Juan 11:6-40

⁶Pero conda uyubꞌi que ajmuac e Lázaro, e Jesús machi ixin sino que quetpato tiaꞌ turu chateꞌ día.

⁷Entonces conda cꞌapa e chateꞌ día era e Jesús uyare uyajcanuarobꞌ y che: —Incuic otronyajr tama e departamento Judea, che e Jesús.

⁸Y che uyajcanuarobꞌ: —Cawajcanseyajet, ¿cꞌar ca amener lo que cay canumse cabꞌa jax tocto tama e lugar yajaꞌ, que e nuquir winicobꞌ cꞌani ani uchamset taca e tun? ¿Y tucꞌa tuaꞌ cꞌani isutpa iꞌxin yajaꞌ otronyajr? che uyajcanuarobꞌ.

⁹Y che e Jesús: —¿Machi ca inata que ayan doce hora tama inteꞌ día? Pues tin e axana tama e día machi axin uyobꞌi or uyoc tama ingojr tun porque chequer e bꞌir tama e janchꞌaquenar.

¹⁰Pero tin e axana acbꞌar axin uyobꞌi or uyoc y acucrema porque matucꞌa e janchꞌaquenar, che e Jesús.

¹¹Pero nacpat era e Jesús sutpa ojron y che: —E Lázaro xeꞌ catzay cawira wayan, pero nen cꞌani inxin imbꞌixqꞌues, che e Jesús.

¹²Entonces chenobꞌ uyajcanuarobꞌ: —Cawinquiraret, jay waynij taca war uche war che que axin atzꞌacpa umen e waynij era, che uyajcanuarobꞌ.

¹³Pues e Jesús ojron cocha era tuaꞌ uyare uyajcanuarobꞌ que chamay e Lázaro, pero jaxirobꞌ uchebꞌiobꞌ que bꞌojbꞌir waynij taca war uche.

¹⁴Entonces e Jesús ojron más chequer tut uyajcanuarobꞌ y che: —Chamay e Lázaro.

¹⁵Pero nen war intzay que machi turen conda chamay e Lázaro porque tamar era cꞌani ixixin ixcꞌupseyan tamaren conda inxin insuti imbꞌixqꞌues tujam e chamenobꞌ. Pero incuic cawiric e Lázaro era, che e Jesús.

¹⁶Entonces e Tomás xeꞌ arobꞌna Cuach uyare uyet ajcanuarobꞌ y che: —Incuic non ubꞌan tuaꞌ caxin cachamay taca e Jesús, che e Tomás.

¹⁷Pues entonces conda cꞌotoy e Jesús tutiꞌ e chinam Betania utajwi que ayix cuatro día que mujcbꞌir e Lázaro.

¹⁸Pues e chinam era majax innajt tut e chinam Jerusalem,

¹⁹y tamar era meyra gente tama e chinam era tari tuaꞌ uwarajsiobꞌ e Marta taca e María tuaꞌ ucꞌuniobꞌ tamar uchamer uwijtzꞌin.

²⁰Pero conda e Marta cꞌotoy unata que war acꞌotoy e Jesús, ixin tuaꞌ utajwi tama uni e bꞌir. Pero e María quetpa tama uyotot.

²¹Entonces e Marta uyare e Jesús y che: —Niwinquiraret, jay turet nic ani tara niwijtzꞌin machi ani chamay.

²²Pero nen innata que e Dios axin uyajqꞌuet tunor lo que iꞌxin acꞌajti tacar, che e Marta.

²³Y che e Jesús: —Awijtzꞌin cꞌani asutpa abꞌixcꞌa, che e Jesús.

²⁴Y che e Marta: —Nen innata que axin asutpa abꞌixcꞌa, pero este que acꞌotoy e día conda asujta abꞌixqꞌuesnobꞌ tunor e gente tama ucꞌapesnibꞌir tunor era, che e Marta.

