Johane 17

1

2

3

4

5

6

7

8

9

10

11

12

13

14

15

16

17

18

19

20

21

¹Jesu e dâŋ i mutararâ sambâŋko fime feha ʒiŋuc muhuc numuwec: “Mamac, dameŋ maickekac. Go Ŋokâgere huriri qâreŋ bâfuatec Ŋokâzi iŋuc jaha gore huriri qâreŋ bâfuazejec.

²Go e mâreŋ sâc ŋic jaŋere rusâko râemeŋ, ehuc ŋic erao râec‐jopameŋ sâc jaŋe juju sanaŋ bâfua‐jareocte mucnemeŋ.

³Juju sanaŋte fuŋne ine ʒiŋuc fokac: Go Anutu fârine mocjaha â soremeŋ, Jesu Kristo hâcne, ŋic jaŋe iŋuc mana tarac‐nâfopie juju sanaŋ fua‐jareocmu.

⁴Gie munaremeŋ i baku batarape mâreŋko huriri qâreŋge fuakac.

⁵O Mamac, mâreŋ mi fuahame gohec sambâŋ tatamac‐nanehec jupo, ijaha ʒi mocwâc bârisie‐naretec rojuzepac.

⁶“Guru sâkoonec ŋic nore bâwosâec‐jopameŋ jaŋe biŋedâŋge mujaŋgeŋke‐jarepo. I gore biŋe juhapie nore qikiŋ‐jopameŋ, eme jaŋe gore dâŋ ropie maŋjeŋic ewec.

⁷Wiac fonarekac i goraonec sasawa, jaŋe i mana taraŋgopieŋ.

⁸Go dâŋ naremeŋ i jarepe ro sakarec embiŋ. Ehuc goraonec wahapo i manapaŋkembiŋ, â go gahac gie munaremeŋ i mana ʒakiembiŋ.

⁹“No jaŋere erâ numu‐garekopac. Miti tâmiric jaŋere erâ mi numu‐garekopac, naremeŋ jaŋere sawa erâ numu‐garekopac, jaŋe gore biŋe hâcne.

¹⁰Nore biŋezi gore biŋe â gore biŋezi nore biŋe. Eme maŋjeŋicko huriri qâreŋ‐nane fuawec fokac.

¹¹No mâreŋko juju‐nane tarakac, jaŋe ine mâreŋko ʒuhuckerâ juhapie no gorao fâzo ekopac. Tiri Mamac, biŋedâŋge naretec jazapo, eme go hemiriŋ‐jopatec dâŋ irec maŋnao junʒepieŋ. Eme nâhâc maŋ mocjaha juekoperec, iŋuc jaha jaŋe maŋ mocjaha junʒepieŋ.

¹²Jaŋehec jupo sâc biŋedâŋge naremeŋ izi hemiriŋ‐jopape irec maŋnao jumbiŋ. Ehuc soŋaŋ‐jopape moc mi sifuckembiŋ. Dâŋqâreŋ sanaŋkeocte hârâcte biŋe mocjahazi sipirickewec.

¹³Ʒi gorao fâzo ehuc ʒira mâreŋko dâŋ iŋuc gazape nore bubiaŋzi jaŋerao fotâcnerâ ɋârâŋkeme bajunʒepieŋ.

¹⁴No dâŋge jarepe bajupie mâreŋte biŋe jaŋe qaisoc‐jopaeŋgopieŋ. No nahac mâreŋte biŋe mi juekopac, iŋuc jaha jaŋe mâreŋte biŋe mi jueŋgopieŋte iŋuc hâcne ejareeŋgopieŋ.

¹⁵Go mâreŋkonec rocjopacmurâ mâcne, sâqocnere ŋezic‐jopacmurâ gazakopac.

¹⁶No gâtâ‐nane mâreŋko mi bawec, iŋuc jaha jaŋe gâtâ‐jeŋic mâreŋko mi bawec.

¹⁷Gore dâŋ fâri qizecnezi maŋjeŋic furu batec fozejec. Gore mitizi dâŋ fâri qizecne hâcne.

¹⁸Goki no mâreŋko gie munaremeŋ, iŋuc jaha noni jaŋe mâreŋko gie mujarepo.

¹⁹Jaŋe dâŋ fâri qizecnezi maŋjeŋic furu bame juniŋte no nahac wâc jaŋere erâ maŋsahac‐nane bâtirirâ râekopac.

²⁰“Erâ no jaŋere sawa mi numu‐garekopac, miti jazapie manasiŋnuniŋmu jaŋere mâmâc numu‐garekopac.

²¹Jaŋe maŋwirec erâ juniŋte gazakopac. Mamac, go no maŋnuekic â noni go maŋguekopac, iŋuc jaha jaŋe nâhâc maŋnâfonʒepieŋ. Iŋuc epie miti tâmiric jaŋe gahac sorecnutec wahapo i manapaŋkenʒepieŋ.

²²Nâhâc maŋ mocjaha juekoperec, iŋuc jaha jaŋe maŋ mocjaha erâ junʒepieŋ. Iŋuc juniŋte hâcne huriri qâreŋ naremeŋ ijaha jarepo.

²³No maŋjopahape go maŋnutec jaŋe maŋzi ʒâʒâfic ehuc hâcbuc erâ junʒepieŋ. Iŋuc jupie miti tâmiriczi goki sorecnutec wahapo i mana ʒakienʒepieŋ, â no maŋzi ʒâficnuhuc jaŋe mâmâc ʒâfic‐jopaekic, i wâc manapaŋkenʒepieŋ.

²⁴Mamac, naremeŋ ŋic i jaŋe no jupemuoa juniŋte mukopac. Eme mâreŋ hobeteŋne mi fuahame maŋjauŋ enarehuc sambâŋ tatamac tahacnumeŋ, i hâcne nohec juhuc hone aŋac enʒepieŋ.

²⁵Mamac, tiŋne rune, ŋic jaŋe mi mana taracgumbiŋ, noni ine mana taracguekopac, erâ kikefuŋfâc‐nane jaŋe gahac sorecnutec wahapo i manapaŋkeeŋgopieŋ.

²⁶No biŋedâŋge mutaniŋke‐jarepo erâ mutaniŋke‐jarehuc jupemu. Eme maŋjauŋ no enaremeŋ ijaha jaŋerao fome maŋjopahuc jupemu.”