Yohane 11:6-40

⁶Yesu hayahulike Lazali koghula, kongetsa ghamatsuwa meli gha kukala hala hayakalile.

⁷Kuya Yesu kawalongela iwanang'ina wake, “Tuye keli Yudeya.”

⁸Iwanang'ina wake wamlongela, “Mlangulitsi, ghamatsuwa chidogho ighalutile Wayahudi tsawabama wakutowe ne ghamabwe, ule kwobama ughende keli hanu hala?”

⁹Yesu kawedika, “Apfi misi yahela masaa kumi ne meli bae? Imunu iyokwanga nemisi ng'ekwala bae kwaapfila koghwona ghumwanga ghwe isi ino.

¹⁰Lekeni imunu ang'anga nechilo kekwala, kwaapfila kahela ghumwanga.”

¹¹Yesu hayalongile apfi, kaghendelela kuwalongela, “Sale yetu Lazali kawasa, lekeni noghenda kumlamsa.”

¹²Iwanang'ina wake wamwidika, “Mtwatsa, ka kawasa, katsohona.”

¹³Yesu tsayang'ali yolonga Lazali tsakafa lekeni iwanang'ina wake wapfikitsa Lazali tsakawasa.

¹⁴Apfo Yesu kawalongela mwatsimwatsi, “Lazali kafa,

¹⁵lekeni kwaajili yenu nodeng'elela kwaapfila sikalile naye bae, ili mtoghole. Leka tumghendele.”

¹⁶Kuya Tomasi, iyakemighwe Basa kawalongela iwanang'ina wayaghe, “Leka tughende ne Mlangulitsi ili tufe naye.”

¹⁷Yesu hayapfikile, tsakapfika lukuli lwa Lazali lwikighwa mne likabuli ghamatsuwa mane ighalutile.

¹⁸Kaye ya Betaniya tsaikala habehi ne Yerusalemu, utali wa maili mbili,

¹⁹na Wayahudi wengi watsa kuwakanza Marita ne Mariya kwa ukufa kwa ndughu yawo.

²⁰Marita hayahulike Yesu kakutsa, kaghenda kunze kwitingana na Yesu, lekeni Mariya tsakasighala mng'anda.

²¹Marita kamlongela Yesu, “Mtwatsa, ka ung'awile hano, lumbu wangu tsa yang'alekile kufa!

²²Lekeni nomanya hata sambi Imulungu katsokwing'a chochose chaumlomba.”

²³Yesu kamlongela, “Lumbu wako katsotsilihuka.”

²⁴Marita kamwidika, “Nomanya katsotsilihuka keli mne litsuwa lya ukutsigha.”

²⁵Yesu kamlongela, “Nene nautsilihuko ne ughima. Imunu iyonitoghola nene, ang'afa katsakuwa mghima,

²⁶na imunu wowose iyokala na kunitoghola nene ng'atsakufa bae. Pfii kwotoghola?”

²⁷Marita kamwidika, “Ona, Mtwatsa! Nokutoghola ghweghwe kwa Kiristu, Imwana wa Imulungu, iyatsile mne isi.”

²⁸Marita hayalongile pfino, kaghenda mng'anda kamkema Mariya chinyelenyele. Kamlongela, “Mlangulitsi kabaha, kokukema.”

²⁹Mariya hayahulike pfino, kenuka himahima kamghendela Yesu.

³⁰Na Yesu tsakakala ng'ana yapfike mkaye, ila kakala hanu hala hayetingane ne Marita.

³¹Wayahudi iwakalile mng'anda womkanza Mariya, hawamwonile Mariya kenuka himahima na kulawa kunze wamuwinza, wapfikitsa yang'ali yoghenda kulila mne likabuli.

³²Mariya hayapfikile hanu hayali Yesu na hayamwonile, kamtowela ghamaghoti, kamlongela, “Mtwatsa, ka ung'awile hano, lumbu wangu tsa yang'alekile kufa!”

³³Yesu hayamwonile Mariya kolila, na Wayahudi iwatsile na Mariya nawo wolila, Yesu kaghanzika mne ghumoyo ghwake, kona usungu.

³⁴Yesu kawaghutsa, “Angu mumtsikile kwani?” Wamwidika, “Mtwatsa, itsa wone.”

³⁵Yesu kalila.

³⁶Kuya Wayahudi walonga, “Mlole pfayamnoghele!”

³⁷Lekeni iwanu wangi welongela, “Ka kamhonetsa imunu chifita, ule ng'adahile kumtenda Lazali aleke kufa?”

³⁸Yesu yang'ali yoghanzika keli mne ghumoyo ghwake, kaghenda mbaka mne likabuli, likabuli tsalikala imango iighubikighwe ne libwe.

³⁹Yesu kawalaghitsa, “Mlibimbilise libwe!” Marita lumbu wa imunu iyafile kamwidika, “Mtwatsa, lekeni katsonung'a, ghamatsuwa mane ghabita kulawa yatsikighwe!”

⁴⁰Kuya Yesu kamlongela, “Apfi sikulongele bae ka ung'atoghola, kutsakona utunitso we Imulungu?”