San Juan 11:6-40

⁶cate' gwṉezde' chacšene Lázaron', bega'aṉche' yec̱hope ža gan' zoen'.

⁷Nach gože' beṉe' ca' zjanaque' ḻe' txen: ―Ḻe šo'o šejcho distritw Judean' da' yoble.

⁸Na' gose'ene': ―Maestrw, bi ža na'zen' beṉe' gwnabia' c̱he nación c̱hechon' gosaclaže' yesote' le' yosoc̱heḻe' le' yej. ¿Da' yoble šejo' na'?

⁹Jesúsen' gože' ḻegaque': ―Lagüe žan' nsa' šižiṉw hor, na' beṉe' chda lagüe ža bi chc̱hegüe', ḻe nseṉi' gwbižen' ḻo yežlion'.

¹⁰Na' beṉe' chda ba goḻ chc̱hegüe', ḻe nac c̱hoḻ.

¹¹Gwde gwne' ca' nach gože' ḻegaque': ―Beṉe' xmigwcho Lázaron' ba chtase' na' ša'a šjaysbana'ne'.

¹²Na' gose'ene': ―X̱anto', še ba chtase' güeyacczede'.

¹³Jesúsen' gwne' ca' dan' gwṉezde' ba got Lázaron', na' beṉe' ca' zjanaque' Jesúsen' txen gosacde' še chtaszen'.

¹⁴Nach Jesúsen' bochix̱gaten' bi zejenṉa' gwne' ca': ―Ba got Lázaron'.

¹⁵Na' chebeda' bi gwzoa' na' šlac chacšende', cont gona' šejḻe'le c̱hia'. Ḻe šo'o šejcho gan' de'na'.

¹⁶Nach ben' le' Tomás ben' bososi'e Tomás Cuaš gože' yezica'chle beṉe' ca' zjanaque' Jesúsen' txen: ―Ḻe šo'o cont gatcho txen len Jesúsen' še yesote'ne'.

¹⁷Na' ja'aque' Betanian' len Jesúsen', na' cate' besežine'na' beṉe' Betania ca' bosozende' ḻe' ba goc tap ža bosocuaše' Lázaron'.

¹⁸Betanian' chin' gaḻa'ze Jerusalénṉa' ca do gašjw hor.

¹⁹Na' beṉe' zan beṉe' gualaž c̱hegaque' že' Jerusalénṉa' besežine' gan' zoa Martan' len Marían' cont yeso'e ḻegaque' yeḻa' chxenḻaže' da' got beṉe' zangaquen'.

²⁰Nach Martan', cate' gwṉezde' Jesúsen' ba bžine' cho'a yežen', na' gwze'e jašague'ne'. Na' Marían' bega'aṉe' yo'ona'.

²¹Nach Martan' gože' Jesúsen': ―X̱ana', šaca' zo' nga caten' gocšene beṉe' zanan' biḻja gote' šaca'.

²²Na' ṉezda' ḻa'czḻa' ba gote', bite'tez da' ṉabdo' Diosen' gone', gonczen'.

²³Nach gož Jesúsen' ḻe': ―Güeban beṉe' zanon'.

²⁴Nach Martan' gože'ne': ―Ṉezda' yebane' cate' yesyeban beṉe' guat ca' žan' te c̱he yežlion'.

²⁵Na' gož Jesúsen' ḻe': ―Neda' chac chosbana' beṉe' guat ca' ḻe nsa'a yeḻa' mban toḻi tocaṉe. Da'nan' beṉe' ca' yesejnilaže' neda', ḻa'czḻa' yesate', guata' yeḻa' mban c̱hegaque' toḻi tocaṉe.

²⁶Na' note'tez beṉe' nite' chesejnilaže' neda', gwbat yesebiaye'e. ¿Chejḻi'o da' nga chnia' le'?

²⁷Na' gož Martan' ḻe': ―X̱ana', chejḻi'a naco' dogualje Xi'iṉ Dios. Chejḻi'a naco' Criston' ben' ba gwlezto' seḻa' Diosen' yežlion' yedeṉabi'e.

²⁸Beyož gwna Martan' ca' beyeje' jayeže' María bilen' šižize: ―Ba bla' Maestron' cho'a yežen' na' chṉie' le'.

²⁹Na' Marían' cate' bende' dan' gož Martan' ḻe' ḻa' gwza'te' na' gwyeje' gan' zoa Jesúsen'.

³⁰Biṉa' žin Jesúsen' lagüe yežen' ca horen', ṉe' nga'aṉe' cho'a yežen' gan' jašag Martan' ḻe'.

³¹Na' beṉe' Jerusalén ca' nita' liž María, beṉe' cheso'e ḻe' yeḻa' chxenḻaže' da' got beṉe' zanen', cate' besele'ede' gwza' Marían' nach gosa'aclene' ḻe', gosacde' zeje' cho'a blojen' gan' ngaše' zjac̱heže'.

³²Na' Marían' cate' bžine' gan' zoa Jesúsen' na' ble'ede' ḻe', ḻa' bzoate xibe' lagüen', gože'ne': ―X̱ana', šaca' zo' nga caten' gocšene da' beṉe' zanan', biḻja gote' šaca'.

³³Na' cate' ble'e Jesúsen' chbež Marían' na' ḻecze chesebež beṉe' Jerusalén ca' za'aclene' ḻe', da' juisyw da' goque Jesúsen' na' bžaglagüe' ḻo' yic̱hjlažda'ogüen'.

³⁴Na' gože' ḻegaque': ―¿Ga bcuaše'lene'? Na' gose'e ḻe': ―X̱anto', yo'o na' le'edo'.

³⁵Na' gwchež Jesúsen'.

³⁶Na' beṉe' Jerusalén ca' gosene': ―Ḻe ṉa' catequen' chacde' ḻe'.

³⁷Na' baḻe' gosene': ―Bengan' bene' ga ble'e beṉe' lc̱hoḻen', na' šaca' gwzoe' nga caten' gocšene Lázaron', benḻje' cont bi gote'.

³⁸Na' da' yoble da' juisyw da' goque Jesúsen' ḻo' lažda'ogüen'. Na' gwyeje' gan' bosocuaše' ben'. Naquen to bloj na' da' to yej cho'enṉa'.

³⁹Na' Jesúsen' gože' beṉe' ca': ―Ḻe ca'a yejen'. Na' Martan' beṉe' zan da' Lázaron' gože'ne': ―X̱ana', ba chḻa' ben' zigw, ḻe bac̱h goc tap ža gote'.

⁴⁰Na' gož Jesúsen' ḻe': ―Ba gwnia' le' še šejnilažo' neda' na' le'edo' nac Diosen' beṉe' zaca' juisyw.