JUAN 11:6-40

⁶no chene won Ne diiz ne rzhuun Laser, wkaar Ne stxup gbiz nga ledne ka Ne.

⁷Zhich guin re Ne lo yra xpén Ne: ―Yoo tsa be Judea ste.

⁸Lex re yra xpén Ne lo Ne: ―Maxter, naandxegueree nga wlaan yra men-Israel ngugye men de nesro; ¿no le de rlaangue tsa ste?

⁹Orguin re Ne lo men: ―¿Pe let chibtxupdet or rak te dxe? Men ne rzaa yedxe bat rakadet nii men, porke nuu bnii ne rzenii gyëzlyu;

¹⁰per le men ne rzaa gyëël, noze ledne rakatee nii men, porke nyeniidet.

¹¹Wluzhse re Ne zenga, lex re Ne: ―Le xmig be Laser che waguees, per orree tsaloo noo mkaal lo men.

¹²Lex re yra xpén Ne: ―Dechey, belne che waguees men, nuu beey syaken men.

¹³Per diiz guin ne re Ne rna we ne che wet Laser, le yra xpén Ne nuu lextoo pazer noze waguees Laser.

¹⁴Orguin re Ne: ―Nligue yna noo lo de, che wet Laser.

¹⁵Per rzhiilen noo ne yët noo no, porke zenga wendee por laa de yra de, chen ylaleedx de noo. Yoo tsa be wii lo men gan.

¹⁶Lex re Tmazh ne rnii mén Mzhoz lo stebëd xpén Ne: ―Yoo tsa be no be, chen guet be yra be Jesus.

¹⁷Chene wdxiin Jesus Betania, che wluzh tap gbiz wgueedx Laser.

¹⁸Guex Jerusalén nak Betania, zeg tsonegue kilometro ryano.

¹⁹No ndal men-Israel wa wanino Mart yrup Mart Mli por ne wet Laser bzaan men.

²⁰Chene waknan Mart ne le Jesus che mer ydxiin, wruu Mart watsëlnëz Mart Jesus, le Mli wyan ruyuu.

²¹Lex re Mart lo Jesus: ―Dechey, belne nako ne ka de nee, nyetet bzaan noo.

²²Per che nan noo ne mase orree slaa Dëdyuzh yrandxee ne ynab de lo Ne.

²³Wke Jesus, re Jesus: ―Sban bzaan de.

²⁴Orguin re Mart: ―Che nan noo ne sban men chene yban mengut chene che lultim dxe.

²⁵Lex re Jesus: ―Noo nak men ne rneban mengut no noo ke nak men ne rseleedx gyelembán lo mén. Mén ne rlaleedx noo, mase guet men, per sbán ke men.

²⁶Yrandxee mén ne mbán, belne rlaleedx men noo, nunk guetet men. ¿Pe rlaleedx de neree?

²⁷Wke Mart, re Mart: ―Rlaleedx noo we Dechey; rlaleedx noo ne laa de nak Crist ne rap degne chiid gyëzlyu, laa de nak XPee Dëdyuzh.

²⁸Wluzh re Mart zeree lo Jesus, lex wa men waluu men diiz lo Mli bël men, ngueedxendxee re men lo Mli: ―Le Maxter che wlenza, laa de rbëz Maxter.

²⁹Zegne won Mli zenga, wzuligue men za men lo Jesus.

³⁰Gardet tee Jesus lenlgyëz, benak zu Ne ledne wtsëlo Mart Ne.

³¹Chene wii yra men-Israel ne ndxinnino Mli ruxyuu Mli ne noze ryob rdxiintee za Mli, wrunal men Mli; nuu lextoo men pazer ruxbaa bzaan Mli za Mli goon Mli.

³²Chene wdxiin Mli ledne zu Jesus, wzuzhib Mli lo Ne, re men: ―Dechey, belne nako ne ka de nee, nyetet bzaan noo.

³³Ne wii Jesus ne roon Mli no ne roon yra men-Israel ne zanal Mli, axtegue nandet Ne pe wuu lextoo Ne, wdenles lextoo Ne;

³⁴lex wnabdiiz Ne lo men, re Ne: ―¿Pazh wguu de men? Orguin re men: ―Dechey, gutaa tsa be wii gante.

³⁵Woonegue Ne.

³⁶Lex re men-Israel: ―Gukwii gante pezee ryaan men Laser.

³⁷Per le gwrol men re: ―Ménree nga wlaa ne wyenii bzalo menngwlëë, ¿pe bet wakdet nlaa men chen nyetet Laser?

³⁸Kesentyent wdenles lextoo Jesus ste, wbig Jesus ruxbaa Laser; te bluu nako, te gye zemzëë we.

³⁹Lex re Jesus: ―Gugyitxee gye gwa rubaa. Orguin re Mart bzaan mengut guin: ―Dechey, pazer che ndxiin rree men, porke che wluzh tap gbiz ne wet men.

⁴⁰Wke Jesus, re Jesus: ―¿Pe let che nadet noo lo de ne belne rlaleedx de noo, swii de xgyelenzoon Dëdyuzh?