Juan 11:6-40

⁶tru Lázarobe kwanrrø tsun taingucha, tru nø tsuinug katøgucha Jesúsbe pa kwaløm srarrabig køn.

⁷Incha nøbe nui kusrenanøb pera uniilan trenchibig køn: —Judeasrømay katø amun— cha.

⁸Inchene nømbe trenchiptinchibelø køn: —Kusrennøbig, judíosmera trusrø yamba ñun srug muta, peta ñun kwetchab inchib kuig yandø yanatø køben, ¿trusrømay katø inrrapteh?— cha.

⁹Inchene Jesúsbe trenchibig køn: —¿Kan mawabe doce uras tøgaig kømuitarru? cha. Pøs, kan kwaløm uñibiibe srurrengwamøn cha, kaguende yu pirau tør pilimba.

¹⁰Trune kan yem uñibiibe srurrengwanrrun cha, kaguende yembe tør chigaig løstiig kua.—

¹¹Inchabe katø Jesúsbe trenchibig køn: —Lázaro namui trendø asiibe kiain køn cha. Inchendø nabe nun kasrønanrrab inrrab— cha.

¹²Inchene nui kusrenanøb pera uniiløbe trenchibelø køn: —Señor, trube, kiptø tsuibe, treebe tammisrtrab kuinrrun— cha.

¹³Jesúsbe Lázaro kwain køn cha waminchib pasrøben, trune nui kusrenanøb pera uniiløbe: “Ka kib tsun” chitanmab isua pønrrabelø køn.

¹⁴Inchabe Jesúsbe tørgandø trenchibig køn: —Lázarobe kwabguen indan cha.

¹⁵Nane ñimuimburappe tabguen køtan chibig køn, truyu na mu kaagúikkurri, kaguende trumaybe ñim nan kørenrrain cha. Trube, nun ashchab amun— chibig køn.

¹⁶Inchene Tomás, tru Gemelo taibe, tru katøgan kusrenanøb pera uniilan trenchibig køn: —Namgucha, trube, amun cha, nøba kegøtø kwanrrab.—

¹⁷Incha Jesús puabe, Lázarone sørig chabguen pib kwalømguen purayain kuin kui ashibig køn.

¹⁸Betaniabe Jerusalén pulutø købig køn, truyugurri kan pøn kilómetro køsrønsrø.

¹⁹Inchen judíosmerabe Martanba, Maríanba nuchag kwain køben menrra isui inchimønrrai, lincha purrønrrab truba yam amrruin købig køn.

²⁰Inchen Martabe Jesús pub arrun taig mørøppe, katønrrab webiben, trune Maríabe yau ka kørrømisrøbig køn.

²¹Inchabe Martabe Jesúswan trenchibig køn: —Señor, ñi yu tsuig kuinguen nai nuchag kwamumba cha.

²²Inchendø møingucha Tiuswan ñi chi miabendø, trannrrab kui ashar— cha.

²³Inchene Jesúsbe Martane trenchibig køn: —Ñui nuchaabe katøle øsiiranrrun— cha.

²⁴Inchen Martabe trenchibig køn: —Nabe ashaweim pasrar cha, tru kwabelø srabe kwaløm katøle øsiiraben, Lázarobe øsiirabwei inchab kui.—

²⁵Inchene Jesúsbe nune trenchibig køn: —Katøle øsiiramiba, øsig kømibabe na kur cha. Nan kørebiibe kwawagucha, øsig kønrrun cha.

²⁶Inchen mutøgucha øsig uñibig nan kørebiibe managucha kwanrraamøn chibig køn. ¿Iigwan køretirru?— chibig køn.

²⁷Inchene Martabe trenchibig køn: —Nai Señor, øø, cha. Ñibe tru Cristowein kuin kui kørewa pasrar cha, tru Tiuswei Nusrkai yu piraumay attrabig købig.—

²⁸Truigwan chab trenchabe, Martabe numøsrai Marían wamønrrab ya, nundø nilø trenchibig køn: —Kusrennøbiibe yu pua, ñun waman— cha.

²⁹Inchen Maríabe møra mallatø kurra, Jesúswan ashchab ibig køn.

³⁰Inchen Jesúsbe katøgucha puebloyu pumø, tru Marta katinuutø srø pasrabig køn.

³¹Inchen María truba mallatø kurra, webyai ashippe, judíosmera tru yau nun menrra isui inchimønrrai lincha purrabeløbe wendautø ambubelø køn, sørin tulsrø kishchab yaitamab isua.

³²Inchen Maríabe Jesús pasrainug puabe, nui merrab trenchib tømbønsrøbig køn: —Señor, ñi yu tsuig kuimbe, nai nuchag kwamumba— chib.

³³Inchen Jesúsbe Maríaba, katø tru lincha amrrubelø judíosmeragucha kisi ashabe, nuinetø truba truba isui inchibig, kan mandøguen kømui inchib køn.

³⁴Incha nømun trencha payibig køn: —¿Chu sørøgue?— cha. Inchene nømbe: —Señor ashchab amø— chiben,

³⁵Jesúsbe kishibig køn.

³⁶Inchen judíosmerabe trenchibelø køn: —Au, truba undaguig kwaasøna— cha.

³⁷Inchen møiløgøsrønbe nømdø trenchibelø køn: —I møg tru kab ashmíigwanma tamarøbiibe, ¿Lázarongucha kwamønrrai inchibsrumøshta?— cha.

³⁸Inchen Jesúsbe katøle nuinetø truba truba isuim pasrøwa, tru sørinug kemallibig køn. Truibe kan nu trab købig køn, kebambinuube kan nu sruutøga kasraikke.

³⁹Inchene Jesúsbe trenchibig køn: —Srugwan kusruy— cha. Inchen Marta tru kwabigwei nuchaabe trenchibig køn: —Señor, yandø irrøraig kuinrrun cha. Kaguende kwaibe chabguen pib kwalømguen køn— cha.

⁴⁰Inchen Jesúsbe nun trenchibig køn: —¿Yamba na ñun trenchib mørgøppeh cha, ñi nan kørewabe, Tiuswei tørguegwalmabigwan ashchabguen?— cha.