²⁵Y che e Jesús: —Jax nen xeꞌ tuaꞌ insuti imbꞌixqꞌues tunor tin e chamenobꞌ. Y jax nen ubꞌan xeꞌ inwajcꞌu e cuxtar xeꞌ machi tuaꞌ acꞌapa. Y tunor tin e acꞌupseyanobꞌ tamaren motor que axin achamayobꞌ pero nen cꞌani insuti imbꞌixqꞌuesobꞌ otronyajr.

²⁶Y tin e turobꞌ tara tor e rum xeꞌ bꞌixirobꞌto xeꞌ war acꞌupseyanobꞌ tamaren machi tuaꞌ achamayobꞌ inyajrer. ¿War ca acꞌupse tunor era? che e Jesús.

²⁷Y che e Marta: —Incꞌupse yaꞌ, Niwinquiraret, que net jax e Cristo, y que net jax Uyunenet e Dios, y que net jax tin e quetpa tuaꞌ watar, che e Marta.

²⁸Conda cꞌapa ojron cocha era ixin e Marta tuaꞌ upejca uwijtzꞌin tzꞌustaca xeꞌ jax e María y uyare: —Yopa Cawajcanseyaj, cꞌani oꞌjron tacaret, che e Marta.

²⁹Pues e María conda uyubꞌi e ojroner era achpa wacchetaca y ixin tuaꞌ utajwi e Jesús.

³⁰Pero e Jesús merato oꞌchoy macuir e chinam sino que quetpato tama uni e bꞌir tiaꞌ cay ojron taca e Marta.

³¹Pero conda e sian ajwarobꞌ xeꞌ turobꞌ tama e otot xeꞌ war ucꞌuniobꞌ e Marta y e María uwirobꞌ que e María achpa wacchetaca y locꞌoy ixin, locꞌoyobꞌ jaxirobꞌ ubꞌan y ixiobꞌ tupat, porque war uchebꞌiobꞌ que e María war axin tor umujrir uwijtzꞌin tuaꞌ aꞌru yajaꞌ.

³²Entonces conda cꞌotoy e María tuyejtzꞌer e Jesús cotuan tut y che: —Niwinquiraret, jay turet nic ani tara, niwijtzꞌin machi ani chamay, che e María.

³³Pero conda e Jesús uwira que war aꞌru e María y que war aruobꞌ tunor e ajwarobꞌ xeꞌ war axiobꞌ tupat, jaxir tzꞌintzꞌa tama uyalma ubꞌan.

³⁴Entonces e Jesús uyubꞌi tuobꞌ y che: —¿Tiaꞌ imuqui? che e Jesús. Y chenobꞌ: —Cawinquiraret, lar chꞌujcun awira, che e gente era.

³⁵Y cay uqꞌui e Jesús ubꞌan.

³⁶Entonces ojronobꞌ e ajwarobꞌ y chenobꞌ: —Iranic que meyra war ani ucꞌani tin e chamay era, chenobꞌ e gente era.

³⁷Pero ayan tin e ojronobꞌ y che: —Jaxir ayan ucꞌotorer tuaꞌ uyerojse unacꞌut tin e tajpem ani ut. ¿Ma ca nic obꞌna ani tuaꞌ utzꞌacpes e Lázaro tuaꞌ machi achamay? che e gente era.

³⁸Pues entonces ixin e Jesús esto tiaꞌ mujca xeꞌ chamay era. Y tzꞌintzꞌa tama uyalma otronyajr. Pues e mujr jax inteꞌ chꞌen xeꞌ chembꞌir tama unac inteꞌ witzir xeꞌ macar taca inteꞌ nuxi tun.

³⁹Y che e Jesús: —Locsenic e tun tama utiꞌ e chꞌen, che e Jesús. Pero e Marta xeꞌ jax usacun e chamen ojron y che: —Niwinquiraret, Intujix. Ayix cuatro día que mujcbꞌir, che e Marta.

⁴⁰Y che e Jesús: —¿Machi ca inwaret que jay icꞌupseyan tamaren cꞌani awira utawarer e Dios? che e Jesús.