Ioanes 11:6-40

⁶Pali na tahuna i longo a velengane Lasarus i giloa, i uka ma i vano maia. I made tabu vonga na parava i rua.

⁷Muri i taki e huriki a murimuri vona, i ta maea, “Si hamule lakea na tabeke ne Iudea.”

⁸Lakea e huriki a murimuri vona ri takia, “Mari ni tovo, rira kunana e huriki a Iuda ri toni ni padimate ioe na kedo, pali ngane o ngaru ni hamule lokovonga tabu?”

⁹E Isu i koli, i ta maea, “Na parava lobo a haro i rike na hatelanga, i rolo na malunga. A viri i laho na hini palala i uka ma ge boru, a vuhuna a nipara na malala i vakapalala a dala vona.

¹⁰Pali na tahuna i laho na rodo bara i boru, a vuhuna i uka nipara.”

¹¹E Isu i taki lobo a ngava nga lakea i taki ria tabu, i ta maea, “E turane hita e Lasa­rus i mahita. Pali ngane ga loko­vonga ga vangoa.”

¹²E huriki a murimuri vona ri koli ri ta maea, “Bakovi Dagi, i kamumu i mahita. A gilanga vona bara i lobo.”

¹³E Isu i ta vaka­kika vona e Lasarus i mate. Pali e huriki a murimuri vona ri luhoi ta i mahita kunana.

¹⁴Muri i ta kavakava, i ta maea, “E Lasarus i mate.

¹⁵Iau a luhoi mua, lakea i uka ma a vano ga made turana. A rata mavonga, mu gu luhoi tora iau. Pali ngane si gi lokovonga vona.”

¹⁶Muri e Tomas, a rana tara e Didimas, i taki e huriki a murimuri, i ta maea, “Hita ranga, si lokovonga si mate turana.”

¹⁷Na tahuna e Isu i bele, ni vakalongo vona a podane Lasarus i tabuli pali na babe na parava i va.

¹⁸A tanga e Betani i tabukoi o Ierusalem. A maravana a kilo­mita i tolu,

¹⁹lakea i kupo e huriki a Iuda ri bele mai e Maria e Marta ri gi luke rua, a vuhuna i mate pali e kura­bane rua.

²⁰Na tahuna e Marta i longoa e Isu i valai, i pagitala na ruma ge taguia e Isu. Pali e Maria i made kunana.

²¹Na tahuna e Marta i masia e Isu, i takia, i ta maea, “Bakovi Dagi, ioe bara o made koea, e kurabagu i uka ma ge mate.

²²Pali a lohoka vona a Vure bara i rata a maki o takia vona.”

²³Lakea e Isu i takia, “E kurabamu bara i mahuri mule tabu.”

²⁴E Marta i koli, i ta maea, “A lohoka vona bara i mahuri mule tabu na nilobona parava, na tahuna a Vure ge vakamahuri mule e huriki.”

²⁵Lakea e Isu i takia, “Iau a viri a vaka­mahuri mule e huriki, a habi a nima­huri ne huriki. A viri i luhoi tora iau i mate, bara i mahuri tabu.

²⁶Na tahuna e huriki ri mahuri ri luhoi tora iau, i uka ma ri gi mate. Ra ngava nga, o luhoi tora, o i uka?”

²⁷E Marta i koli, i ta maea, “Bakovi Dagi, a longo a ngava ngi. A luhoi ioe e Kristo, a Tuna Vure ni taki ta ge valai na malala.”

²⁸E Marta i taki loboa a ngava iea i hamule. I tulia e tarina e Maria, ru pesi tala, i takia, “A mari ni tovo i valai pali, i nana vomu.”

²⁹Na tahuna e Maria i longoa, i malaviriri kunana i pesi rike, i lakea mai e Isu.

³⁰E Isu i uka ma i bele ma na tanga. I tabana i made na hini i taguia e Marta vona.

³¹Na tahuna e huriki a Iuda ra ri lukea e Maria pololilo na ruma, ri masia i pesi rike hari hari, i pagitala, ri muri maia. Ri luhoi ta ge lakea na hini ni vakatabuli a podane kurabana, ge tangi vonga.

³²Na tahuna e Maria i bele vona a hini i made vona e Isu, i lolu puru tabukoi na vahana i takia, “Bakovi Dagi, ioe bara o made koea, e kurabagu i uka ma ge mate.”

³³Na tahuna e Isu i matai e Marta, e huriki a Iuda, ri valai turana ri tangi, i dodo ria, i rakudu a hatena a hini ri tangi hateka.

³⁴Lakea e Isu i nana ria, “I vai a hini mu vakatabuli a podana vona?” Ri koli ri ta maea, “Bakovi Dagi, o valai o masia.”

³⁵Lakea e Isu i tangi.

³⁶Na tahuna e huriki a Iuda ri masia i tangi, ri ta maea, “Masia, i ngaru hatekea ra bakovi iea!”

³⁷Pali i ranga e huriki ri ta maea, “I vaka­matapara a viri i kepa, pali i navai i uka ma i koria ra bakovi iea, nahea ge mate?”

³⁸E Isu i dodo ria, i rakudu a hatena na hini ri tangi hateka. I vano i bele na lovo. Ra lovo iea a babe, ni tukari na kedo a matana.

³⁹E Isu i taki ria, i ta maea, “Mu kule talea a kedo.” Pali e Marta, re kurabana i mate, i takia, i ta maea, “Bakovi Dagi, i mavuru pali, a vuhuna i tabuli na parava i va pali.”

⁴⁰Lakea e Isu i takia, “Iau a taki ioe pali. Ioe bara o luhoi tora, bara o masia a nitora na Vure.”