San Juan 11:6-40

⁶Tees ornu bri raso̱o̱ nu riib rat Lázaro, orzeꞌ byeeñ mi se cyup dzi lugaar zeꞌ nu rcyiiñ mi zeꞌ.

⁷Na ornu bded cyup dzi zeꞌ, orzeꞌ nam rab mi de yu nu rsyaꞌ lom: ―Yaa gaꞌ der gyan Judea tuubaꞌ tir ―nam.

⁸Orzeꞌ na de yu nu rsyaꞌ lom: ―Masht, ¿a walab nu sa ñuu, de mbecy Israeel bicy pee dey ngoow gyitaꞌy ru gashtal ñgyat lar? ¿Walab gaal rlagy ru gya gaꞌr tuubaꞌ tir? ―na dey.

⁹Orzeꞌ na Jesuuz: ―¿A walab rishli nu trocyup or ndeꞌ yuꞌ yaa nañ tub dzi? Benu ca na tub mbecy rded yu zeꞌ nu yuꞌ yaa, orzeꞌ waglagy gyiꞌy, gun rzac dey ya̱, biñ nu rbic yaa lo de mbecy gyishlombecy ii.

¹⁰Tees benu rded yu rel, orzeꞌ rlagy gyiꞌy, gun sac yaa nu gzac yu.

¹¹Orzeꞌ na gaꞌm: ―Lázaro, amig ni den, gush pcaal yu, tees na cha̱ gun cueeña̱ yu ―nam.

¹²Orzeꞌ na gaꞌ de yu nu rsyaꞌ lom: ―Shuaan de̱, benu nas yu, ¿orzeꞌ yaruuñ nu gruu nap yu shiñ? ―na dey.

¹³Tees riidz ni Jesuuz yaruuñ nu gut Lázaro, tees de yu nu rsyaꞌ lom guzii dey nu mniim nu nas ziꞌl yu.

¹⁴Orzeꞌ Jesuuz naal la mniim lo dey. Orzeꞌ nam: ―Gut Lázaro.

¹⁵Tees nu nac de ru yet lagya̱ nu saca̱ loy, gun orzeꞌ gyicy cup der consuel lo̱. Yaa der chan lo cuerp na ―nam.

¹⁶Orzeꞌ Tomaas, yu nu rnii dey cuach, nay rab yu deꞌ zir de yu nu rsyaꞌ lo Jesuuz: ―Yaa der cha dun masht nin, gun orzeꞌ gat den tublaazh dun mi ―nay.

¹⁷Na ornu bri Jesuuz Betania, orzeꞌ briic mbecy nu gad lagy mi nu bi gut Lázaro nunu bi bzaꞌ tap dzi nu ri cuerp niy gyerbaa.

¹⁸Betania, ndeꞌ tub chon miily metr nu zet riñ nu Jerusaleeng.

¹⁹Nunu zigy de mbecy Israeel za güii dey Mart nu Li nu cuic dey consuel ni deñ nu nac nu gut zan ñi.

²⁰Na ornu güeñ Mart nu bi zaab riidz nu bi yeed Jesuuz, orzeꞌ za cheel ñim. Tees Li byeeñ ñi yuꞌ.

²¹Orzeꞌ na Mart rab ñi Jesuuz: ―Shuaana̱, bicy na nu zur ii, orzeꞌ cueꞌ ñgyat zana̱.

²²Tees rad lagya̱ nu mas na, Ñgyoozh gyicy mi la ziꞌl coz nu cyiñ ru lom ―naañ.

²³Orzeꞌ na gaꞌ Jesuuz rab mi Mart: ―Zan ru gyabañ yu tuubaꞌ tir ―nam.

²⁴Orzeꞌ na gaꞌ Mart: ―Bi rad lagya̱ nu gyabañ ñi ornu gyabañ de añ ornu shuub dzi nu gyaꞌ lo gyishlombecy ii ―nañ.

