SAN JUAN 11:6-40

⁶are ndache na Jesús ixin Lázaro venihi, Jesús ẍa vittohe iyó nchanho nttiha ngain tti lugar que vehe.

⁷Después ndac̈ho ngain tti chojni que vacao: ―Chjin na iná para ngain Judea.

⁸Co tti chojni que vacao ndac̈ho na: ―Maestro, ẍa seha chojni judío que techonda joachaxin de ngain lugar mé joinao na narrogoenxon na jaha ixin ẍo, ¿co ẍa rinao tsji nttiha iná?

⁹Jesús ndac̈ho: ―¿Ajeha ndoa que nchanho chonda tteyó hora? Co si ná ni c̈hji ni de nchanho, tonttenguixinha ni ixin dicon ni joadingasán que jí ngataha nontte jihi,

¹⁰pero si ná ni c̈hji ni de ttie, tonttenguixin ni ixin diconha ni joadingasán.

¹¹Cottimeja ndac̈ho Jesús ngain tti chojni que vacao: ―Xiamigoa na Lázaro tajijoa xa, pero sinttaxingamá xa.

¹²Cottimeja tti chojni que vacao Jesús ndac̈ho na: ―Soixin, si tajijoa, rroc̈ho orroxengañao.

¹³Pero tti ndac̈ho Jesús rroc̈ho que Lázaro ondavenhe. Co cain tti chojni que vacao Jesús ẍaxaon na que ndoa tti ndac̈ho Jesús ixin tavejoa Lázaro.

¹⁴Cottimeja Jesús ndac̈ho ngain na claro: ―Lázaro ondavenhe.

¹⁵Janha chahna ixin joariha nttiha; icha jian jañá para ixin jaha ra sitticaon ra. Pero chjin na sitsjehe na Lázaro.

¹⁶Cottimeja Tomás, tti vancheguinhi na Xancoata, ndac̈ho ngain tti icha chojni que vacao Jesús: ―Chjin na ján na cai para senhe na conixin Jesús.

¹⁷Are jehe na joiji na nttiha, chojni nttiha joinchenohe na Jesús que Lázaro ovechonda nó nchanho que jiẍavá.

¹⁸Rajna Betania vehe chiaon Jerusalén, inchin yoto kilómetro co rioho tecaoxin chó rajna mé.

¹⁹Co tsje chojni judío joitsjehe jehe Marta co María para joantsjehe na joachjaon ansén cayoi nc̈hí mé de ixin xanchó nc̈ha que ndavenhe.

²⁰Are Marta conohe que Jesús ojoiji nttiha, jehe Marta vac̈hjexin de nchia co joichoenxin Jesús ngatja nttiha, pero María ndavittohe ngaxinhi nchia.

²¹Co Marta ndac̈ho ngain Jesús: ―Si soixin rrogarihi nttihi, rroguenha xanchian.

²²Pero janha nona que Dios rrochjá cain tti sanchiehe.

²³Jesús ndac̈ho: ―Xanchó rrocjan xan sechon xan.

²⁴Marta ndac̈ho ngain Jesús: ―Ján, janha nona que rrocjan xan sechon xan are rroxechon cainxin nindadenhe ngain nchanho are ndatsjexin mundo.

²⁵Cottimeja Jesús ndac̈ho: ―Janha tti rroxechonxin cainxin chojni, co janha tti danjo iná vida naroaxin. Tti chojni que ditticaon na janha, masqui jehe senhe, pero rrochonda iná vida naroaxin.

²⁶Co cainxin chojni que ẍa techon co ditticaon na, chojni mé ẍonhi tiempo sinchetján na almé na ixin ochonda na vida mé. ¿Aditticaon jaha jihi?

²⁷Marta ndac̈ho: ―Ján, janha ditticanho que soixin tti Cristo, tti Xenhe Dios, tti vandac̈ho profeta que sihi ngataha nontte jihi.

²⁸Are Marta joexin ndac̈ho jihi, cottimeja cjoi joigayé María, jehe xanchó, co ndac̈ho Marta jimao ngain María: ―Tti Maestro nttihi jí co dayaha jaha.

²⁹Are María coinhi jihi, jehe jaicoa vingattjen co cjoi joitsjehe Jesús.

³⁰Jesús ẍa joigaha rajna rato mé; ixin jehe ẍa vittohe ngain tti lugar vetanxin Marta.

³¹Are ni icha vicon na que María jaicoa vingattjen co vac̈hje, tti chojni judío que te nttiha ngain nchiandoha María ixin tedantsjehe na joachjaon ansén, jehe na rroé na María ixin jehe na ẍaxaon na que María sarrocji ngain tti jiẍavá xanchó para rrotsjangaxin nttiha.

³²Cottimeja María, are joiji tti jí Jesús, María vettoxin nttajochjihi ngaca rotté Jesús, co ndac̈ho: ―Si soixin rrogarihi nttihi, xanchian rroguenha xan.

³³Are Jesús vicon que María jitsjanga co cain chojni judío que joicao María tetsjanga na cai, Jesús vechín co anto soji ná joachjaon conohe ngain ansén.

³⁴Cottimeja Jesús joanchiangui co ndac̈ho: ―¿Ttinó cjoavá ra Lázaro? Co jehe na ndac̈ho na: ―Ẍacoi soixin, sitsjehe.

³⁵Co Jesús tsjanga.

³⁶Cottimeja chojni judío ndac̈ho na: ―Tsjenxin ra, anto joinao xí jihi Lázaro.

³⁷Pero icanxin de jehe na ndac̈ho na: ―Xí jihi tti chjé jmacon tti xí que vaguiconha, ¿co jai, aẍonhi ná cosa nchao rrojinchehe xa para que Lázaro rroguenha?

³⁸Jesús cjan conohe iná joachjaon anto soji, co jehe conchienhe ngain tti jiẍavá Lázaro ngain ná cueva, co jijé ná ẍo tti dixinxin na.

³⁹Jesús ndac̈ho: ―Dinttjian ra ẍo. Marta, nc̈hichó jehe tti ndavenhe, ndac̈ho nc̈ha ngain Jesús: ―Pero puede atto ẍa ixin ochonda nó nchanho que ndavenhe.

⁴⁰Pero Jesús ndac̈ho: ―¿Andattjoha que si sitticaon nganji na janha, jaha sicon joachaxín Dios?