San Juan 11:6-40

⁶Masqui ohcon, ihcuac Jesús oquimat nic Lázaro omococouaya, oc omocau ome tonal campa ocatca.

⁷Satepan, Jesús oquimiluih nitlasalohcauan: —Ocsipa matiacan Judea.

⁸Nitlasalohcauan oquiluihqueh: —Tlamachtani, ayamo uehcau in judiohtiquiuahqueh ocniquiah mitzontimictisqueh. ¿Uan yeh ocsipa itconniqui toyas ompa?

⁹Jesús oquimiluih: —¿In tonal, xamo icpia mahtlactlamome hora? Naquin ninimi tlahcah amo mixtipotlamia, nic quita in tlanestli tlen cah itich nin tlalticpactli.

¹⁰Pero naquin youalninimi, tlamilauca moxotipotlamia, nic amo catqui in tlanestli itich.

¹¹Octlamiihtoh non, uan satepan in Jesús oquimiluih: —In toyolohicniu Lázaro cochtoc, uan axan nioh inquihxititiu.

¹²Nitlasalohcauan oquiluihqueh: —ToTecotzin, tla san cochtoc ictosniqui pahtis.

¹³Jesús ohcon oquimiluihca nic ocniquia quimahsicamatiltis Lázaro yomic, pero nitlasalohcauan ocyoluayah milauac san cochtoc.

¹⁴Ihcuacon Jesús oquinyequiluih: —In Lázaro yomomiquilih,

¹⁵uan inpaqui namopampa nic amo ompa oncatca, pues ohcon uilis namontlaniltocasqueh. Matyacan, mattatin.

¹⁶Ihcuacon Tomás, naquin ocahauiltoocaayotayah Couatzin, oquimiluih nitlasalohcaicniuan: —Matyacan tehuan noiuqui, matmiquitin iuan.

¹⁷Ihcuac Jesús oahsic, ocmatiltihqueh nic Lázaro yocatca naui tonal itich in ticochtli.

¹⁸In altipetl Betania amo uehca omotaya iuan Jerusalén, quemeh yeyi kilómetro,

¹⁹uan miqueh judíos oualahqueh inauac in Marta uan María, oquinyolchicauacoh itich nintlaocol nic omic nimicniu.

²⁰Ihcuac Marta oquimat nic Jesús yoahsitoya, ocnamiquito, pero María omocau icalihtic.

²¹Marta oquiluih in Jesús: —NoTecotzin, tla nican otonini, nocniu amo omomiquilani.

²²Masqui ohcon, neh noiuqui inmati nic nochi tlen itcontlahtlanilis Dios, Yehuatzin mitzonmactis.

²³Jesús oquiluih: —Mocnitzin yancuicayolis.

²⁴Marta ocnanquilih: —Neh inmatoc nic yancuicayolis ihcuac nochtin in miquemeh yanquicayolisqueh, itich niyacatlamiyan in tonalmeh.

²⁵Jesús oquiluih: —Nehua in yancuicayolilistli uan nehua in yolilistli. Naquin tlaniltoca nonauac, masqui miquis, yeh yolis.

²⁶Uan nochi naquin yoltoc uan tlaniltoca nonauac, amo queman miquis. ¿Itconniltoca non?

²⁷Marta ocnanquilih: —Quemah, noTecotzin. Inniltoca nic Tehuatzin yen Cristo Temaquixtani, toniConetzin Dios, naquin ocpiaya tlen uitz itich nin tlalticpactli.

²⁸Ihcuac ohcon oquihtoh, Marta oyah uan oquichtacailuih nicniu María: —In Tlamachtani ya catqui nican uan mitzonnotza.

²⁹Ihcuac María oquicac, omoquitzteutiuitz uan ocnamiquito.

³⁰Jesús ayamo ocalaquia itich in altipetl, yeh oc ocatca campa ocnamic Marta.

³¹Ihcuacon in judíos naquin ocatcah calihtic iuan María ocyolchicautoyah, quen octaqueh María omoquitzteutiuitz uan oquis, yehuan oyahqueh icuitlapan, nic ocyoluihqueh yaui icchoquilitiu in Lázaro campa tooctoc.

³²Ihcuac María oahsic campa ocatca Jesús uan oquitac, icxitlan omotlancuaquitz uan oquiluih: —NoTecotzin, tla nican otonini, nocniu amo omomiquilani.

³³Ihcuac Jesús oquitac María chocatoc uan noiuqui in judíos tlen ocyolchicautayah, Jesús oyoltoneu uan oyolten ica tlaocol,

³⁴uan oquintlahtlanih: —¿Canih cah in ticochtli campa onanconcauatoh? Yehuan ocnanquilihqueh: —ToTecotzin xouiqui touan ixconitaqui.

³⁵Jesús ochocac.

³⁶Ihcuacon in judíos oquihtohqueh: —¡Ixconitacan, quen tlailiuis octlasohtlaya!

³⁷Uan siquin yehuan yehyeh octouayah: —Necah ocpahtih in popoyotl, tla ohcon, ¿xamo ouilisquia itlah occhiuani uan ohcon in Lázaro amo omiquini?

³⁸Jesús ocsipa oyoltoneu, uan oyah icah in ticochtli campa ocatca in Lázaro. Non ticochtli se cueva, uan ocaltentzacutoya ica se titl.

³⁹Jesús oquihtoh: —Ixconihcuanican in titl. Marta, nicniu naquin omic, oquiluih: —NoTecotzin, nitlalnacayo in Lázaro ya machia, ya icuica naui tonal tooctoc.

⁴⁰Jesús oquiluih: —¿Xamo yonmitzoniluih, tla tontlaniltoca itconitas nimouisticchicaualitzin Dios?