Yuhana 11:6-40

⁶Na awa lanza Lanzaru di nin konu, Yesu kpina ayiri aba kiti kanga na awa yita ku.

⁷Kimal nani, aworo nono katwawe “Cannari tido u Yahudiya tutung.”

⁸Nono katwawe woroghe, “Rabi, na udandauna ba, na a Yahudawa nyita nin su iffillusu fi, umini di nin su ukpili kite tutungha?”

⁹Yesu kwana, a woro, “Na abiri kubi likureari di nanya liyirin ba? Asa umong din cin nin liring, na ama tiru ba, bara na adin yenju kiti kanang nin liring.

¹⁰Nanya nani, as adin cin nin kitik, aba tiru bara na nkanang di ninghe ba.”

¹¹Yesu wa bellin uleli ulire, kimal nleli ulire, aworo nani, “Udondong bite Laazaru ndo nmoro, mma du nnan di fyaghe nmore.”

¹²Nono katwawe tunna iworoghe, “Cikilari, andi nmoroari adi mum, ama fitu.'

¹³Yesu wasu uliru nbellen nkul Laazaruari, inung wa su adin liru nmoro nshinuari.

¹⁴Yesu nin belle nani kanang, “Laazaru nku.

¹⁵Nlanza nmang bara anughe, na nni yita kite ba anung nan yinna. Cannari tido kitime.”

¹⁶Tuma, ulenge na iwa yiccughe fibari, woro nadon katwa me, “Na arik wang do ligowe tinan ku ligowe nan Yesu.”

¹⁷Na Yesu nda, ada se Laazaru nmal ti ayiri anas kisekk.

¹⁸Ubaitanya wadi susut nin Urshalima, npit mine nafo timel tiba.

¹⁹A Yahudawa gbardang wa dak kitin Marta nin Maryamu, ida lissu nani nin kul ngwana mine.

²⁰Marta tunna na a lanza Yesu din cinu, anuzu adi zuro ninghe, Maryamu lawa kilare.

²¹Marta tunna aworo Yesu ku, “Cikilari, ndfo uwa duku, na gwana nighe wa kuba.

²²Nene wang, ko iyapin imonari utirino Kutelle, ama nifi inin.”

²³Yesu woronenge, “Gwanafine ma fitu tutung.”

²⁴Marta woroghe nenge, “In yiru ama fitu tutung kubi nfiyu na nan kul, liri nimalin.”

²⁵Yesu woroghe, “Menghari ufyu na nan kul, Myeri ulai; ulenge na ayinna nin mi, ko aku, ama ti ulai;

²⁶ame ulenge na adi nin lai, aminin yinna nin mi na ama kuba. Uyinna nin le ulire?”

²⁷Aworoghe nenge, “Nanere, Cikilari, in yinna fere Kristi, Usaun Kutelle, ulenge na adin cinu ucin da nanya nyi.”

²⁸Na a belle nani, a nya adi yiccila Maryamu gwane likot. Aworo, “ Unan dursuzu niyerte di kikane, adin yiccufi.”

²⁹Na Maryamu nlaza nani, afita mas ado kitin Yesu.

³⁰Kube na Yesu wadi asa pira nanya kagbire ba awa dutu kite na Marta nni zuro ninghe.

³¹A Yahudawa alenge na iwa dak lippe, wadi ligowe nin Maryamu nanya kilare, na iwa yeneghe afita mas anuzu udas, idofinghe, iwa yenje nafo anuzu ucindu kisseskkere adi gilu ku.

³²Maryamu tunna na ada kiti kanga na Yesu yissin ku a yeneghe, adio kutyen nbun me a woroghe, “Cikilari ndafo una yita kikane, na gwana ninghe wa ku ba.”

³³Na Yesu in yeneghe kuculu, a a Yahudawe na ida ligowe ninghe wang di kuculu, ata liduru nanya nruhu, ayi me fita kang;

³⁴a woro, “Ina nonkoghe nweri?” Iworoghe, “Cikilari da uda yene.”

³⁵Yesu gila.

³⁶A Yahudawa woro,”Yenen ngbardang nsuwe na adi Laazaru ku mun!”

³⁷Among mine woro, “Na unit ulelere, ulenge na awa pun iyizi nnit ule na awa di udu ba, na ana wanti ulele ukule ba?”

³⁸Yesu nin lidurun nanya kibinayi me, do kiti kisekkee. Kisekke kutiyari, kutala wa yerdin nnuwe.

³⁹Yesu woro, “Kalan litale.” Marta, gwanan Laazaru unan kule, woro Yesu ku, “Nene aduru ayiri anas kidowe nmal di cizunu ubiju.”

⁴⁰Yesu woroghe, “Na nbelinfi nenge, andi uyinna, uma yenu ngongong Kutelle ba?”