1Aakic hombaŋ juwicnao ʒoaŋ gie bapa 6 fohame Jesuzi Betania haeo ra fisiwec. E hae ira hâcne Lazaro hâmockonec bâɋârewec.
2Eme Jesu tiwâ bâzi rikecnepie Matazi râe bâmoc ejareme Lazarohec mâmâc ŋehuc nâmbiŋ.
3Ŋehapie Mariazi kiruŋ moc opâ âsu biaŋ furi sâko jâmbâŋ i rorâ Jesu kikene ruacnerâ qizec susuc‐ticnezi bâkereŋkewec. Eme fic âsu biaŋ fifârewec.
4Eme motec jaŋere âgo moc Juda Karioto haeonec docbapa ŋic, eki ʒiŋuc muwec:
5“Opâ âsu izi 30 kina kitâcneme ŋic hapetac jarepene sâckezac me!”
6E dâŋ i hapetac jaŋere manasuhuc mi muwec, e moneŋ kânoŋ wirec‐jeŋic bajuhuc moneŋ hume ro soŋsoŋ ejujec, irec muwec.
7Eme Jesuzi muwec, “Ŋoŋe ŋokac dâŋ mi mucneniŋ, e opâ âsu i sahac‐nane ruacneme hâmope ducnuniŋte irec biŋe hâcne bajuwec.
8Ŋic hapetac dameŋ sâc ŋoŋerao juhuc juniŋmu, no ine ŋoŋerao boc mi jupemu.”
9Eme Judaŋic bocjaha jaŋe hae ira jume manarâ ijaha fisimbiŋ. Erâ Jesure sawa mâcne, Lazaro hâmockonec bâɋârewec e mâmâc honeniŋte fisimbiŋ.
10Eme irec taha bapa micne jaŋe Lazaro mâmâc qaniŋte dâŋgie bambiŋ.
11Judaŋic bocjahazi ere erâ rarâ Jesurao qohotambiŋte iŋuc embiŋ.
12Hae fureme ŋic guru sâko hombaŋte biac Jerusalem haeo fisimbiŋ jaŋe dâŋ biŋe ʒiŋuc manambiŋ: “Jesu warehuc jukac.”
13Dâŋ i manarâ ʒariŋ bazu amec erâ hatao bâfuaniŋte rambiŋ. Erâ bâfuarâ ofac hecnehuc ʒiŋuc mumbiŋ: “Ohec, Wofuŋte micte ware‐nârekac e mumbiaŋkenaŋ, Israe ŋicwofuŋ ohec!”
14Jesu e doŋgi motecne bâfuacnepie fainao ŋehuc rawec. I findaŋdâŋ kecʒiŋuc fokac irec sâcko ewec:
15“Zioŋte otâ, go mi hâwicguoc; manakic, ŋicwofuŋgezi fakac, doŋgi motecnere âsio fakac.”
16Dâŋ i motecfâc‐ticne jaŋe mârâc mi mana‐hâmombiŋ. Juku Jesu sambâŋ tatamac‐ticnao risie feme dâŋ irec manasurâ ʒiŋuc mana tarambiŋ: I ere qâreŋkekicnere sâc ijaha ecnembiŋ.
17Jesu e Lazaro wiracneme ʒâŋeruŋkonec wahame honembiŋ ŋic guru sâko i jaŋe gâcne dâŋ binaŋ ejarembiŋ.
18Eme mâsi irec biŋe manambiŋte bocjahazi hatao ra bâfuambiŋ hâcne.
19Eme farisaio ŋic jaŋe jaŋackoaŋ ʒiŋuc muhuc muc manac embiŋ: “Manaŋgopieŋ, ŋoŋe dâŋgie bâipiehapie ŋic mâmâc sasawa erao qohota‐fâreŋgopieŋ ine!”
20Judaŋic hombaŋte Jerusalem haeo fisimbiŋ jaŋere ŋondeŋko Grikŋic qâpuc moc moc mâmâc juhuc Anutu mai ecnembiŋ.
21Eme jaŋe Filipo Besaida haeonec Galilaia mâreŋkonec erao rarâ ʒiŋuc âzâcnembiŋ: “Ŋicbomboŋ, nâŋe Jesu honezo muŋgopeneŋ.”
22Mupie Filipozi Anderea âzâcneme mâmâc Jesurao rarâ dâŋ i âzâcnepic.
23Âzâcnepire ʒiŋuc muwec: “Ŋic Fâri Wâtuŋne huriri qâreŋ‐ticne fua tâcneocte ʒâfo maickekac hâcne.
24Jâmbomac jâmbâŋ ŋazape mananiŋ, jacgoŋ hândâŋ e mâreŋko mi hurâ mâc foku foocmu, mâreŋte nânâ eme ine fârine bocjaha fuaocmu.
25Moc e juju‐ticne âgo ecneme sifuckecneocmu, moc e mâreŋko juhuc juju‐ticne râsi ecneme juju sanaŋte biŋe focneocmu.
26Moc e nore kiŋaŋ qaqa ezo murâ bâjâpecnuzejec, eme no jupemuoa kiŋaŋ qaqa‐nanezi juocmu. Moc e no kiŋaŋ qanareocmu, e Mamac‐nanezi erickeocmu.
