Juan 11:6-40

⁶Ngem olay mo siya di, sin nanngeana ay mansakit si Lazarus, adi inmey, dowa ay agew pay di nanteana sin kad-ana.

⁷Asi na pag kanan sin papasolot na, “En tako kasin ed Judea.”

⁸“Ngem Apo maestro, magay bayag na din istay pamigpigan di Judio en sik-as di, yan sana ay mantaoli tako pay laeng?” insongbat da.

⁹Kanan pay Jesus ay nangiarig, “Laton, maga pay laeng di mapasamak en datako tan sinpo ya dowa ay oras di kaagawan, ay baken siya? Mo mandan di ipogaw sin kaagawan, adi maisokba, tan maila din danan.

¹⁰Ngem mo din labi di pandanana, maisokba, tan mabolinget ya maga en sisya di silaw.”

¹¹Pag nan itoloy ay mangwani, “Naseseyep din gayyem tako ay si Lazarus. Enak bangonen.”

¹²Asi et kanan din papasolot na, “Apo, mo naseseyep et mayat, tan mailatonan.”

¹³Say inbaga da di, tan kanan da en naseseyep si Lazarus tet-ewa, ngem di layden Jesus ay kalien et natey.

¹⁴Siya di, indoritson Jesus din kali na ay nangwani, “Natey si Lazarus,

¹⁵ngem naragsakak pay dedan ay magaak sidi sin nateyana, tan awni et pomigsa di pammati yo begew sin ilaen yo. May, en tako ngarud sin kad-ana.”

¹⁶Asi et kanan Tomas ay nabdayan si Singin sin gagait na ay pasolot, “Siya, en tako iman ta olay makikatey tako en Jesus.”

¹⁷Somawang pay da Jesus ed Betania, inammoana ay nakap-at si Lazarus ay naiponpon.

¹⁸Ed Betania ay nay, asag-en ed Jerusalem, emey ay tolo ay kilometro di kaaddawi na.

¹⁹Isonga ad-adoy inmey ay Judio ay en mangliwliwa en da Marta en Maria.

²⁰Idi nadamag Marta ay wadas Jesus ay omal-ali, ena inabat, ngem nataynan si Maria ay tinmotokdo sin beey da.

²¹Kanan Marta en sisya, “Apo, mo wada kas na ed idi, adi koman natey din agi mi.

²²Ngem ammok pay dedan ay olay ed wani, mo sinoy kedawem en Diyos et idawat nan sik-a.”

²³Kanan Jesus, “Matago kasin din agi yo.”

²⁴“Aw met kayman,” kanan aben Marta. “Ammok ay matago kasin sisya sin kasin katagoan di am-in ay natey sin kaodian ay agew.”

²⁵Asi et kanan Jesus, “Sak-en di manago si natey. Sak-en di mangidawat si biyag. Mo sinoy mamati en sak-en, olay mo matey, matago met laeng ay eng-enggana.

²⁶Yan da sana ay matago ay mamati en sak-en et adi da polos kaisian en Diyos. Ay patiem na?”

²⁷“Aw, Apo,” insongbat na. “Patiek ay sik-a din sinsin-ed mi ay omali sinan lobong. Sik-a din Messias ay Anak Diyos.”

²⁸Asi pag mantaolis Marta ed beey da yan kanana en iyogtana ay mangiayasak, “Maria, wada din Maestro yan ipaay-ayag daka.”

²⁹Sin nanngean Maria sidi, kapika et ena inabat,

³⁰tan wada pay laeng si Jesus sin benget di ili ay sin nangabtan Marta en sisya.

³¹Din Judio pay ay wada sin beey ay mangliwliwa en da Maria, idi inila das sisya ay mandaldalas ay komaan, inonod da, tan kanan da en mo emey sin naiponponan Lazarus ta en man-oga.

³²Somawang pay si Maria sin kad-an Jesus, kadokmog sin sangoanana yan kanana, “Apo, mo wada ka komas na ed idi, adi koman natey din agi mi.”

³³Idi inilan Jesus ay man-anog-og da Maria ya din nakiey ay Judio, peteg ay mansakit ya nariribokan di nemnem na,

³⁴et kanana, “Intoy nangiponponan yo?” “En tako ilaen, Apo,” insongbat da.

³⁵Yan pag manlolowas Jesus.

³⁶Asi kanan din Judio, “Ilan yo kadin kadakdaken di layad na en sisya.”

³⁷Ngem kanan di odom, “Mo inagasana din doy nagodab, ay maga ngata di mabalin ay inamag na ta adi koman natey si Lazarus?”

³⁸Et palalo kasin ay mansakit nemnem Jesus. Pag somag-en sin naiponponan Lazarus ay liyang ay naenban si bato.

³⁹“Kaanen yo din bato,” kanan Jesus. “Ngem Apo, enggay adi ay man-agob, tan nakap-at ay naiponpon,” insongbat Marta.

⁴⁰Kanan pay Jesus, “Ay tan niliw-am din inbagak en sik-a ay mo mamati ka, ilaem din panakabalin Diyos?”