SAN JUAN 11:6-40

⁶co'se' mbìn Jesús di's co' ndxab mèn co' ngua mandad le' Lars ndyac len, asembli Jesús, ne'ngade Jesús luega xal mblya's ryop bél myen' ftan' Lars. Mbyan' Jesús co'te' ngo Jesús taachop huiz.

⁷Ngolo nguri'th chop huiza, ndxab Jesús loo myen' xin' mté'th Jesús: ―Nda na' par ned le'n yèez co' nac yèezya' che'n làaz mèn jude tedib vez, cara.

⁸Per myen' xin' mté'th Jesús ndxab loo Jesús: ―Maistr, pente ndxàc plá huiz mblya's mèn co' ñibe', no co' ndyoo ner, no co' ndyoo naa loo mèn nación Israel mcua'n mèna mod nguth mèna U' con quèe. No ale ¿ndlya's U' ya U' par neda tedib vez, cà'?

⁹Mtetac Jesús thìb di's loo myen' xin' mté'th Jesús. Ndxab Jesús: ―Nde niin thìb con' loo gu': ¿Ché' ilìcte si' fchop hor nac thìb huiz, cà'? Hui' gu' nexa. Chele' thìb mèn ndyee ndxáal ze, mèna indxezi'fte no indxega'ste mèna ned nda mèna tac xnìi huiz ntenìi loo mèna ned nda mèna.

¹⁰Per mèn co' tyee nii nacuau, mèna ndxezi'fque' no ndxega'sque' mèn loo con' tac yende xnìi co' ntenìi loo mèna ned nda mèna.

¹¹Ngolo tataa ndxab Jesús di's loo myen', ndxab Jesús loo myen': ―Lars co' ndxàc amiu na' naxyàt. Per nalle' daa ga lo' mcal' loo Lars.

¹²Sya, ndxab myen' xin' mté'th Jesús loo Jesús: ―Tad, chele' Lars naxyàt, peser más ndoo yath ndac Lars, ¿lé'?

¹³Di's co' ndxab Jesús loo myen' nee di's le' Lars nguthle'. Per myen' xin' mté'th Jesús mbli xtùuz le' Jesús ngue yab loo myen' le' Lars naxyàt tac ndoo yath ndac Lars.

¹⁴Le' sya, clar mda' Jesús cuent loo myen'. Ndxab Jesús: ―Lars nguthle'.

¹⁵Per con' co' más ndyac lezon tac yende daa tya. Más huen tataa ngòca loo Lars por cón che'n gu' par hui' gu' con' lin loo Lars par tataa mod más yila's gu' loon. Ya' gu' nda na' par ñèe na' máa thebol Lars.

¹⁶Sya, ndxab Max, co' mbez mèn Cuach, loo myen' xtàa xin' mté'th Max: ―Nda no na' Jesús, yey, par gath no na' Jesús tya.

¹⁷Co'se' mzin Jesús con myen' liz thebol Lars, ndxàcle' thap huiz ngua ca's mèn thebol Lars.

¹⁸Nde nxon', gaxte tya nziri' yèez Betañ' par ciuda Jerusalén. Nziri'que' yèez Betañ com chop mil narol metr, peser, loo ciuda Jerusalén.

¹⁹Le'pe' sya, huax mèn yèezya' che'n làaz mèn jude mbi'th too naa no mbi'th tegán mèn lezo' Mart no Mari por cón che'n thebol Lars.

²⁰Co'se' mbìn Mart le' Jesús ndele', ngro' Mart, ngua càa ned Mart Jesús. Le' Mari na, mbyan' no rye mèna yòo.

²¹Lueg ndxab Mart loo Jesús: ―Tad, chele' U' ngo no nu' trè', ngobe'en ne'ngathte ftanen.

²²Per nalle' naneequen le' Diox li ryete con' co' ña'b U' loo Diox.

²³Ndxab Jesús loo Mart: ―Fta'nl ryo xban, ey.

²⁴Mart ndxab loo Jesús: ―Aa, Tad, daa naneeque' le' ftanen ryo xban. Per axta co'se' gàc lult tiemp loo izlyo' co'se' ryo xban mèn nguth axta syare' ryo xban ftanen, ndyaquen.

