YOHAAN 11:6-40

⁶Wakan ki a’di ciḵki gwo gom a’di mmo’ba’thkina a’di mo tani a’di c̱a’bki’d ka cim su/ naskina/ e mo yin jin dikina a’di nycine/ mo be.

⁷Dhali yan’ko’d a’di ki o gwo yansan e imanciḵ a’di gwo mo mmo/o gwo mo ki: Dhalki ana iina Pa Yahuudiyya mo doḵ/e.

⁸Dhali imanciḵ a’di gwo ki thoḵ a’di gwo mo ki: Rabbi, ’Kwani Yahuuda/ hila/ uni shwaneyin ŋap̱ki /e mmo’kosh ki wosh mo dhali /e mini ya imun doḵ/e mana sa/?

⁹Yesus ki thoḵ uni gwo mo ki: ’Kon ma tee ki ’ko ’kume’d i’ce’dka su/ ka tente/ mowa? Waḵki/ wathiŋ kamu/ ki ya ki sho’k montee mo tani a’di diki kol mo haali/ a’di p̱arki moŋkush gi mony’cesh yan e mo be.

¹⁰Hili waḵki/ wathin ’de/ ki ya ki sho’k mon’thiny mo tani a’di kolki’d mo haali/ moŋkush diki di e a’di mo be.

¹¹Wakansan a’di oki gwo mo dhali yan’ko’d ṯor uni gwo mo ki: Akam bana ka Li/aasar a’di ishki e mo, hili aha/ mina ya mo mmomer a’di e mo ’peni mo/ish e mo be.

¹²Dhali imanciḵ a’di gwo ki o a’di gwo mo ki: Tap̱a, waḵki/ a’di ishki e mo tani a’di mina isi ’bor mo be.

¹³Dhala Yesus a’di oki gwo gom jwam piti mo, hili uni kulumki gwo ibwa mo ki a’di midi si a’di is ’peni mo/ish e mo be.

¹⁴Dhali yan’ko’d Yesus ki ṯor uni gwo ka ji sho’k mo mmo/o gwo mo ki: ALi/aasar, a’di wuki’d mo be.

¹⁵Dhali gom gway bum mo tani aha/ ’kunykina bwa mo ki aha/ dinaki di imun mo, wakan ki um mini gam gwo is mo. Hili dhalki ana iina i/ii i a’di mo.

¹⁶Ṯuuma, a’di jin yuḵu gway ka ’ci jin dhodhu isu/ mo, a’di o gwo e igarr piti jin nyaḵa a’di gwo ciḵ mo ki: Dhalki ana iina si’da/ ki ana mina nyaḵ wu ki a’di mo be.

¹⁷Dhali ka Yesus p̱u’dki’d mo tani a’di gamki’da Li/aasar, a’di jin diki’di jis jwa ka cim doŋon hila/ mo be.

¹⁸Pam Beeṯaniya a’di ’dishki Pa Urushaliim is mo, dhali si’d piti wana e ki ŋaṯgini su/ mo be.

¹⁹Dhali ’Kwani Yahuuda/ tana ris ka ris uni iikina Marṯẖa mo dhala Mariyam mo mmomalas uni mo isi goma kam buni mo be.

²⁰Ka Marṯẖa ciḵki gwo ka Yesus p̱u’dki’d mo tani ayim yaki’d mo dhali raḵ a’di ibway mo, ka Mariyam diki’d e bwaŋ gu’b mo be.

²¹Marṯẖa ki owa Yesus gwo mo ki: Tap̱a, waḵki/ /e mini ’taki di imahan mo tani akam pem midi ’taki diki wu mo be.

²²Dhali shwane/ isi me’d jin mishka/ ki to yin jin mina /e idoṯ ’peni Arumgimis mo tani Arumgimis midi c̱i /e a’di mo be.

²³Yesus ki thoḵa yim gwo mo ki: Akam pini midi cu mis doḵ/e mo be.

²⁴Marṯẖa ki thoḵ a’di gwo mo ki: Aha/ mishayi ki a’di midi cu mis doḵ/eyi e mompinu ka cim jiŋ ’ko’d mo be.

