Gwa 11:6-40

⁶Giyagni wa jeminitka wa yayixinrinatka, wane rutukawa gepgogne wa rawanatyawaka.

⁷Giyagni wanepnute wane chinna yimaklene, “Gote gayanutnaka.”

⁸Yimaklene wane chinru, “Rawi, tyegognekakniko, raluka sotlujeretanyina Goteyone. ¿Waneklege pyanutnaka?”

⁹Rugita Geso, “Waneylu pagogne pamole gepi gora. Gogi yanini satu, gi wa rutspeta, gi rixanu tyechijne pokamlatachini reta.

¹⁰Wa satu goyechno yanini rutspeta, gi rixanu maleshlu pokamlalu waleya.”

¹¹Rali wane chinretinitka, wane chinna, “Lasarni, walukanru, rapnanutatka. Seyni wane nyanu. Nkomyekapanru.”

¹²Giyagni wane chinruna yimaklene, “Gitsrukaachi, rapnanutini, rutukanu.”

¹³Wa Geso wane chinre wale gipnaleya. Wa wanna kagwaklu wa rapnanushatinri rumkinriyapirana, china.

¹⁴Giyagni Geso wane chinatkana pgujetanwaka, “Lasarni gipnanatka.

¹⁵Numuwata gixa chinanu, gi wa wane nwanata, galixinripa. Seyni gayanutka wale yegi.”

¹⁶Giyagni Tomasu wa Gepirutu chinkaluru wane chinna ruyimakikolune, “Wane koxa gayanu wixa Waleyma wupninripa.”

¹⁷Giyagni rapokinitka Geso, rumatatkalu gepkoxamkojgognetkani kapnatikolutka.

¹⁸Wa Wetani gi gowukayatkalu Gerosale, mapa getko kilometroni.

¹⁹Gixo Goteyone ginyegitlo Marta ga wa Mariya yegwakluniyna rumnankapkana.

²⁰Giyagni Marta jeminitka Geso gininritka, tyoptotaplu. Ga wa Mariya panchi tuplanata.

²¹Giyagni Marta wane chinru Geso, “Gitsrukaachi, gewi pwanatkamka, gimka rupnanni nyegwakluni.

²²Xani koxa numatlu wa pejnuruko pagjityaplu Goyakalu, Goyakalu genekanyi.”

²³Wane chinro Geso, “Yotunotanu pyegwaklupa.”

²⁴Marta wane chinru, “Numatlu yotunotinripa yotunkoklunchipa ralipregognepa.”

²⁵Wane chinro Geso, “Gitni wa yotunru ga wa giweklu. Wa nalixjeru rupnanmaka, ruwekanu.

²⁶Pejnuruneko giwekachine nalixjene gi pagogneko rupnanna. ¿Gi ge palixlu tye?”

²⁷Wane chinru, “Gigi, Gitsrukaachi. Nalixatka gita Pixni wa Kristoyi, Goyakalu Wgenyi, tyechijne ginachriyi.”

²⁸Tali wane chinretinitka, talimta. Pochkeroko tomgalo tepuro Mariya. Wane chinro, “Gewitkalu Yimaklewatachri. Repukyi.”

²⁹Wala jeminitka, giyampotu tpalnamta. Tyayegitlu.

³⁰Gi wa pokchi rapokawa Geso, seyni wa Marta yoptotapyawakaklu rawanata.

³¹Giyagni Goteyone panchi gwanatachine walayma tumnanukanatjene, wa retinitkalona Mariya tunwamtinritka giyampotu, tushpakamtatka, romkagimtlona. Kagwakna wa yomlechi tyinripa wane chiyamtapinripa.

³²Giyagni Mariya tapyegitinitkalu Geso, tetinri, chiji tapokamta gijixistsi. Wane chinru, “Gitsrukaachi, gewi pwanatkamka, gimka rupnanni nyegwakluni.”

³³Giyagni Geso wa retinro chiyagatachro, ga wa walayma ginachine Goteyone chiyaganatachine jigekanuwata ginshinikanuya. Kojwakanshinikanuta.

³⁴Wane china, “¿Ginaka gitakanru?” Wane chinruna, “Gitsrukaachi, punanu. Petapanru.”

³⁵Chiyagata Geso.

³⁶Giyagni wane chinna Goteyone, “¡Getanru! ¡Gi pagaluklenanukta rixlu!”

³⁷Wanna pimrine wane china, “¿Gi ge rumkatlu wa Tye wa maygaletu gimrekgakakachri, gituukakletlu wale ma mupninitipa?”

³⁸Giyagni Geso jigekanuwatatnaka Walenanuko. Yomlechi yegi rapoka. Gitawakapnani, sotlu gishyatkaluru.

³⁹Wane china Geso, “Gkoschekanru sotlu.” Marta, wa gipnachri gepuro wane chinru, “Gitsrukaachi posunatkalu, gi rixanu gepkoxamkojgognetkani.”

⁴⁰Geso wane chinro, “¿Gi ge wane nchinyi, palixini petanru Goyakalu goyaknu?”