Jowãw 11:6-40

⁶dooh nayyw hẽ tahyb n'aa jóh bä. Pawóp nä ta ä̃h tatab'ëës, Rasaro nahëë näng do taky n'aa napäh bä.

⁷Ta jawén kä Jesus ky hadoo ta ma matëg sa hã: —Hamäh, p'aa hẽnh ër bah'ũũm Judah häj n'aa hẽnh, Rasaro rahabok hẽnh —näng mä Jesus kyyh.

⁸Ti m' Jesus ma matëg raky hadoo ta hã: —Ma matëg, —näk mäh —nag'aap hẽ Judah buuj sa wahë n'aa rakarẽn õm radaj'ëëp. Hëd n'aa t'ĩĩ hẽnh makarẽn mababaaj hõm? —näk mä sa kyyh.

⁹Ti m' panyyg gó Jesus ky hadoo: —Badawëët adëb bä tabawag. Adëb bä ji awäd bä, baad ji bawät. Dooh ji tsyym poo däng péh, badäk hahỹ bag n'aa yt ji bawät do hyb n'aa —näng mäh.

¹⁰—Badagyp doo gó ji awäd bä, daap ji tsyym poo kejäk, ta bag badoh do hyb n'aa ta hã —näng mä Jesus kyyh.

¹¹Ti m', ta ti Jesus her'oot do jawén paa bä, taky hadoo ẽnh: —Ër najiis Rasaro aä̃ jëng. Ỹ ahõm dó t'ĩĩ hẽnh ỹ mebëë nyy hyb n'aa —näng mä Jesus.

¹²Ti m' ta ma matëg raky hadoo: —Ãã wahë n'aa, —näk mäh —tabaỹỹh bä, has'oo däk da —näk mä sa kyyh.

¹³Dajëp né hẽ Rasaro, näng Jesus. Aỹỹh ta ma matëg red'oo.

¹⁴Ti m' baad ub Jesus baher'ood kän sa hã: —Dajëp Rasaro ỹ hanäng doo —näng mäh.

¹⁵—Baad tanyy ỹ badoh t'ĩĩ hẽnh tadajëp do hã, hã ỹ bë h'yy kae kän hyb n'aa kä —näng mäh. —Hamäh, ër ah'ũũm t'ĩĩ hẽnh —näng mä Jesus kyyh.

¹⁶Ti m', Toméh, “Kawareeh” ramaneëënh doo, ky hadoo ta wób sa hã: —Hamä ta sii, ta sii ër dejëp hyb n'aa —näng mä Toméh kyyh.

¹⁷Ti m' panang Betanija bedaa däk bä, Jesus ky n'aa napäh, ji meheet pé däg mä ta ä̃h Rasaro pä gabaho doo gó radakä jëng doo.

¹⁸Edah panang Betanija, Jerusarẽnh bä naa.

¹⁹Ti hyb n'aa hajõk Judah buuj sa wahë n'aa hedoo doo, ta wób na-ããj mä an'aa Maah-Ta wë, Marija wë rah'yyb en'yym hyb n'aa, rahyb n'aa natón hyb n'aa sa hỹỹj makũũh.

²⁰Ti m' Maah-Ta ky n'aa napäh bä Jesus kajaa, anyyh mä ta tób bä naa, ahõm ta wë. Marija ahäng mä sa tób yt hã.

²¹Ti m' Maah-Ta kajaa Jesus wë kä, ti m' taky hadoo ta hã: —Hyb N'aa Jawyk Doo, —näng mäh —babä magëë bä paawä, dooh paawä hä̃j ỹ dajëb bä —näng mäh.

²²—Ti hadoo né hẽ paawä, ỹ hapäh, P'op Hagä Do anoo né da a hã sahõnh hẽ ta hã maky n'aa etsẽẽ doo —näng mä Maah-Ta kyyh.

²³Ti m' Jesus ky hadoo ta hã: —Ganä wät da a hỹỹj —näng mäh.

²⁴Ti m' Maah-Ta ky hadoo: —Ỹ hapäh, ganä wät né da sahõnh hẽ ragenä bong do hã kä P'op Hagä Do betyn bong do hã kä banäm doo hẽnh, banesaa doo hẽnh —näng mä Maah-Ta.