²⁵Yesus ki thoḵa yim gwo mo ki: Aha/ tana mompinu dhali moŋ’koki/e mo be. A’diyin jin gamki aha/ gwo is mo tani ba a’di jin wuki’d mo tani hili a’di midi di ki e mo be.

²⁶Dhali a’diyin jin di’d ki e dhali gam aha/ gwo is mo tani a’di midi diki wu ki sule/ mo. A/gwo yansan gama /e is mo ’te/sana?

²⁷Ayim ki thoḵ a’di gwo mo ki: Nye, Tap̱a. Aha/ gama gwo is ki /e tana Ḵrisṯẖos mo jin ta Ya/ ma Arumgimis mo, a’di jin midi yayu/ e mony’cesh yansan mo be.

²⁸Ka yim oki gwo yansan mo tani ayim yaki’d mo dhali yuḵ ’bwaham piti ka Mariyam mo mmo/o a’di gwo ka ḵwal is mo ki: Amanṯor Gwo di’di mahan mo dhali a’di yuḵki /e mo be.

²⁹Dhali ka yim ciḵki gwo mo tani ayim cuki mis ki jahanne/ mo dhali ya i a’di mo be.

³⁰Dhala Yesus diki p̱u’du/ ipa naskina/ mo, hili a’di diki’d naskina/ e mo yin jin gamkin ma Marṯẖa a’di ’kup̱ mo be.

³¹Ki ’Kwani Yahuuda/ kun ’kokin mo naskina/ e gu’b nyaḵka yim mo mmomalasa yim mo tani uni p̱arkina Mariyam e mo mmocukina a’di mis ki jahanne/ mo dhali ya ka pije/ mo tani, uni baṯẖkina yimi sho’k mo mmoṯosh ka yim yaki’d ka pije/ mo mmoko mo e moŋ’kup̱aje mo be.

³²Dhali yan’ko’d, aMariyam, ka yim p̱u’dki’d e mo jin din ma Yesus mo dhali p̱ar a’di e mo tani a’di biṯki’di sho’k piti mo dhali o gwo mo ki: Tap̱a, waḵki/ /e mini ’taki di imahan mo tani akam pem midi ’taki diki wu mo be.

³³Ka Yesus p̱arki’da yim e mo mmogwokina a’di mo tani dhali ’Kwani Yahuuda/ kun nyaḵki p̱u’d ka yim mo mmoko mo si’da/ tani a’di den ma du mo e shi/in piti mo dhali mur mo.

³⁴Dhali a’di ki o gwo mo ki: Mane mo jin karkina um a’di mo? Uni ki thoḵ a’di gwo mo ki: Tap̱a, yayu/ mo ma dhali p̱ar e mo.

³⁵Yesus gwoki’d mo be.

³⁶Wakan ’Kwani Yahuuda/ oki gwo mo ki: Hili mo mo ma. A’di enki a’di ijasa/!

³⁷Hili kun tiya ’peni uni oki gwo mo ki: A/bunya/ mina a’di jin mishi wathiny ja’da/ ḵa’d e mo tani mina a’di ’taki diki mish wathi/ yansan non ’peni mowu mo?

³⁸Dhali yan’ko’d Yesus den ma du mo e shi/in piti doḵ/e mo dhali a’di p̱u’dki’d e moŋ’kup̱aje mo. A’di ta jis wosh jin ’kolkunu mo dhali wosh karkunu mo mmo’dap̱ a’di ’twa/ mo be.

³⁹Yesus ki o gwo mo ki: Ḵaci wosh mo ma. Dhala Marṯẖa jin ta ’bwaham gi wathi/ jin wu’d mo tani o a’di gwo mo ki: Tap̱a, ki mo yan shwanetan mo tani a’di min ma shimi bulabul mo haali/ a’di ’kokin ma cimi doŋon mo mmowu mo be.

⁴⁰Yesus ki owa yim gwo mo ki: Dika/ ki ṯor /e gwo mo waḵki/ /e mini ’taki gam gwo is mo tani /e mini ’taki p̱ar monyca ma Arumgimis e mowa?