27Ʒi maŋnane fâfârerâ ɋarac ɋarac qakac. Ehame weniŋuc mupemu? ‘Mamac go dameŋ maicnukac i bâsuec’ iŋuc mupe? Misac, iŋuc aricne, dameŋ i hâcne maicnuocte mukicne.
28Irec Mamac go mutec ʒâŋe biŋegere huriri qâreŋ fua tâcnezejec.” Mume sambâŋkonec dâŋ ʒiŋuc wahawec: “I huriri qâreŋ‐ticne fuawec erâ huriri qâreŋ jaha fua raocmu.”
29Eme ŋicguru domambiŋ jaŋe manarâ mumbiŋ, “Ɋuŋ hejec.” Â gâcnezi mumbiŋ, “Aŋelo moczi dâŋ âzâcnejec.”
30Mupie Jesuzi micjeŋicko rorâ ʒiŋuc jazawec: “Dâŋ i nahacnere mâcne, ŋoŋere erâ fuajec.
31Ʒi mâreŋko ââke râwiŋ dameŋ maickekacte mâreŋ ʒirec ŋicbomboŋ e hetuŋkezo.
32Mâreŋkonec bâfeŋnupie mâreŋ sâc ŋic fârec‐jopape norao fisiniŋmu.”
33I hâmoc weniŋucne hâmoocmu irec dâŋ suŋsuŋne iŋuc muwec.
34Mume ŋicguru domambiŋ jaŋe ʒiŋuc âzâcnembiŋ: “Nâŋe mitio dâŋ kecʒiŋuc manaeŋgopeneŋ: Kristo e mi hâmohuc juraʒihuc juocmu. Eme goki wemocte ʒiŋuc mukic: ‘Ŋic Fâri Wâtuŋne e bâfeŋneniŋmu’? Ŋic Fâri Wâtuŋne e mo?”
35Eme Jesuzi dâŋ ʒiŋuc bâtikie‐jarewec: “Ʒoctamac e ŋondeŋ‐ŋeŋicko dameŋ bembeŋne mac tamaeocmu. Irec dapâczi foŋŋopazacte ʒoctamac foŋarehame e maickerâ junʒepieŋ. Moc e dapâcko rahuc hata mi hone taraocmu.
36Irec ʒoctamac foŋarehame maŋzi sakarehuc kikefuŋfâc‐ticne enʒepieŋ.” Jesu e dâŋ iŋuc murâ ra soŋsoŋko juwec.
37Jesu e mâsi fuŋne ʒâŋe fai‐jeŋicko bame hone‐bipiehuc sifu erao mi roweckembiŋ.
38I porofete Jesajare dâŋ sanaŋkeocte iŋuc embiŋ. E dâŋ ʒiŋuc qâreŋkewec: “Wofuŋ, biŋedâŋge mupene mozi mana ʒakieekac? Â Wofuŋte me i morao fua taniŋkeekac?”
39Erâ Jesure dâŋ mi mana ʒakiembiŋ i Jesajare dâŋqâreŋ moc fokacte embiŋ ine kecʒiŋuc:
40“E ʒâŋe‐jeŋic tiŋtuŋ barâ maŋjeŋic bâzickewec, jaŋe ʒâŋezi wiac hone taranʒipiŋte, â maŋzi wiac mana taranʒipiŋte, ehuc maŋjeŋic bârisiepie bâpiaŋ‐jopazipore.”
41Jesaja dâŋ muwec, i Jesu sambâŋ tatamac‐ticne honerâ muwec.
42Eme micne bapa jaŋeraonec gâcne jaŋe Jesu manasiŋkembiŋ wâc. Erâ mufuapie farisaio jaŋe miti sakare‐jarenʒipiŋte hâwic‐jopame hesoŋkembiŋ.
43Jaŋe ʒâŋe biŋe‐jeŋic ŋic jaŋerao waha qaqane ezacte manapie ŋemâckewec, â Anuturao waha qaqane ezacte manapie afeckewec.
44Jesu e hahaŋne bahuc dâŋ ʒiŋuc muwec: “Moc e no manasiŋnuocmu, e no sawa mâcne, sorecnuwec e mâmâc manasiŋkeocmu.
45Â moc e no honecnuocmuzi sorecnuwec e mâmâc honeocmu.
46No ʒoc tatamaczi mâreŋko wahapo, eme moc e no manasiŋnuocmuzi dapâckonec wefuocmu.
47Moc e dâŋnane manarâ beheme okacne mi râcnepemu, no ŋic okacne jarepemurâ mâcne, bâpiaŋ‐jopapemurâ wahapo.
48Moc e no qikiŋnuhuc dâŋnane beheocmu, e mumutara fuacneocmu, dâŋ muekopac izi juku dameŋ sâkoo mumutara ecneocmu.
49No dâŋ i no nahacne maŋte mi muekopac, Mamac sorecnuwec e jahac dâŋ mufuapemurâ sâcmutâc enarewec.
50Erâ no manakopac, micdâŋ‐ticnezi juju sanaŋ bâfuaekac. Dâŋ muekopac i Mamaczi mutâcne‐narewec sâc muekopac.”
