San Juan 11:6-40

⁶ka benile' rson bi shao' Lázarona', wllachile' zi c̱hop lla gana' zoe'.

⁷Na' ka wde, chi'e beṉ'ka' nakgake'ne' txen: ―Ḻi sho' Judeana' sto shii.

⁸Na'ch beṉ'ka' nakgake'ne' txen che'gake'ne': ―Maestro, kani batchgana' goklallii beṉ' Israelka' lle' na' witgake' li' kon yaja'. ¿Ana' cheenilo' yizajo' na'?

⁹Na' che' Jesúza' ḻegake': ―¿Aaga shlliṉ goran' de beeni'na' shlla? Na' beena' chda tellalə aga willjac̱hewee daa de beeni'na' yell-lioni.

¹⁰San shi chde' waḻ-lə, willjac̱hewee daa bi nḻa'.

¹¹Na'tech golle' ḻegake': ―Ba ches Lázarona', beena' nllaguicho, na' sha' lljasbanee.

¹²Na'ch che' beṉ'ka' nakgake'ne' txen: ―X̱an', shi ba chese', wiyakshao'lall'kzile'.

¹³Jesúza' golle' ka' daa ṉezile' ba wit Lázarona', na' ḻegake' chakgakile' daa cheszen' golle' ka'.

¹⁴Na'ch be'len Jesúza' ḻegake' dill' ka to shajni'gakile', chi'e: ―Ba wit Lázarona'.

¹⁵Na' chibaid' bi wzoa', ḻa' chyalljch gon' ka shajḻe'chle c̱ha'. Ḻi sho' shajcho gana' die'.

¹⁶Na'ch Tomáza', beena' che'gake' Dídimo, chi'e beṉ'ka' sto: ―Ḻi sho'lene' kwenc̱he lencho guetlenchone' shi witgake'ne'.

¹⁷Na' ka bllingake' yella', na' che'gake'ne' ba gok tap lla bgash' Lázarona'.

¹⁸Na' Betániana' llian gaozə Jerusalénna', ka do shoṉ kilómetro nḻaagakan.

¹⁹Na' beṉ' zan beṉ' Israelka' lle' Jerusalénna' wyajgake' jenxenlall'gake' Mártana' len Maríana' daa wit beṉ' zane'ka'.

²⁰Na' ka wṉezi Mártana' ba zoa illin Jesúza', na'ch jatiḻe'ne', per Maríana' bigaaṉe' lille'ka'.

²¹Na' ka blline' kwite'na', chi'ene': ―X̱an', sheḻ' zo' ni kana' wḻen yillwe' c̱he beṉ' zan'na' bi wite', sheḻ'ka'.

²²Na' ṉaa ḻa'kzi ba wite', ṉezid' goṉ Chioza' bittezə dii iṉabilo'ne'.

²³Na' che' Jesúza'ne': ―Wiban beṉ' zano'na'.

²⁴Na'ch che' Mártana': ―Awe, ṉezid' wibane' kat' yiban beṉ' wetka' llana' te c̱he yell-lioni.

²⁵Na' che' Jesúza'ne': ―Nad' chon' ka chiban beṉ' wetka' na' nap' yeḻ' mban dii bi te c̱heyin. Beena' chonḻilallee nad', ḻa'kzi ba wite', wibanchkze'.

²⁶Na' yog' beṉ'ka' mban na' chonḻilall'gake' nad' bi guetgake' toshiizi. ¿Achajḻi'o dga nia' li'?

²⁷Na' che' Mártana'ne': ―Awe, X̱an', chajḻi'a lin' nako' Crístona', na' lin' Xiiṉ Chioza', beena' llia bia' yid yell-lioni.

²⁸Na' biyoll wna Mártana' ka', na'ch ziyaje' zjaṉie' beṉ' bile' Maríana', na' chi'ene' xochizi: ―Ba bid Maestrona' chṉie' li'.

²⁹Na' kon ka golle' Maríana' ka', lii wzolla'tie' jawie' Jesúza'.

³⁰Bilaṉ' sho' Jesúza' yella', ni zetie' gana' jatiḻ Mártana'ne'.

³¹Na' beṉ' Israelka', beṉ'ka' chonxenlall'gake' Maríana' lille'na', ka ble'gakile' wzollee na' zejdoe', na'ch zjanogake'ne' chakgakile' lljc̱helle' cho'a banan'.

³²Na' ka bllin Maríana' kwit Jesúza', lii bc̱hek'te xibe'na' lawe'na' chi'ene': ―X̱an', sheḻ' zoasho' ni, bi wit beṉ' zan'na', sheḻ'ka'.

³³Na' ka ble'i Jesúza' chbell Maríana', na' ka'kzə beṉ'ka' zejlengake'ne', na' to dii wal inlleb gokile'.

³⁴Na' chi'e ḻegake': ―¿Gara jakwash'lene'? Na'ch che'gake'ne': ―Sho' lljawiacho gana' die', X̱an'.

³⁵Na' wchell Jesúza'.

³⁶Na'ch che' ljwell beṉ' Israelka' lle' na': ―Ḻi wwia ka gokchgaile'ne'.

³⁷Na'ch baḻe' che'gake': ―Beeni bene' ka ble'i beṉ' lc̱hoḻa', ¿Aaga zak bisle' Lázarona', na' bi wite' sheḻ'ka', lla?

³⁸Na'ch Jesúza' wizakile' dii wal ka bllingake' cho'a bana'. Na' bana' nakan to blej, na' chi' to yaj nkwasha'n cho'ayinna'.

³⁹Na'ch che' Jesúza': ―Ḻi yikwas yaja' ka'lə. Na' Mártana', beṉ' zan beṉ' weta', chi'ene': ―X̱an', ba chḻa' beena' zban, ḻa' ba gok tap lla wite'.

⁴⁰Na' che' Jesúza'ne': ―¿Aaga ba wnia' li' shi shajḻi'o, na' ile'ilo' yeḻ' wak choo yeḻ' wak xen c̱he Chioza'?