Yowan 11:6-40

⁶bong ye kene yo ilongo betanga be Lasarus in matamatenge mai ikauu nga, ngan le ila tarai tiap. Iyepe ye ke ru mulu ye malala tani yo iyepe ye i.

⁷Le nga ke ru tina ngan imot, motong la iwete pang di galiunu nen, “Ai, nga ole tamulu a tala pang tana mai Yudia mulu.”

⁸Bong ngan di galiunu tina ngan tiwete panga nen, “Pannoongoo, nookoot sa airi ngan di Yuda tikap malmal pong a tikapye be tikatmatong ye pat nga. E nga yelei a be kumulu a kula pang ni nga?”

⁹Motong la Yesu iyei ne, “Nga yelei, manga yo ke be ipa ye muntu le du rrai, ngan sangaul be ru, too? Ngan nen le kumata tool be ipa kemai nga, ngan o ke be itutu tiap, yesoo ke isini le ikamata ni ye.

¹⁰Bong kumata tool be ipa bong nga, ngan ole itutu, yesoo taukan sul yo be ikamata ni ye i.”

¹¹Yesu iwete pang di nen a imot, motong la iwete pang di mulu nen, “Tool kiidi Lasarus ni ngo iken mata. Bong ole ala, a la apoongoo a imadit.”

¹²Motong la di galiunu tiwete nen, “Tool Mai, kumata le be iken mata nga, ngan ole matamatenge ki imot, le tinini dook mata mulu.”

¹³Ngan Yesu in iwetewete ye matenge ke Lasarus, bong di galiunu ngan lodi galanga tiap. Tiyeisa o Yesu iwete be Lasarus nga o iken mata moolmool.

¹⁴Motong la Yesu iwete pobe pang di nen, “Lasarus imata oo,

¹⁵bong au i lok ponana yo ala nango tarai tiap nga, a be nen ngan kakamata soo so yo be ayeii panga in nga, ngan ole katara lomim medana pau ye. Oo, kamadit a tala pang ye la takamata.”

¹⁶Yesu iwete nen a imot, motong la Tomas yo tiwete ene san ye Didimus i, in iwete pang Yesu di galiunu kapala ngan nen. Iyei ne, “Ai, be nen ngan idi lapau tamadit a taye Yesu tala, a nen ngan la tiraumatidi taye a tammata.”

¹⁷Ye kene yo Yesu iye di galiunu tina ngan tipa le la pombe potai pang ye malala Betani ye in nga, ngan Yesu ilongo betanga ben Lasarus bobono in titaru lo agoro lono ke di matenge a iken ye ke pai oo.

¹⁸Ngan Betani tani in iken potai pang Yerusalem le manga mooloo tiap.

¹⁹Le nga di Yuda alunu la timan pang ye Mata iye Madia be man tilon di a be nen ngan lodi modoko ye lidi yo imata i, in be.

²⁰Ngan ye kene tani yo Mata ilongo betanga ben Yesu la ipa dada i, motong la iyege Madia sila iyepe rumu, inbe ipakala a ila le la itauaraii dada.

²¹Motong la iwete panga nen, “Tool Mai, nga yo be kuyepe ni nga, ngan matin nga le lik imata tiap.

²²Bong nookoot nga lapau, au i lok galanga nen, kumata be kutoro Maro ye so sa nga, ngan ole ikauu pong.”

²³Mata iwete nen, le nga Yesu iyei ne, “Lim ni ole imadit mulu le imaur.”

²⁴Motong la Mata iwete panga nen, “Au i lok galanga nen, ole imadit mulu ye lal yo Maro itaru be ikarata betanga kidi tooltool ye i. Yesoo, ye lal tani ngan ole Maro ipamadit di tooltool matedi a timadit mulu le imot.”

²⁵Mata iwete nen, le nga Yesu iwete panga. Iyei ne, “Au tauk i la apamadit di tooltool mulu ye ni ke matenge i, inbe akaua yepongo dook mata pang di i. Ngan nen le sei tool be itara lono medana pau inbe imata nga, ngan ole imata le ipa so tiap, bong ole imadit mulu a iyepe ye yepongo dook mata tani in.

²⁶Inbe di sema tooltool yo timaurur go, inbe titara lodi medana pau nga, ngan o ke be timmata le tipa so tiap. Ngan ong i kutara lom medana ye betanga kiau nga, too tiap?”

²⁷Motong la Mata iwete panga nen, “E, Tool Mai, au i atara lok medana yong ben ong i Kirisi. Ong i Maro Natunu yo be iwanga a isi tana i.”

²⁸Mata iwete nen a imot, motong la imulu a ila koonoo pang toonoo Madia a man imangunngun panga. Iyei ne, “Pannoongoo tani in iman oo, le nga itor yong.”

²⁹Ye kene yo Madia ilongo betanga nen nga, ngan le palbe leu be imadit a ila pang ye Yesu.

³⁰Ngan Yesu ilo pombe malala tiao, bong iyepe ye ni tani yo Mata la itauaraii ye i.

³¹Le nga di Yuda yo tiye Madia tiyepe rumu lono a be tiloni a lono iken dook nga, ngan tikamata tina yo palbe leu be imadit a idu pang tana nga, le nga titoo a tidu. Ngan tiyeisa be idu a ila pang ye agoro ke di matenge yo titara Lasarus bobono ye i, a nen ngan la itang ye nango.

³²Madia imale a ila pombe ye ni tani yo Yesu iyepe ye i, le nga ikamata, motong la igun turunu du Yesu kene punu ke dama, inbe iwete panga. Iyei ne, “Tool Mai, nga yo be kuyepe ni nga, ngan matin nga le lik imata tiap.”

³³Ngan Yesu ikamata tina yo itang, inbe di Yuda yo titoo a tiye timan nga, ngan titang lapau nga, le nga Yesu lono gurrungu inbe katen pas.

³⁴Motong la itor di nen, “Ni nangai kataru ye i?” Motong la tiwete panga nen, “Tool Mai, kuman man kumata.”

³⁵Yesu la ikamata le nga itang.

³⁶Ngan di Yuda tikamata tina yo itang nga, le nga tiyei ne, “Kakamata nga, ya ni lono pang tool ni mai san.”

³⁷Bong ngan di diedi kapala tiyei ne, “Ya ni ikarata tool yo matan kis in le matan rere mulu, e nga yelei a lono be ilono tool ni a nen ngan imata be, tiap nga?”

³⁸Yesu ipa le la pombe ye agoro tani yo titara Lasarus bobono ye i, le nga lono dook tiap, inbe katen pas mulu. Ngan agoro tani in iken ke kawal madini. Inbe pat somai atu la titapulu la tikatkala agoro koonoo ye i.

³⁹Motong la iwete pang di nen, “Oo, kapulu pat in a ikoo.” Ngan tool tani imata in lini yo Mata i, in iwete panga nen, “Tool Mai, nookoot nga o ikini a dook tiap oo, yesoo imata a iken ye ke pai oo.”

⁴⁰Motong la Yesu iwete panga nen, “Muku ngan awete pong be kutara lom medana pau, ngan ole kumata gurana mai ke Maro.”