Yohanes 11:6-40

⁶Ma di A yere tak' Lasarus e siki, A tan ete tu dei na a presi pe A ben de.

⁷Baka den tu dei, A taigi den man fu En taki: “Kon meki un drai go baka na Yudea.”

⁸Ne den man fu En taki: “Ma Meister, a no langa di den Dyu ben wani ston Yu kiri. Dan Yu wani drai go drape baka?”

⁹Yesus piki den taki: “Twarfu yuru fu wan dei na deiten. Efu wan sma e waka deiten, a no e stotu en futu, bika a e si pe a e go.

¹⁰Ma efu a e waka neti yuru, a e stotu en futu, bika ensrefi no abi faya.”

¹¹Baka di Yesus taki a sani disi, A taigi den moro fara taki: “Un mati Lasarus e sribi, ma Mi e go wiki en.”

¹²Dan den man fu En taigi En taki: “Ma Masra, efu a e sribi dan a o kon betre baka.”

¹³San Yesus ben wani taki, na tak' Lasarus dede. Ma den man fu En ben ferstan tak' na sribi Lasarus e sribi.

¹⁴Ne A taigi den krin taki: “Lasarus dede.

¹⁵Ma Mi breiti gi unu tak' Mi no ben drape, bika now a bribi fu unu kan kon moro tranga. Kon meki un go na en.”

¹⁶Wan fu den man fu Yesus di ben nen Tomas, ma den ben e kari en Didimus tu, taigi den trawan taki: “Kon meki un go, dan un dede nanga En.”

¹⁷Di Yesus doro, A kisi fu yere tak' Lasarus ben beri fo dei kba.

¹⁸Betania ben de krosbei fu Yerusalem, a no ben doro dri kilometer srefi.

¹⁹Furu fu den Dyusma ben kon na Marta nanga Maria fu trowstu den fu di den lasi den brada.

²⁰Di Marta yere tak' Yesus e kon, a waka go miti En. Ma Maria tan sidon na oso.

²¹Dan Marta taigi Yesus taki: “Masra, efu Yu ben dya, mi brada no bo dede.

²²Ma aladi a dede kba, mi sabi tak' Gado o gi Yu ala san Yu e aksi En.”

²³Dan Yesus taigi en taki: “Yu brada o kon na libi baka.”

²⁴Marta piki taki: “Mi sabi tak' a o kon na libi baka tapu a laste dei, te ala dedesma o opo baka.”

²⁵Yesus taki: “Na Mi e wiki dede èn na Mi e gi libi. A sma di e bribi na ini Mi sa libi, awinsi a dede.

²⁶Èn iniwan sma di e libi èn di e bribi na ini Mi, no sa dede noiti moro. Yu e bribi dati?”

²⁷Marta piki En taki: “Iya Masra, mi e bribi tak' Yu na a Mesias, a Manpikin fu Gado di bo kon na grontapu.”

²⁸Di Marta taki disi, a drai go kari en sisa Maria, dan a taigi en saf'safri taki: “A Meister doro. A seni kari yu.”

²⁹Di Maria yere dati, a opo wantron go na Yesus.

³⁰Yesus no ben doro ini a dorpu ete. A ben tnapu ete pe Marta ben miti En.

³¹Den Dyu di ben de nanga Maria ini a oso fu trowstu en, si fa a opo es'esi go na dorosei, dan den waka go na en baka. Den ben prakseri tak' na krei a e go krei na a grebi.

³²Di Maria doro pe Yesus ben de èn a si En, a fadon tapu en kindi na En futu, dan a taki: “Masra, efu Yu ben dya, mi brada no bo dede.”

³³Di Yesus si fa Maria nanga den Dyu di kon nanga en e krei, A soktu dipi. Dan nanga dipi sari

³⁴A aksi den taki: “Pe un beri en?” Den piki En taki: “Masra, kon meki un sori Yu.”

³⁵Dan Yesus krei.

³⁶Ne den Dyusma taki: “Ai, yu kan si tak' A ben lobi en.”

³⁷Ma sonwan fu den taki: “Efu a Man disi ben man meki a breniman si baka, fa A no ben kan meki a man disi no dede?”

³⁸Yesus soktu baka dan A waka go na a grebi. A ben de wan bergi-olo èn a mofo fu en ben tapu nanga wan ston.

³⁹Dan Yesus taki: “Puru a ston!” Ma Marta, a sisa fu a wan di dede, taki: “Masra, a musu e smeri, bika na fo dei a dede kba.”

⁴⁰Ma Yesus taigi en taki: “Mi no taigi yu tak' efu yu e bribi, yu o si a glori fu Gado?”