San Juan 11:6-40

⁶per chi cwaꞌman ruson ragxuu Lazr, sta goglaaman zatioꞌp dxej lod zaꞌman.

⁷Dxel rëbaman loj ree xbejnman: ―Yoꞌ ree niz Judea zatijb.

⁸Abiꞌ rëb reeman lojman: ―Mextr, ad wayajct xchej guyën ree bén zojb niz ni nucaaguiaj reeman lüj. ¿Abiꞌ chel ni zatijb ya?

⁹Dxel rëb Jesús: ―Lëjt ragbee guial chiptioꞌp hor yuꞌ tibdxej. Abiꞌ bén rza radxe, achet rirejl guiaꞌman, din yuꞌ bajl rusni loj guidxliuj guie.

¹⁰Per bén rza guxhin, yuꞌ ni rirejl guiaꞌman, din achet bajl guin rajpaman.

¹¹Rëb tëë Jesús loj reeman: ―Ma nagaꞌyëjs dux miw ree Lazr, per chicwëënan laax.

¹²Dxel rëb ree xbejnman: ―Dad, bal naayëjsix, rën guiëban yayajquix.

¹³Per ni rëb Jesús rën guiëban guial ma güjt Lazr, guiáad ree xbejnman gunaladx reeman rëbaman nagaꞌyëjsizix.

¹⁴Dxel bagojn Jesús laa reeman, rëbaman: ―Ma güjt Lazr.

¹⁵Rabaan por lëjt guial ad guzutan ni din chililadxidi naj. Yan, yoꞌ ree yugnaj reex.

¹⁶Dxel Tumajs, bén rniee reeman cwajch, rëbaman loj los demazri xbejn Jesús: ―Yoꞌ ree yunëꞌ reeman, din lod guiëtaman, yayëjtnëꞌ reeman.

¹⁷Chi bidxin Jesús Betania, ma gojc tajp dxej biguieꞌch Lazr.

¹⁸Betania guin rayaꞌnan gajxh Jerusalén, ziꞌct choon kilometro.

¹⁹Abiꞌ zien ree bén Israel bignaj Mart con Li din yaguꞌ reeman luxdoo reem guial güjt bizan reem.

²⁰Chi gogbee Mart ma zëëd Jesús gajxh, briim bigchaaglojm laaman, guiáad Li bayaꞌnm lënü.

²¹Dxel rëb Mart loj Jesús: ―Dad, bal nizujl guie, ad ziant niëjt da zanan.

²²Per naj ragbee guial niꞌqui yan zunee Dios ni guiniabil lojman.

²³Dxel rëb Jesús: ―Naj rni yaban bizanl.

²⁴Badxiꞌmin rëbim: ―Ma qui ragbeen, yabanm dxej yaban gra ree bengüt. Chi guidxin dxej güün xguialguxtis Dios.

²⁵Abiꞌ rëb Jesús: ―Naj na̱j bén rusban ree bengüt rudë tëën guialnaban loj ree bejn. Bén chililadx naj, majsi guiëtaman, per zajpaman guialnaban loj Dios.

²⁶Guiáad gra bén naban rliladx tëë naj, zajpaman guialnaban loj Dios. ¿Rliladxil ni canin lüj ya?

²⁷Dxel rëbim lojman: ―Rliladxanan Dad. Rliladxan lüj na̱j Cristo, Xiꞌn Dios, bén na̱j guiꞌt loj guidxliuj.

²⁸Chi gulox rëb Mart zian, dxel bignee xbëlim Li, rëbim ralan: ―Ma biꞌt Jesús, abiꞌ caneeman lüj.

²⁹Biguiejnzi Li zian, laa bisugajquim bigchaaglojm Jesús.

³⁰Abiꞌ Jesús gadzaman chuꞌ luguiedx guin, sta zaꞌman lod bigchaagloj Mart laaman.

³¹Guiáad ree bén Israel zojbnë Li raguꞌ reeman luxdoom, chi baguiaa reeman cari daꞌt bisum zëm, binal reeman laam. Gunaladx reeman roꞌ xbaa Lazr ziguiaanm.

³²Chi bidxinm lod zaꞌ Jesús, bazuxibim lojman rëbim: ―Dad, bal nizujl guie, ad ziant niëjt da zanan.

³³Chi baguiaaman roon Li con ree bén Israel nal laam, dád gognaa luxdooman guyu naya tëëman.

³⁴Dxel gunabdiidxaman rëbaman: ―¿Ban biquieꞌchidi laax? Abiꞌ rëb reeman: ―Dad, guda nial din guguiaal.

³⁵Dxel biinman.

³⁶Abiꞌ rëb ree bén Israel guin: ―Gol baguiaa nial dád guyënman laax.

³⁷Per yuꞌ reeman rëb: ―Bén guinan baxhal guiaaloj tijb bén ad ranit loj. Yan, ¿niche niajc nüjnman yaꞌn chitëë niëjt Lazr?

³⁸Dád guyu naya luxdoo Jesús stijb, chi gubigaman roꞌ xbaa Lazr. Najn tijb guiajbiliaa, nadaꞌcw tijb guiaj roꞌn.

³⁹Dxel rëbaman: ―Gol biquied guiaj guin. Per Mart, bizan xingüt guin, rëbim: ―Dad, ma rliaam nadxuudx, din ma gojc tajp dxej ni gütim.

⁴⁰Badxiꞌ Jesúsan rëbaman: ―¿Nid rnin ya, bal rliladxil, guguiaal xguialrniabee Dios?