Ioane 11:6-40

⁶Wasana wa i ataiei i asiebo, asubena labui ena aba mia eai ie mia.

⁷Abotai abo i ribalau ena heaheatayao aridi eai i ene, “Ta uio Iudea eai.”

⁸Ena heaheata ia se heriba, si ene, Tanuagamai e, lahinai wa Iueda tataodi se eooim bena se lauwe’uim, abo u uio nei eai?”

⁹Iesu i heuioidi, i ene, “Asubena esega mahana saudoudoi labui, e nige’e wa? Taba tau esau asubena eai i tautausi, nige i alabesibesi, paana ede tanoubu marana ie ita.

¹⁰Na taba tau esau maiona eai i tautausi abo i alabesibesi, paana ede nige marana i ota ia nuaboeana eai.”

¹¹Teina riba ta i ribaedi, abotai abo i heribadi i ene, “Ehada Lasaro ie eno; ea lau ia abo ea hanoi.”

¹²Ena heaheatayao si ene, “Guiau e, ena ie eno, abo i lolouio.”

¹³Iesu ena mate ribana i ribaei: isi si ene bena eno eo aiyawasi ribadi i ribaedi.

¹⁴Iesu abo i heribakomakomanidi, i ene, “Lasaro i odalele.

¹⁵Nuagu i lolo hinage, eau nei eai nige’e, bena abo au awamamohoi; taiede, ta lau ia arinai.”

¹⁶Toma, esana esau Godegode, ana sasaguyao i heribadi i ene, “Ita hinage ta lau, ia maeda ta mate esega.”

¹⁷Iesu abo ie lage, i itayao Lasaro asubena hasi bousa eai ie ota.

¹⁸Betania eo Ierusalema eaaawadi nige se loha, doha hinage maila labui.

¹⁹Iudea tataodi gamagaridi se laoma Mareta eo Maria aridi eai, loudi ie mate wa bena nuadi se ribahebigabigadi.

²⁰Mareta wasana i ataiei Iesu i laolaoma, i laubagibagiei bena se hailobai: na Maria numa eai i bawabigabiga.

²¹Mareta Iesu abo i heriba i ene, “Guiau e, oa taba inai, lougu taba nige i mate.

²²Na taiede ea nuatui wau ta saha saha u awanori Eaubada arinai Eaubada abo i leawa.”

²³Iesu ia i heriba, i ene, “Sora loum abo i torouio.”

²⁴Mareta ia i heriba i ene, “Ea nuatuiyao huia murimuritana eai torouio asubenana eai abo i torouio.”

²⁵Iesu ia i heriba i ene, “Eau torouiona, eo maurina ede: ia i awamamohoiegu, ena i matearirio, abo i mauri.

²⁶Esau ma maumaurina eai i awamamohoiegu taba nige i mate. Meta wa u awamamohoiei?”

²⁷Mareta abo i heriba i ene, “Guiau e, e: ea awamamohoiei oa Keriso, Eaubada Natuna, iaede wa si ene ia abo i laoma tanoubu eai ta.”

²⁸Ie riba ina doha, abo ie lau ena doga Maria i eogamahimahihiei, i ene, “Tanuaga i lagema, i hetalam.”

²⁹Riba wa i ataiei, i toroheuheula ie lau ia arinai.

³⁰(Iesu sora nige i lagema eanua, Mareta ena aba laubagibagiena wa, arinai mo ma bawana).

³¹Iudea tataodi wa maedi Maria numa eai se babawa, ia nuana se ribahebigabiga wa, Maria se ita i toroheuheula i lulage murimuri eai, se hemuriwatai si ene, “Abo i lau bousa eai ne, i doudou.”

³²Maria abo i lage Iesu ena aba bawa eai, ia ie ita i guridobi aena eai, i ribalau ia arinai i ene, “Guiau e, oa taba inai, lougu taba nige i mate.”

³³Iesu ia ie ita i doudou, Iudea tataodi maenayao se laoma wa hinage se dou, arinai nuana i amamna ariri, eo i nuadubu hinage.

³⁴I ene, “Haedi edi abatorena ede?” Se heriba si ene, “Guiau e, u laoma u ita.”

³⁵Iesu abo ie dou.

³⁶Iudea tataodi abo si ene, “I gadosisidumadumai wa?”

³⁷Isi headi si ene, “Teina tau ta taumatagibugibuna wa matana i helaladi, nige ena gigibori gonoana ina tau ta matena abo i ribanuahi wa?”

³⁸Iesu nuana i hisihisiliuio i lagema bousa eai. Bousa wa duhana ede, we’u esau i ota‐tawai.

³⁹Iesu i ene, “We’u me au buihesuara.” Mareta, taumatematena louna wa, ia i heriba i ene, “Guiau e, nuana abo i boha’o; paana i mateo asubena hasi.”

⁴⁰Iesu ia heriba i ene, “Ea heribam e nige’e, ea ’ne, taba u sunumaei, Eaubada hedebasaena abo u ita?”