Johanningundru 11:6-40

⁶Nulu matja ngarana, nau muntja, Nau ditji, mandru morla nunkangupini pirini, woderi Nau nganana, ngamana wonti.

⁷Ngadani Nau milini nunkanani jatana wonti: “Ngaiana nakaldra Judalaia palkananto!”

⁸Mili nunkani nunkangu jatana wonti: “Rabbi, kalkani juda kanali wontina paraia jidna mardali dakala, ja nakaldra jidni jerra palkai?”

⁹Jesujeli kalabana wonti: “Wata ditjiwirdri ditji karitjiai pota marapratjana ja mandru? Worana ditjini wiriai nau wata dakateriai, ngangau nulu nunkanipini mitaia praitji najiai;

¹⁰Worana tinkani wirariai, nau dakateriai, ngangau praitji wata nunkangu nganai.”

¹¹Jenia Nau jatana wonti, ja ngadani Nau tanangu jatana wonti: “Lazarus kamaneli ngaianani mukaturarala wapaia; ja ngani wapai, nina jiritjibala.”

¹²Mili nunkani jatana wonti: “Kaparajai, nau mukaturaranani, nau tepi pantjinani.”

¹³Jesus nunkani narindru jatana wonti: tanali ngundrana wonti, Nau jenia mukandru jatai.

¹⁴Ngadani Jesus tanangu talku jatana wonti: “Lazarus palila wiri,

¹⁵Ja ngani mankiai jurangundru, ngani wata naka nganala wiri, ngangau jura morlalu ngundrananto; ngaiana nunkangu palkananto.”

¹⁶Thomas, nina tanali dikai Didymus, mili nguruni jatana wonti: “Ngaiana bakana palkananto nunkangu jela palila!”

¹⁷Jesus matja wokarana, Nulu nina mankamankana wonti, nau ditji mandru ja mandru narikutuni paranani.

¹⁸Bethania Jerusalemingu karakara nganana wonti, Statia marapratjana ja mara wora worita.

¹⁹Juda kana marapu Marthangu ja Mariangu wokarana wonti pudlana nejini pudlanani ngankalkala.

²⁰Marthandru matja ngarana Jesus wokaranani, nani wapana wonti nunkangu mandurila; Maria pungani ngamantina wonti.

²¹Marthani Jesungu jatana wonti: “Kaparajai, jidni ninkida ngananani, neji ngakani wata palinani.

²²Bakana karari ngani milkila, minakulno jidni Godandru ngatjinani, jenia Godali jinkangu jinkila nganai.”

²³Jesus nankangu jatana wonti: “Neji jinkani jiritjila nganai.”

²⁴Marthani nunkangu jatana wonti: “Ngani milkila, nau jiritjila nganai tepi terkakani, ditjini ngadalani.”

²⁵Jesus nankangu jatana wonti: “Ngani tepi terkakani ja tepi nganai. Warle ngakangu morlalu ngundrai, nau tepi ngamala nganai, bakana nau palinani.

²⁶Ja worana tepi ngamai ja ngakangu morlalu ngundrai, nau morlalu ngurali wata palila nganai. Jundru jenia morlalu ngundrai?”

²⁷Nani nunkangu jatana wonti: “Kau Kaparajai, ngato morlalu ngundrai jidni Christus nganai, Godaia Ngatamura, Nauja mitani wokarananto.”

²⁸Ja nani jenia matja jatana, nani wapana wonti ja kaku nankani Mariana kurukuru karkana wonti ja jatana wonti: “Ngujangujara jinkinietja ninkida nganai ja jidna karkai.”

²⁹Nandru jenia matja ngarana, nani nurujeli jiritjina wonti ja nunkangu wokarana wonti.

³⁰Jesus jendranguta wata ngurani wokarana wonti, a-ai, Nau nunkangupini pirini nganana wonti, woderi Marthani nunkangu mandurina wonti.

³¹Juda kanali, tana nankangu jela pungani ngamana wonti ja nana ngankalkana wonti, najinani Maria nurujeli jiritjinani ja dunkanani, tana nankangu karipaterina wonti ja jatana wonti: “Nania narikutuja wapai naka jindrala.”

³²Maria naka wokaranani woderi Jesus nganana wonti, nandru nina matja najina, nani nunkangu tidnani woraterina wonti ja nunkangu jatana wonti: “Kaparajai, jidni ninkida ngananani, neji ngakani wata palinani.”

³³Jesujeli nana jindranani najina, ja Juda kana, tana nankangunto matja wokarana, bakana jindranani, Nau Jaolali ngara jerkina wonti ja ngaratutututungana wonti.

³⁴Ja Nau jatana wonti: “Woderi jura nina kurala wiri?” Tana nunkangu jatana wonti: “Kaparajai, kaparau ja najiau!”

³⁵Ja Jesus wolkarina wonti.

³⁶Juda kana jatana wonti: “Najianau worderu Nulia ninaia ngantjana paraia!”

³⁷Palpa tanangundru jatana wonti: “Naupara, Nulia butjuja milki piri ngankana paraia, ngandandarina paraia ngankala, bakana Naupini wata palinanto?”

³⁸Jesus nakaldra ngara jerkina wonti ja narikutuni wokarana wonti. Nau minka nganana wonti, ja marda nunkangu parana wonti.

³⁹Jesus jatana wonti: “Nina marda tirimalkanau.” Martha, naria kaku, nunkangu jatana wonti: “Kaparajai, nauja matja paniai, ngangau nauja ditji mandru ja mandru parai”

⁴⁰Jesus nankangu jatana wonti: “Ngani jinkangu wata jatana warai, jundru morlalu ngundranani, jundru Godaia pirnala najila nganai?”