²⁵Ti m' Jesus ky hadoo ta hã: —Ỹ né da hanoo ta ti genyy bong doo. Ỹ né ti hedëb had'yyt hanoo doo. Hã ỹ h'yy ka'eeh doo, dajëb né paawä, tawäd had'yyt hẽ da hỹ pong jé P'op Hagä Do pa.

²⁶Hahỹ hedëp nä doo, hã ỹ h'yy ka'eeh doo, tabad'op hẽ da tadajëp ta h'yyb tym. P'op Hagä Do pa had'yyt hẽ da tabawäd kän —näng mä Jesus. Ti m' Maah-Ta hã tabeaaj kän: —Maky daheeh ta ti ỹ her'oot doo? —näng mäh.

²⁷—Ỹỹ, Hyb N'aa Jawyk Doo. Ỹ ky daheeh õm Kristo, P'op Hagä Do H'yyb Däng Doo, P'op Hagä Do T'aah, P'op Hagä Do ky n'aa enooh do paah —näng mä Maah-Ta kyyh Jesus hã.

²⁸Ti m' ta ti tabaher'oot do jawén paa bä kä m' Maah-Ta bahõm, ta ä̃nh Marija tanaëënh hyb n'aa. Ta m'aa hẽnh mä tanaëënh, ti m' taky hadoo: —Ma matëg kajaa. Ta kyy gó õm ỹ naëënh —näng mä Maah-Ta ta ä̃nh hã.

²⁹Ti m', Marija maa napäh bä ta tii, nayyw hẽ m' tabas'ëëg gëët, ahõm kän mä Jesus wë.

³⁰Dooh Jesus ajëë suun nä bä panang bä. Ta hã Maah-Ta mamuun doo bä tabagëët nä.

³¹Ti m' Judah buuj tób bä hat'oonh doo, Marija h'yyb en'yym doo, rabahapäh bä nayyw hẽ Marija bas'ëëg gëët bä, tabanyyh bä, rabahõm kän ta jawén. Kamag hakëë hẽnh hahõm red'oo mäh. T'ĩĩ hẽnh haoot red'oo mäh.

³²Ti m', Marija kajaa bä kä Jesus bagëët bä, ta taron nu paa me tabahyy häng ta wë. Ti m' taky hadoo: —Hyb N'aa Jawyk Doo, —näng mäh —babä magëë bä paawä, hä̃j ỹ dooh paawä tadajëb bä —näng mäh.

³³Ti m' Jesus bahapäh bä Marija haoot doo, Judah buuj Marija sii han'aa do na-ããj hẽ ha'oot doo, baad nado wäd ta h'yyb, tak'ëp tahyb n'aa tón wät. Tahyb n'aa esów wät.

³⁴Ti m' tabeaaj kän: —Nyy bä bë dakä jëng? —näng mäh. Ti m' raky hadoo: —B'ëëp, mahegãã, Hyb N'aa Jawyk Doo —näk mä sa kyyh.

³⁵Ti m' Jesus baód wät.

³⁶Ti m' Judah buuj raky hadoo: —Bë hegãã, tak'ëp paa takamahä̃n —näk mä sa kyyh.

³⁷Ti m' ta wób raky hadoo: —Ty tamah do taty nä däk, tanoo. Hëd n'aa tananoo hahỹ tanadajëp hyb n'aa? —näk mä sa kyyh.

³⁸P'aa hẽnh ẽnh baad nado wäd Jesus h'yyb. Tak'ëp tahyb n'aa tón takajaa bä kamag basuun bä. Pä gabaho doo gó radakä jëng. Pä gatsabak doo me ranoo gatsëë däk.

³⁹Ti m' Jesus ky hadoo: —Bë noo gatsë do hõm —näng mäh. Ti m' Maah-Ta, dajëp do ä̃nh, ky hadoo: —Hyb N'aa Jawyk Doo, —näng mäh —buu banes'aa däg. Ji meheet pé däg ta ä̃h tadajëp —näng mä Maah-Ta kyyh.

⁴⁰Ti m' Jesus ky hadoo ta hã: —Hã ỹ mah'yy kae bä, mahapäh da P'op Hagä Do kabaj'aa doo —näng mä Jesus Maah-Ta hã.