Juan 11:6-40

⁶meneng pegdineg din te nesekitan si Lazaro, mig-ogpà pa kidoen taman te dowa se delem.

⁷Pegkeobos te dowa se delem, minikagi si Jesus diyà te menge tinoledaan din, “Lomikò kidon den doton te probinsya te Judiya.”

⁸Minikagi se menge tinoledaan din, “Sir, mèpiya aw eked ka pa likò doton, so doen pa ibeg te menge obanen te Judiyo memontog kamno te bato amon imetayan ka.”

⁹Minikagi si Jesus, “Egsenang se aldaw te sempolò teg dowa oras te kelikit te aldaw. Aw mipanaw se otaw te aldaw, eked sikandin pekedogsò so melowa se aldaw.

¹⁰Meneng aw mipanaw se otaw te delem, mekedogsò sikandin so wedad den aldaw.”

¹¹Yan se tegdeyanan inikagi i Jesus amon ketegahan dan te wedad pa medaet domateng diyà kandin kidoen te Judiya. Penga niyan, minikagi heman sikandin, “Timedogi den se sigalak tadon si Lazaro. Yan domoton a amon lokahen ko.”

¹²Minikagi se menge tinoledaan din, “Pengolo, mèpiya aw timedogi den, so yan se pengilala te megkèpiya sikandin.”

¹³Yan se inikagi dan so eden dan aw olò timedogi si Lazaro. Meneng se kedegdagan te inikagi i Jesus, nematay den sikandin.

¹⁴Yan minikagi si Jesus kenà pineokit te tegdeyanan, kagi din, “Nematay den si Lazaro.

¹⁵Mèpiya so wedad a kidoen te pegkematay din, so ketebangan kaw den amon lobosen se pegpemenal niyo kanak. Nayan, domoton kidon kandin.”

¹⁶Si Tomas, se doma ngadan din si Pingin, minikagi diyà te menge doma tinoledaan, “Tomaking kidon te Pengolo pengkey imetayan kidon heman doma din.”

¹⁷Pegdateng i Jesus doton te Bitanya, epat den se delem te peglebeng ki Lazaro.

¹⁸Medapag se lonsod te Bitanya kidoen te Jerusalem, menge telo kilomitro se kediyò niyan.

¹⁹Yan se doun te medita se menge Judiyo tege Jerusalem limaoy ki Marta aw si Maria amon sinelayen dan tandà te kedowa dan nematay.

²⁰Pegdineg i Marta te medapag den dan si Jesus, simongon sikandin. Meneng mig-ogpà pa se adi din si Maria kidoen te balay.

²¹Pegkità i Marta ki Jesus, minikagi, “Pengolo, simpana dini ka, eked peden kematay se kedowa ko.

²²Pengkey nematay den, meneng netegahan ko te pengkey eden se pemoyoen no diyà te Timanem, yan se ibegay din kamno.”

²³Minikagi si Jesus, “Meantay pa se kedowa nikaw.”

²⁴Minikagi si Marta, “Netegahan ko te meantay sikandin te temanan aldaw aw entayen te Timanem se kedita te otaw lekat te nematay.”

²⁵Minikagi si Jesus, “Siaken se meg-antay te otaw lekat te nematay. Siak se egpemegay te kaling pedowan. Pengkey matay se otaw nemenal kanak, meneng meantay sikandin.

²⁶Aw memenal kanak se otaw wedà pa kematay, eked palos sikandin detengi te kemetayun. Nemenal ka lay kenyan?”

²⁷Timaba si Marta, “Ee, Pengolo. Nemenal a te sikona se Batà te Timanem. Sikona se Misiyas insogò din dini te keneyonan.”

²⁸Penga te peg-ikagi i Marta kenyan, minolì sikandin amon mangay te adi din si Maria. Minikagi sikandin te wedad doma otaw dimineg, “Dimateng den se Menenoladà, aw impeangay ka din.”

²⁹Pegdineg i Maria kenyan, ayas timindeg aw dimoton kandin.

³⁰Wedà pa dateng si Jesus te lonsod, so kidoen pa sikandin te sinongonan i Marta kandin.

³¹Na, se menge Judiyo migsinalay kandin kidoen te balay, pegkità dan te pegkesayo i Maria lekat te balay, timaking dan kandin, so eden dan aw domoton te lebeng amon megkelag.

³²Meneng pegdateng i Maria doton ki Jesus, limongken sikandin, aw minikagi, “Pengolo, simpana dini ka, eked peden kematay se kedowa ko.”

³³Sagwa kimità si Jesus te migkelag si Maria aw kedita te Judiyo timaking kandin, neantag se pedowan din aw ontò nelidò.

³⁴Minikagi sikandin, “Kenan lay lebengi?” Minikagi dan, “Pengolo, taking ka kenami.”

³⁵Penga niyan, migkelag heman si Jesus.

³⁶Pegkità te menge Judiyo te migkelag sikandin, minikagi dan, “Ontò kedì dakel se pedowan din diyà te nematay.”

³⁷Meneng minikagi se menge doma, “Sikandin se migpegolì te mata te otaw bota. Simpana dini sikandin, wedà peden kematay si Lazaro.”

³⁸Pegdateng i Jesus doton te lebeng, todà neantag se pedowan din. Ilib se linebengan ki Lazaro, aw doen dakel bato insampeng diyà te awang niyan.

³⁹Minikagi si Jesus, “Owangi niyo se lebeng din.” Meneng minikagi se etebay te nematay si Marta, “Pengolo, nemahò den, so epat pa se aldaw lekat te peglebeng kandin.”

⁴⁰Minikagi si Jesus, “Eneng-enengi se inikagi ko diyà kamno. Aw memenal ka kanak, komità ka te melangkaw se Timanem.”