IOANE 11:6-40

⁶A ena gorere sivaraina e kamonai, bena dina rua una gabu ai e noho;

⁷gabeamo ia ese eha hahediba e hamaorodia eto, Iudea aita lou henia.

⁸Idia eto, Rabi e, vanegai mo Iuda taudia ese nadi amo e hodomu toho, harihari una gabu ma ba lou henia o tomu a?

⁹Iesu e haere, eto, Dina ta ena hora na dia gwauta-rua a? Dina ai e loaloamu tauna na se hekwakwanaimu, badina be ia ese ina tanobada diarina e itaiamu.

¹⁰A hanuaboi ai e loaloamu tauna na e hekwakwanaimu, badina be ia lalonai diari na lasi.

¹¹Unu e gwau toma, bena e hamaorodia, eto, Turada Lasaro na e mahutamu; a lau ainala, baina ha haoa.

¹²Hahediba eto, Lohiabada e, baine mahuta, bena ma baine goada.

¹³Iesu ese ena mase e gwauraia, to idia banava eto ia na laḡa-ani mahutana e herevalaia.

¹⁴Taunabunai Iesu ese e hamaorodia ḡoevaḡoeva, eto, Lasaro na vada e mase;

¹⁵bona umui daimui ai na moalemu lau na dia unuseni ai; unu amo umui ese do bavabidadama henigu. Vada aitala dekena.

¹⁶Bena Toma, e nemaia Hekapa, ese hahediba oredia e hamaorodia, eto, Ita danu aitala, ia ida baita mase hebou.

¹⁷Iesu e kau, bena e kamonai Lasaro tau-anina na dina hani gara ai vada e mia.

¹⁸Betania bona Ierusalem padadia na dia daudau, maila rua sisivana;

¹⁹taunabunai Iuda taudia hutuma na Mareta bona Maria dekedia ela, taudia ihalodia, taihudia e mase dainai.

²⁰Mareta na Iesu e maiva herevana e kamonai, bena ia na ela Iesu ida bae hedavari; a Maria na ruma ai e noho.

²¹Bena Mareta ese Iesu e hereva henia, eto, Lohiabada e, oi na iniseni ai boma noho, taihugu na basinema mase;

²²to vada dibagu ina harihari Dirava enai ba noia ḡauna na Dirava ese baine henimu.

²³Iesu eto, Taihumu na baine tore isi lou.

²⁴Mareta eto, Dibagu dina gabena ai, tore-isi-lou dinana ai, ia na do baine tore isi lou.

²⁵Iesu eto, Tore-isi-lou be lau; mauri danu lau; lau e abiabiraigumu tauna, ena be baine mase, to do baine mauri.

²⁶E maurimu bona e abiabiraigumu taudia iboudiai na basie mase, lasi ona lasi vaitani. Ina hereva na o abia daemu a?

²⁷Hahine na e haere, eto, Lohiabada e, oibe; vada name kamonai lava dae, oi na Keriso, Dirava Natuna, e gwauraia gunava tanobada ai bainema tauna.

²⁸Ia na unu e gwau toma, bena ela, tadina Maria e boiria hehuni, eto, Hahediba tauna vada ema; ia ese oi e boirimumu.

²⁹Maria ese una hereva e kamonai, bena e tore isi haraḡa-haraḡa, ia dekena ela.

³⁰Una negana ai Iesu na hanua lalonai do se raka vareai, a Mareta ida e hedavari gabuna ai e nohova.

³¹Taunabunai, Iuda taudia, Maria ida ruma lalonai e nohova e hamarumaruava taudia, ese Maria e itaia, e tore isi haraḡa-haraḡa, e raka lasi; bena idia ese e ḡavaia, badina be idia banava eto ia na gara bainela, mase tauna taina baine tai.

³²A Maria na Iesu e nohova gabuna ai e kau, e itaia, bena aena badinai e goru diho, eto, Lohiabada e, oi na iniseni ai boma noho, taihugu na basinema mase.

³³Maria bona hari Iuda taudia ia ida e raka hebouva na e taiva; bena Iesu ese e itadia, ia lalona e hisihisi bada, darana e doko.

³⁴Bena e henanadai, eto, Edeseni ai o atoa? Idia e haere, eto, Lohiabada e, aoma, a itala.

³⁵Iesu vada e tai.

³⁶Bena Iuda taudia eto, A itaia, ia ese e lalokau henia bada.

³⁷A haida eto, Ina mata-kepulu matana e hapapa tauna na ina tau ena mase ilao-ahuna asi dibana a?

³⁸Iesu lalona ma e hisihisi lou; bena ia na gara ela. Una gara na kohua; iduarana ai nadi ta vada e kurea ahu.

³⁹Bena Iesu eto, Nadi a kurea oho. A Mareta, mase tauna taihuna, eto, Lohiabada e, ia na vada eme bodaga, badina be dina hani vada e mase.

⁴⁰Iesu ese e haere henia, eto, Lau na hamaoromu, ani, ba heabidadama, bena Dirava hairaina do ba itaia.