²⁵Jesús ndxab loo Mart: ―Daa nac xa' co' ngo xban mèn. No nac daa xa' co' ndli par yòo ban no mèn Diox thidtene. Le' mèn co' ndxela's loon, mastale' gath mèn, daa li le' mèna yòo ban no Diox thidtene yiloa.

²⁶Ryete mèn co' naban nalle' no ndxela's mèn loon, co'se' gath mèna, mèna yòo ban no Diox. Ne'ryo xà'de mèna loo Diox thidtene. ¿Ché' ndxela'sl di's co' ngue niin lool ndxè', Mart?

²⁷Mart ndxab loo Jesús: ―Aa, Tad, ndxelasquen di's co' mbez U'. No ndxelasquen le' U' nac Crist co' nac xgan'pe' Diox co' ndxath yi'th loo izlyo'.

²⁸Ngolo ndxab Mart di'sa, nda chez Mart Mari, bél Mart. Xexte ndxab Mart loo Mari: ―Maistr mzinle' trè'. No mtel' Maistr daa par ndal xinl. Ya neel cón ndlya's Maistr.

²⁹Texal mbìn Mari di's co' ndxab Mart, yende izlyo', ngo too nde'f Mari. Ngua Mari co'te' nzo Jesús.

³⁰Co'se' ngua Mari co'te' nzo Jesús, tarte yòo Jesús le'n yèez Betañ. Tatabe' nzo Jesús co'te' ngua toodi's no Mart Jesús.

³¹Co'se' gunèe mèn yèezya' che'n làaz mèn jude co' ngo no Mari no co' nzi tegán lezo' Mari liz Mari yende izlyo' ngo too ndé'f Mari no ngro' Mari nda Mari, mdoo nque mèna xís Mari. Tac mbli mèna xtùuz peser nda yón' Mari ro ye'r co'te' mblo mèn thebol Lars.

³²Per texal mzin Mari co'te' nzo Jesús, mdub xib Mari no mcotloo Mari xan' nii Jesús. Ndxab Mari loo Jesús: ―Tad, chele' U' ngo trè', ne'ngathte ftanen, ngobe'en.

³³Co'se' gunèe Jesús ndxón' Mari no ndxón' rye mèn yèezya' che'n làaz mèn jude co' mzin no Mari loo Jesús, anze'f mxi yéc no mxi lezo' Jesús. No mbyàa mbye'th lezo' Jesús.

³⁴Látha, ndxab Jesús loo mèna: ―¿Pá mer mblo gu' thebol, à'? Sya, ndxab ryop bél myen' loo Jesús: ―Tad, ya' U' nda na'. Sya, hui' U' pá mblo nu' thebol.

³⁵Sya, ale no Jesús mbín'.

³⁶Co'se' gunèe mèn gulàaz che'n làaz mèn jude mbín' Jesús, ndxab mèna loo xtàa mèna: Hui' gu' nexa. Susque' mque' lezo' Jesús ñèe Jesús Lars. Ale no Jesús ndxón'.

³⁷Sya, ndxab plá mèna loo xtàa mèn: ―Mbi' ba' mbli par ngüi' mbi' sieua. ¿Xá nee gu'? ¿Ché' ne'ngácte mbi' ba' ngli mbi' par ne'ngathte Lars chele' mbi' ngo trè', cà'?

³⁸Mbere Jesús, mbyàa mbye'th lezo' Jesús. No mxi yéc no mxi lezo' Jesús tedib vez. Mbii gax Jesús ro ye'ra. Ye'ra ngòc thìb quèe lyo'. Mtau' mèn ro ye'ra con thìb quèe laj.

³⁹Sya, ndxab Jesús loo mèn co' nziri'a: ―Fteche gu' quèe ro ye'r ba'. Per Mart co' ngòc fta'n thebol Lars ndoole' ndxab loo Jesús: ―Tad, ya ndlya'le' thebol, ngobe'en, tac ndxàcle' thap huiz nguth thebol.

⁴⁰Jesús ndxab loo Mart: ―¿Ché' ne'ngniiden lool gozea chele' lùu yila's loon no loo con' lin, ñèel con' roo no con' xèn che'n Diox co' lin loo Lars, cà'?