²⁵Orzeꞌ na gaꞌ Jesuuz rab mi ñii: ―Ya̱ naca̱ biñ nu gyicy nu gyabañ de añ, nunu naca̱ biñ nu gyicy nu cui mbañ de mbecy. Orzeꞌ cyu ziꞌl mbecy nu gyicy cup consuel lo̱, mas gat yu, tees cui mbañ yu.

²⁶Cyu ziꞌl mbecy nu gabee mbañ, benu gyicy cup yu consuel lo̱, orzeꞌ yu zeꞌ rishli gaal wataꞌy. ¿A rzeña lagy der de nu ndeꞌ Mart? ―nam.

²⁷Orzeꞌ na gaꞌ Mart: ―Laab Shuaana̱, rzeña lagya̱ nu ru nac ru Mesías, iꞌñ Ñgyoozh, biñ nu ca lo cuen nu cyid gyishlombecy ii ―nañ.

²⁸Na ornu blazh mnii Mart de riidz zeꞌ, orzeꞌ bish cyañ yaañ. Orzeꞌ dze ga bredz ñi bily ñii Li. Orzeꞌ nañ: ―Masht bi yeed gaab mi nunu rbedz mi ru nu char lom ―naañ.

²⁹Na ornu güeñ Li riidz zeꞌ, orzeꞌ lueg la wes suñ zañ lo Jesuuz.

³⁰Zeꞌ Jesuuz gaal zi nigul chuꞌm ruꞌ gyedz, sinu gabee zum lugaar zeꞌ nu bdzeel mi Mart.

³¹Na de mbecy zeꞌ nguaay yuꞌ Li nu rbic dey consuel niñ. Ornu bzaac dey nu dzach wes suñ zañ, orzeꞌ za ca dey ich ñi, gun mnii too dey nu zañ nu gun ñi ruꞌ baa ni zan ñi.

³²Na ornu bruꞌña Li lugaar zeꞌ nu zu Jesuuz, orzeꞌ cuanzir nu bzaac ñim, orzeꞌ bdugyiñ yee lañ yeñ gyiꞌm. Orzeꞌ nañ: ―Shuaan de̱, bicy na nu zur ii, orzeꞌ cueꞌ ñgyat zana̱ ―nañ.

³³Na ornu bzaac Jesuuz nu dzi ruun Li gal nu de mbecy nu bruꞌña nuñ, orzeꞌ tonaꞌ la shni guc añ nim nunu gyi la byash lagy mi.

³⁴Orzeꞌ nam rab mi dey: ―¿Ca lugaar pcach der yu? ―nam. Orzeꞌ na gaꞌ dey: ―Shuaan de̱, da güiir ―na dey.

³⁵Orzeꞌ biiñ Jesuuz.

³⁶Orzeꞌ na de mbecy Israeel: ―¡Güii ñuu la! ¡Razañ lagy yu Lázaro! ―na dey.

³⁷Tees yuꞌ de mbecy zeꞌ nay: ―Yu ii bicy yu nu rzac mbecy lo caꞌ. ¿A walab nu ñgyac ñgyicy yu tub mod nu cueꞌ ñgyat Lázaro? ―na dey.

³⁸Orzeꞌ Jesuuz tonaꞌ la shni guc añ nim tuubaꞌ tir. Orzeꞌ zam ruꞌ baa. Baa zeꞌ, ndeꞌ tub blyuu. Nunu psoow dey ruꞌñ nu tub gyitaꞌ ily.

³⁹Orzeꞌ na Jesuuz: ―Byash der gyitaꞌ re ―nam. Orzeꞌ na Mart, zan yu nu gut zeꞌ: ―Shuaan de̱, dzi bi byafert tiꞌ gun bi rac tap dzi nu pcach de̱ ñii ―nañ.

⁴⁰Orzeꞌ na gaꞌ Jesuuz rab mi ñii: ―¿A walab bi mne̱e̱ lor, benu gyicy cup ru consuel lo̱, orzeꞌ gzac ru gyel lily ni Ñgyoozh? ―nam.