudi welongozase nawo wolila, nakawa na masinzo ng'hatu mnhumbula mwa heye na kwinjililwa na isungu.

³⁴Yesu nakawauza, “Mumuwika kohi?” Nawamwidichila wata, “Mkulu, uye ulole.”

³⁵Yesu nakalila mahozi.

³⁶Wayahudi nawalonga wata, “Mlole navyoyali yamganile lukami!”

³⁷Baho wanhu wanji nawalonga wata, “Hino hawele yuyu yamgubule meho ayula yohambe yalole? Nakalemwela ndaze kumdita Lasalo yaleche kubagama?”

³⁸Yesu vyoyali na isungu ng'hatu mnhumbula mwa heye, nakaluta kuli chilaga. Chilaga acho chali mhalika, kahi liganga likulu naliwichigwa hamlango.

³⁹Yesu nakawalonjela, “Muse iganga hali lwizi.” Malita, lumbulye Lasalo nakalonga, “Mkulu, kaluka kunhung'ha, kwa vila kawichigwa mchilaga lehano zuwa lya kane!”

⁴⁰Yesu nakamlonjela Malita, “Sikulonjele kota wone ukundile kowona ukulu wa Nguluwi?”