JUAN 11:6-40

⁶Pero quema quicajqui mococohua Lázaro, mocajqui seyoc ome tonati campa itztoya.

⁷Huan teipa techilhui tiimomachtijcahua: ―Ma tiyaca sempa estado Judea.

⁸Huan tiimomachtijcahua tiquilhuijque: ―Tamachtijquet, nopa israelita tayacanani nepa quinequiyayaj mitztepachose. ¿Para ten sempa tiyase?

⁹Huan Jesús technanquili: ―Ama ayemo teno nopantis. Onca majtacti huan ome horas quema tanestoc ipan se tonal. Se cati nejnemi quema tonaya amo teno ipantis pampa quitaahuilía nopa taahuili ipan ni taltipacti.

¹⁰Pero sinta se nejnemi quema tzintayohua, motepotanis pampa amo onca taahuili. Huan quena, ajsis hora quema taijqui nopantis.

¹¹Jesús quiijto ya ni huan teipa techilhui: ―Tohuampo Lázaro cochtoc, pero niyas niquixititi.

¹²Huan tiimomachtijcahua tiquilhuijque: ―Toteco, sinta cochtoc, cualtitoc, pampa quema isas, huajca mochicahuas.

¹³Pero Jesús nelía techilhuiyaya Lázaro ya mictoya, pero timoilhuiyayaj san cochtoya.

¹⁴Huajca Jesús techilhui xitahuac: ―Lázaro ya mictoc.

¹⁵Huan na nipaqui para amo niyajqui nimantzi pampa ama más cuali para amojuanti pampa más antechneltocase na. Ma tiyaca tiquitatij.

¹⁶Huan Tomás, cati quitocaxtiyayaj Cuate huan cati itztoya se ten tojuanti tiimomachtijcahua Jesús, techilhui: ―Ma tiyaca tojuanti para nojquiya ma techmictica tojuanti sinta quimictise Jesús.

¹⁷Huan quema Jesús ajsito altepet Betania, ya quipixtoya nahui tonati quitalijtoyaj itacayo Lázaro ipan ostot ipan se tepet.

¹⁸Huan Betania mocahua nechca Jerusalén, huelis se eyi kilómetro ihuejcaca.

¹⁹Huan miyac israelitame hualajtoyaj ten Jerusalén para quinyolchicahuase Marta huan María pampa mijqui iniicni.

²⁰Huan quema Marta quicajqui para hualayaya Jesús, yajqui quinamiquito ipan ojti, pero María mocajqui calijtic.

²¹Huan Marta quiilhuito Jesús: ―NoTeco, sinta tihualajtosquía quema mococohuayaya, noicni amo mictosquía.

²²Huan masque ya mictoc, nijmati Toteco mitzchihuilis nochi cati tijtajtanis.

²³Huan Jesús quiilhui: ―Moicni sempa moyolcuis.

²⁴Huan Marta quiijto: ―Quena, nijmati moyolcuis sempa quema nochi mijcatzitzi moyolcuise ipan itamiya tonali.

²⁵Huan Jesús quiilhui Marta: ―Na cati niquinyolcui masehualme cati mictoque huan sempa niquinmaca nemilisti. Masque miquis itacayo se cati nechneltoca, quipiyas nemilisti yancuic para nochipa.

²⁶Huan nochi masehualme cati itztoque huan nechneltocaj amo miquise para nochipa. ¿Tijneltoca cati nimitzilhuía?

²⁷Huan Marta quiilhui: ―Quena, noTeco nijneltoca ta tiCristo, tiIcone Toteco. Tiitztoc yaya cati tijchiyayayaj para ajsis ipan totaltipac.

²⁸Huan quema Marta tanqui quiijto ya ni, yajqui quinotzato María huan quiixtacailhui: ―Totamachtijca ya ajsico huan mitznotza.

²⁹Huan quema María quicajqui ni, yajqui nimantzi para quinamiquiti.

³⁰Huan Jesús noja ayemo ajsiyaya campa altepet pampa mocajtoya campa Marta quinamiquito.

³¹Huan nopa israelitame cati itztoyaj calijtic para quiyolchicahuase María quiitaque quema quisqui nimantzi huan quitoquilijque pampa moilhuiyayaj yahuiyaya quichoquiliti iicni campa quitoctoyaj.

³²Pero María yajqui campa itztoya Jesús huan quema quiitac, motancuaquetzqui iicxita huan quiilhui: ―NoTeco, noicni amo mictosquía sinta tihualajtosquía quema mococohuayaya.

³³Huan Jesús quiitac chocayaya María huan nojquiya chocayayaj nopa israelitame cati hualajque ihuaya, huan yaya no moyolpitzahuili huan motequipacho.

³⁴Huan quintatzintoquili: ―¿Canque anquitoctoque? Huan quiilhuijque: ―Xihuala, Toteco, ma tijtachilitij.

³⁵Huan Jesús chocac.

³⁶Huan nopa israelitame quiijtojque: ―Xiquitaca, Jesús nelía quiicneliyaya Lázaro.

³⁷Huan sequij quiijtojque: ―Yaya quichicajqui nopa popoyotzi. ¿Amo hueltosquía nojquiya quichicajtosquía Lázaro para amo mictosquía?

³⁸Huan sempa Jesús moyolpitzahuili huan yajqui campa quitoctoyaj. Quitalijtoyaj itacayo Lázaro ipan se ostot campa se tepet huan quiixtzactoyaj ica se hueyi tepatacti.

³⁹Huan Jesús quiijto: ―Xiquijcuenica ne tepatacti. Huan Marta, iicni Lázaro, quiilhui Jesús: ―Pero ya quipiya nahui tonati tijtojque huan huelis ya mijyotía.

⁴⁰Huan Jesús quiilhui: ―¿Amo nimitzilhuijtoc sinta tijneltocas, nimitznextilis ihueyitilis Toteco?